ភ្នំពេញ៖ ឯកអគ្គរាជទូតចក្រភពអង់គ្លេសប្រចាំកម្ពុជាដែលចប់អាណត្តិ បានបញ្ជាក់ពីជំហររបស់ខ្លួនថា រដ្ឋាភិបាលចក្រភពអង់គ្លេស នៅតែបន្តផ្តល់ជំនួយដល់កម្ពុជា លើផ្នែកបោសសម្អាតមីន និងការបន្តជំរុញ កិច្ចសហប្រតិបត្តិការ លើផ្នែកសេដ្ឋកិច្ច និងវិនិយោគ។
លោកទេសរដ្ឋមន្ត្រី ប្រាក់ សុខុន បានថ្លែងថា រដ្ឋាភិបាលចក្រភពអង់គ្លេស បានគាំត្រ និងជួយឧបត្ថម្ភកន្លងមកដល់កម្ពុជា ពិសេសក្នុងសកម្មភាពបោសសម្អាតមីន តុលាការខ្មែរក្រហម និងការផ្តល់អាហារូបករណ៍ដល់និស្សិតកម្ពុជា ទៅបន្តការសិក្សានៅចក្រភពអង់គ្លេស។
លោកទេសរដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ កាលពីថ្ងៃទី២៩ខែឧសភា បានជំនួបពិភាក្សាការងារជាមួយ លោក William Longhurst ឯកអគ្គរាជទូតចក្រភពអង់គ្លេសប្រចាំកម្ពុជា ។ បើតាមលោកទេសរដ្ឋមន្ត្រី ប្រាក់ សុខុន បានវាយតម្លៃចំពោះការរួមវិភាគទានដ៏សកម្មរបស់លោក William Longhurst ឯកអគ្គរាជទូតចក្រភពអង់គ្លេសប្រចាំកម្ពុជា ក្នុងការពង្រឹងកិច្ចសហប្រតិបត្តិការទ្វេភាគី និងការធ្វើឲ្យទំនាក់ទំនងរវាងប្រទេសទាំងពីរកាន់តែមានភាពជិតស្និទ្ធឡើង ។
នៅក្នុងការពិភាក្សាផ្លាស់ប្តូរយោបល់ លើទំនាក់ទំនងសហប្រតិបត្តិការទ្វេភាគី លោកទេសរដ្ឋមន្ត្រី និងលោកឯកអគ្គរាជទូត បានវាយតម្លៃខ្ពស់ដោយការពេញចិត្តចំពោះការកើនឡើងយ៉ាងឆាប់រហ័សនូវបរិមាណនៃការផ្លាស់ប្តូរពាណិជ្ជកម្មរវាងប្រទេសទាំងពីរ រហូតដល់ជា១០០០លានដុល្លារ និងចំពោះការកើនឡើងនូវចំនួនអ្នកទេសចរអង់គ្លេសមកកាន់កម្ពុជា រហូតដល់ចំនួន១៧១០០០នាក់ ក្នុងឆ្នាំ២០១៧។
លោកឯកអគ្គរាជទូត បានគូសបញ្ជាក់ថា ចក្រភពអង់គ្លេសគឺជាមិត្តភក្តិដ៏ល្អរបស់កម្ពុជា ហើយបានបង្ហាញការចាប់អារម្មណ៍ខ្លាំងចំពោះការរីកចម្រើនលើគ្រប់វិស័យនៅកម្ពុជា ពិសេសផ្នែកសេដ្ឋកិច្ច ។ លោកបានថ្លែងអំពីជំហររបស់រដ្ឋាភិបាលចក្រភពអង់គ្លេសក្នុងការបន្តផ្តល់ជំនួយដល់កម្ពុជា លើផ្នែកបោសសម្អាតមីន និងការបន្តជំរុញកិច្ចសហប្រតិបត្តិការលើផ្នែកសេដ្ឋកិច្ច និងវិនិយោគ។ លោកក៏បានលើកឡើងថានឹងមានដំណើរទស្សនកិច្ចរបស់មន្ត្រីជាន់ខ្ពស់ក្រសួងការបរទេសចក្រភពអង់គ្លេស មកកាន់កម្ពុជា ក្នុងអនាគតខាមុខនេះផងដែរ។ ដោយ៖បញ្ញាស័ក្តិ