បាតុករប្រមូលផ្តុំនៅបាងកក អំពាវនាវឲ្យការបោះឆ្នោតប្រព្រឹត្តទៅឆាប់ ប្រព័ន្ធផ្សព្វផ្សាយរបស់ថៃនៅថ្ងៃទី ២៨ ខែឧសភា បានដកស្រង់សម្តីរបស់អគ្គលេខាធិការគណបក្សប្រជាធិបតេយ្យ Juti Krairiksh ថា ៖ គណបក្សនេះ អាចនឹងសហប្រតិបត្តិការជាមួយគូប្រជែង គឺគណបក្សភឿថៃ ប្រសិនបើគណបក្សប្រជាធិបតេយ្យដណ្តើមបានជោគជ័យក្នុងការបោះឆ្នោតខាងមុខ និងចាំបាច់ត្រូវមានដៃគូដើម្បីកសាងសម្ព័ន្ធភាពកាន់អំណាចនោះ ។
លោក Juti និយាយថា គណបក្សប្រជាធិបតេយ្យមានសង្ឃឹមយ៉ាងខ្លាំង ថាទទួលបានជោគជ័យក្នុងការបោះឆ្នោតតាមគំរោងនឹងប្រព្រឹត្តទៅនៅថ្ងៃទី ខែកុម្ភៈ ២០១៦ នឹងក្លាយជាគណបក្សស្នូលក្នុងការបង្កើតរដ្ឋាភិបាលថ្មី ។ លោកពោលបន្តថា ៖ ថ្វីត្បិតក្នុងអតីតកាលពិតជា “ពិបាកសហប្រតិបត្តិការ” ជាមួយភឿថៃក្តី ប៉ុន្តែអ្វីៗគ្រប់យ៉ាងនឹងប្រែប្រួល ប្រសិនបើគណបក្សនេះមានមេដឹកនាំថ្មីនោះ ។
តាមគម្រោងគណបក្សភឿថៃ កំពុងត្រៀមរៀបចំមេដឹកនាំថ្មី ជំនួសមេដឹកនាំស្តីទី លោក Viroj Pao-in ។ តាមមជ្ឈដ្ឋានអ្នកសង្កេតការណ៍នោះអ្នកស្រី Khunying Sudarat Keyurapan ដែលជាមេដឹកនាំសំខាន់ម្នាក់ មានលទ្ធភាពច្រើននឹងក្លាយជាមេដឹកនាំថ្មីរបស់គណបក្សដែលគាំទ្រត្រកូលស៊ីណាវ៉ាត្រា ។
អ្នកស្រី Sudarat ធ្លាប់ធ្វើជាអនុប្រធានគណបក្ស Thai Rak Thai ដែលបង្កើតឡើងដោយអតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា ហើយត្រូវបានតុលាការធម្មនុញ្ញចេញបញ្ជាឲ្យរំលាយកាលពីឆ្នាំ ២០០៧ ៕ សូយន
