ជនអន្តោប្រវេសន៍ជនជាតិម៉ាលីម្នាក់ បានក្លាយជាវីរៈបុរសនៅទីក្រុងប៉ារីស បន្ទាប់ពីគាត់បានឡើង តាមយ៉អាគារខាងមុខជាច្រើនជាន់ ដើម្បីទៅសង្គ្រោះកុមារម្នាក់ដែលកំពុងសំយ៉ុងជាប់នៅជាន់ទី ៤ នៅថ្ងៃសៅរិ៍កន្លងទៅនេះ។ នេះបើតាមការចេញផ្សាយរបស់ BBC។
វីដេអូនៃការជួយសង្គ្រោះកុការរបស់មនុស្សពីងពាងជនជាតិ ម៉ាលីម្នាក់នេះ ត្រូវបានគេបង្ហោះនិងចែកចាយយ៉ាងច្រើននៅតាមបណ្តាញសង្គម ហើយបុរសរូបនោះ ដែលមានឈ្មោះថា Mamoudou Gassama ត្រូវបានសារទរយ៉ាងខ្លាំង។
បើតាមវិដេអូ គាត់បានតោងឡើងតាមយ៉អាគារខាងមុខ ពីជាន់មួយទៅជាន់មួយ ដើម្បីទៅសង្គ្រោះកុមារម្នាក់អាយុ ៤ឆ្នាំ ខណៈដែលមានអ្នកជិតខាងម្នាក់នៅក្បែរគ្នា កំពុងតោងកុមារនោះជាប់កុំឲ្យធ្លាក់។
បន្ទាប់ពីការជួយសង្គ្រោះដ៏ក្លាហាន និងអស្ចារ្យនេះ ប្រធានាធិបតីបារាំងលោក Emmanuel Macron បានអញ្ជើញអ្នកក្លាហាននោះ ទៅវិមាន Elysee នៅថ្ងៃច័ន្ទនេះ ដើម្បីអរគុណគាត់ដោយផ្ទាល់ជាលក្ខណៈផ្ទាល់ខ្លួន។
ចំនែកអភិបាលក្រុងប៉ារីស អ្នកស្រី Anne Hidalgo ក៏បានសារទរចំពោះវីរៈបុរស វ័យ ២២ឆ្នាំនោះផងដែរ និងបានអញ្ជើញគាត់ដើម្បីអរគុណ។
អ្នកស្រីអភិបាលក្រុងប៉ារីស និយាយនៅក្នុង Twitter ថាលោក Mamoudou Gassama បានពន្យល់ប្រាប់អ្នកស្រីថា គាត់ទើបតែមកពីប្រទេសម៉ាលី ហើយរស់នៅទីក្រុងប៉ារីសបានតែ ២ ទៅ ៣ខែប៉ុណ្ណោះ ដោយគាត់មានក្តីសុបិន្តចង់សាងជីវិតថ្មីនៅទីនេះ។
អ្នកស្រីបានតបទៅគាត់វិញថា សកម្មភាពដ៍ក្លាហានរបស់គាត់គឺជាគំរូសំរាប់ប្រជាជនទាំងអស់ ហើយទីក្រុងប៉ារីស នឹងយកចិត្តទុកដាក់គាំទ្រគាត់ ដើម្បីឲ្យគាត់បានរស់នៅក្នុងប្រទេសប៉ារាំង៕ សុភ័ក្ត្រ
