ភ្នំពេញ៖ មន្ត្រីនាយកដ្ឋានព្រហ្មទណ្ឌក្រសួងមហាផ្ទៃ បានឲ្យដឹងថា មន្ត្រីនគរបាល ដែលប្រើហឹង្សាលើយុវជនម្នាក់ ឲ្យរងរបួសធ្ងន់ កាលពីយប់ថ្ងៃទី២៤ ខែឧសភា ឆ្នាំ២០១៨ ត្រូវបានសមត្ថកិច្ចឃាត់ខ្លួនសាកសួរ នៅនាយកដ្ឋាននគរបាលព្រហ្មទណ្ឌ នៅល្ងាចថ្ងៃទី២៥ ខែឧសភា ឆ្នាំ២០១៨ ហើយនៅរសៀលថ្ងៃទី២៦ឧសភា ត្រូវបានបញ្ជូនខ្លួនទៅតុលាការដើម្បីបន្តនីតិវិធីច្បាប់។
មន្ត្រីនគរបាលរូបនោះមានឈ្មោះ សុន ពិសាល ឋានន្តរស័ក្តិជាអនុសេនីយ៍ទោតួនាទី នាយរងផ្នែក នៅនាយកដ្ឋានព្រហ្មទណ្ឌ បច្ចេកទេស វិទ្យាសាស្ត្រ ។ ចំណែកបក្ខពួកជាច្រើននាក់ទៀតបានរត់គេចខ្លួន ។
ទង្វើរបស់មន្ត្រីនគរបាលពាលរូបនេះបង្កឲ្យមហាជនរិះគន់កក្រើកហ្វេសប៊ុក និងទាមទារឲ្យថ្នាក់ដឹកនាំនគរបាលជាតិ ចាត់វិធានការណ៍ច្បាប់ និងបណ្ដេញចេញពីក្របខ័ណ្ឌនគរបាលជាតិ ដើម្បីកុំឲ្យខូចឈ្មោះដល់មន្ត្រីល្អត្រឹមត្រូវទូទាំងប្រទេស ។
ជាមួយគ្នានោះដែរនាពេលកន្លងមក មន្ត្រីនគរបាលឈ្មោះ សុន ពិសាល ក៏ធ្លាប់ប្រព្រឹត្តដូចជាករណីនេះដែរ ក្នុងការចាប់ប្រជាពលរដ្ឋស្លូតត្រង់វាយធ្វើស៊ីយករបស់របរជាដើម ហើយរឿងនេះត្រូវបានបែកធ្លាយក្រុមនគរបាលដែលមានជំនាញខាងប្រដាល់រាស្ត្រ ជាមុខសញ្ញាចាស់ធ្លាប់វារាស្ត្រកន្លងមកដែរ។
មន្ត្រីនគរបាលឈ្មោះ សុន ពិសាល ដែលសមត្ថកិច្ចឃាត់ខ្លួនបញ្ជូនទៅតុលាការបន្ទាប់ពីមន្ត្រីនគរបាលរូបនេះ ប្រើហឹង្សាលើយុវជនម្នាក់ ដែលគ្មានកំហុស បណ្ដាលឲ្យរងរបួសធ្ងន់ កាលពីយប់ថ្ងៃទី២៤ ខែ ឧសភា ឆ្នាំ ២០១៨ គឺជាមុខសញ្ញាចាស់ ធ្លាប់ប្រព្រឹត្តបទល្មើសហឹង្សាទៅលើយុវជនផ្សេងទៀតកាលពីឆ្នាំមុនដែរ ដែលកាលនោះ សុន ពិសាល ជាមន្ត្រីនគរបាលពន្លត់អគ្គីភ័យ ។ បន្ទាប់ពីមានបញ្ហា សុន ពិសាល បានផ្ទេរភារកិច្ចពី ការិយាល័យនគរបាលបង្ការ និង ពន្លត់អគ្គិភ័យ មកនៅនាយកដ្ឋាននគរបាលព្រហ្មទណ្ឌបច្ចេកទេសវិទ្យាសាស្ត្រ ហើយបានឡើងឋានៈជានាយរងផ្នែកថែមទៀត ។
អ្នកលេងហ្វេសប៊ុក បានខំមិនថា កម្មពៀរពិតជាមានមែន ជនណាសាងអីទទួលនឹង ។ ពេលនេះគុកព្រៃស រៀបចំទទួលមន្ត្រីនគរបាលល្មើសច្បាប់ សុន ពិសាល ហើយ ។ចំំណែកជនរងគ្រោះឈ្មោះ អ៊ឹម បញ្ញា ភេទប្រុស អាយុ ២៤ឆ្នាំ ស្នាក់នៅផ្ទះលេខ៣៨៤ ផ្លូវលំ ភូមិរោងចក្រ សង្កាត់គោកឃ្លោង ខណ្ឌសែនសុខ រាជធានីភ្នំពេញ៕ ដោយ៖បញ្ញាស័ក្តិ
