មន្ត្រីកូរ៉េខាងត្បូង បានបញ្ជាក់ឲ្យដឹងថា ប្រធានាធិបតី ម៉ូន ជេអ៊ីនអាចនឹងចូលរួមកិច្ចប្រជុំកំពូលរវាង លោកដូណាល់ ត្រាំ និង គីម ជុងអ៊ុនដែរ។ នេះបើតាមការចេញផ្សាយរបស់ BBC។
មន្ត្រីដដែលបញ្ជាក់ទៀតថា វត្តមានរបស់ លោក ម៉ូនគឺវាអាស្រ័យទៅលើដំណើរការរីកចម្រើននៃកិច្ចប្រជុំដែលរៀបចំមុន ពេលកិច្ច ប្រជុំកំពូលរវាងមេដឹកនាំកូរ៉េខាងជើង និងអាមេរិច។
សូមបញ្ជាក់ថា កិច្ចប្រជុំកំពូលជាប្រវត្តិសាស្ត្ររវាង ដូណាល់ ត្រាំ និង គីម ជុងអ៊ុន គ្រោងធ្វើនៅថ្ងៃទី១២ ខែមិថុនាខាងមុខ នៅក្នុងប្រទេសសិង្ហបុរី ប៉ុន្តែកិច្ចប្រជុំនោះបានស្ថិតក្នុងភាពស្រពិចស្រពិលទៅវិញ បន្ទាប់ពី លោក ត្រាំ បានប្រកាសលុបចោលជំនួបកំពូលនោះ។
ទោះយ៉ាងណា ប្រទេសកូរ៉េខាងជើងបញ្ជាក់ជំហររបស់ខ្លួនថា មានឆន្ទៈជួបចរចារជាមួយនឹងភាគីអាមេរិចគ្រប់ពេលវេលា និងគ្រប់រូបភាព ហើយចំនែកត្រាំ ក៏បានអះអាងផងដែរ ថាកិច្ចប្រជុំនោះអាចនឹងប្រព្រឹត្តិធ្វើឡើងវិញបាន។
សេចក្តីលំអិតនៃកិច្ចប្រជុំរវាងអាមេរិច និងកូរ៉េខាងជើង គេមិនទាន់បានដឹងច្បាស់នៅឡើយទេប៉ុន្តែជំនួបកំពូលនោះ អាចនឹងផ្តោសសំខាន់លើការលុបបំបាត់អាវុធនុយក្លេអ៊ែរនៅឧបទ្វីបកូរ៉េនិងការកាតបន្ថយភាពតានតឹង៕ សុភ័ក្ត្រ