ភ្នំពេញ៖ យ៉ាងហោចណាស់ក៏មានមនុស្ស២នាក់បាន រងរបួសស្រាល ដោយរលាកស្បែក ក្រោយពីមានហេតុការអគ្គីភ័យឆាបឆេះហាងស៊ុបចង្កាក់មួយកន្លែងនៅក្រោយផ្សារសាមគ្គី ។ តែទោះបីជាយ៉ាងណាក្តី គ្រោះចង្រៃនេះមិនបានធ្វើអោយខូចខាតទ្រព្យសម្បត្តិធ្ងន់ធ្ងរនោះទេ ដោយសារតែរថយន្តពន្លត់អគ្គីភ័យជាច្រើនគ្រឿងបានចូលទៅជួយអន្តរាគន៍ទាន់ពេល។
ហេតុការណ៍នេះបានបង្កការភ្ញាក់ផ្អើលឡើងកាលពីវេលាម៉ោង១០និង៣០នាទីព្រឹក ថ្ងៃទី២៩ ខែឧសភា ឆ្នាំ២០១៨ នៅចំណុច ហាងស៊ុប ចង្កាក់ (Volcano) ផ្លូវ១១២ សង្កាត់ផ្សារដេប៉ូ៣ ខណ្ឌទួលគោក រាជធានីភ្នំពេញ។
ប្រភពព័ត៌មានពីបុគ្គលិកនៅហាងស៊ុបចង្កាក់(Volcano) ខាងលើនេះបានប្រាប់ឲ្យដឹងថា នៅមុនពេលកើតហេតុគឺពួកគេកំពុងតែរំងាស់ទឹកស៊ុបសុខៗស្រាប់តែផ្ទុះធុងហ្គាស កើតជាអគ្គីភ័យឆាបឆេះ បណ្ដាលឲ្យបុគ្គលិក២នាក់បានរងរបួសស្រាល(សើរស្បែក)។ ហើយភ្លាមៗនោះ កម្លាំងសមត្តកិច្ចមូលដ្ឋាន បានទាក់ទងទៅខាងរថយន្តពន្លត់អគ្គីភ័យមកដល់ចំណុចកើតហេតុជាបន្តបន្ទាបដើម្បីអន្តគមន៍បាញ់ពន្លត់ផងដែរ។
ករណីអគ្គីភ័យនេះដែរ មានឡានទឹកបានមកដល់កន្លែងកើតហេតុចំនួន៥គ្រឿងតែសមត្ថកិច្ចបានប្រើប្រាស់ឡានទឹកអស់៤គ្រឿង ទើបរលត់ទៅវិញជាស្ថាពរ ។
ក្នុងករណីអគ្គីភ័យនេះដែរ លោកឯក ឃុនឌឿន អភិបាលនៃគណៈអភិបាលខណ្ឌទួលគោក ខណៈចុះទៅជួយអន្តរាគមន៍ដល់កន្លែងកើតហេតុបានអំពាវនាវដល់បងប្អូន ប្រជាពលរដ្ឋទាំងអស់បង្កើនការប្រុងប្រយ័ត្នឲ្យបានខ្ពស់ និងសូមណូមពរដល់ ប្រជាពលរដ្ឋត្រូវមានបំពុងពន្លត់អគ្គីភ័យនៅក្នុងផ្ទះ ដើម្បីងាយស្រួលក្នុងការបាញ់ពន្លត់ នៅពេលមានគ្រោះអគ្គីភ័យដោយយថហេតុ៕ ដោយ៖បញ្ញាស័ក្តិ
