នៅពេលដែលសម្ព័ន្ធភាពរវាងមនុស្ស ២នាក់ ឈានផុតពាក្យថា មិត្តភាព និងក្លាយមកជាមនុស្សពិសេសសម្រាប់គ្នាទៅវិញទៅមកហើយនោះ វាប្រាកដណាស់ថា ទាំងពាក្យសម្ដី និងទង្វើពិតជាខុសប្លែកទៅតាមនោះដែរមិនខាន ជាពិសេសអាការប្រចែប្រចណ្ឌហួងហែងគូស្នេហ៍ ដែលមិនថាអ្នកណាៗ ក៏ធ្លាប់កើតមានអារម្មណ៍នេះដែរនៅពេលមានអ្នកផ្សេងចូលមកពាក់ព័ន្ធជាមួយគូស្នេហ៍របស់ខ្លួន។ បើជាការប្រចណ្ឌហួងហែងយ៉ាងមានព្រំដែន ក៏ល្មមអាចទទួលយកបាន តែបើសិនជាសម្តែងអាការប្រចែប្រចណ្ឌគូស្នេហ៍ ខ្លាំងជ្រុលហួសហេតុពេកនោះ វាច្បាស់ជាមានបញ្ហាកើតឡើងមិនខាន។ ដូច្នេះជាដំបូងនេះ អ្នកគួររៀនយល់ដឹងពីវិធីទប់ទល់នឹងចិត្តខ្លួនឯងជាមុនសិន នៅពេលណាដែលអ្នកចាប់ផ្តើមមានអារម្មណ៍ប្រចណ្ឌគូស្នេហ៍ជ្រុលពេក។
១- ប្រឹក្សា និងនិយាយគ្នាយ៉ាងត្រង់ទៅត្រង់មក
វាជារឿងធម្មតាទេ ដែលអ្នកមានអារម្មណ៍ហួងហែងប្រចណ្ឌនឹងគូស្នេហ៍ នៅពេលមើលឃើញថា សម្ព័ន្ធភាពស្នេហ៍របស់អ្នក ដូចជាមានអ្នកផ្សេងចូលមកពាក់ព័ន្ធ តែអារម្មណ៍នេះ អាចចាត់ការបានយ៉ាងងាយ ដោយគ្រាន់តែយើងប្រឹក្សា និងជជែកគ្នា ជាមួយនឹងគូស្នេហ៍របស់ខ្លួនយ៉ាងត្រង់ទៅត្រង់មកប៉ុណ្ណោះ ព្រោះវិធីនេះ គឺជាវិធីដែលជួយឱ្យគេបានយល់ពីមូលហេតុដែលថា តើអ្នកប្រចណ្ឌរូបគេដោយសាររឿងអ្វី និងតើខ្លួនគេ គួរតែចាត់ការចំពោះហេតុការណ៍នេះយ៉ាងម៉េចតទៅទៀត? ខណ:ពេលជាមួយគ្នា វាក៏ជាវិធីដែលធ្វើឱ្យអ្នកយល់ពីចិត្តរបស់គេកាន់តែច្រើនឡើងដែរ។
២- មិនគួរគិតច្រើនពេកទេ
មានច្រើនលើកណាស់ ដែលយើងសង្កេតឃើញថា អាការហួងហែងប្រចណ្ឌគូស្នេហ៍នេះ កើតឡើងដោយសារតែការគិតច្រើន ដោយការនាំយកហេតុការណ៍ផ្សេងៗទាំងនោះ មកតភ្ជាប់គ្នា រហូតក្លាយជារឿងជារ៉ាវ ទាំងខ្លួនឯងមិនទាន់ទាំងដឹងពីការពិតសូម្បីតែបន្តិចផងនោះ។ ការពិតទៅ ការគិតច្រើន គឺជាអារម្មណ៍ប្រក្រតីរបស់មនុស្សទូទៅ គ្រាន់តែថា នៅពេលដែលវាកើតឡើងហើយ អ្នកគួរតែកម្ចាត់គំនឹតទាំងអស់នោះចោល ហើយបែរមកចាប់អារម្មណ៍ពីវិធីដែលនឹងធ្វើឱ្យស្នេហារបស់អ្នកទាំង២ ល្អប្រសើរឡើងវិញ ទើបវាប្រសើរជាង។
៣- មិនគួរសង្ស័យគូស្នេហ៍ឡើយ
អារម្មណ៍ប្រចែប្រចណ្ឌ ច្រើនតែកើតឡើងនៅពេលមានអ្នកដទៃព្យាយាមចូលមកស្និទ្ធស្នាលជាមួយគូស្នេហ៍របស់ខ្លួន ដែលវាក៏មិនមែនជារឿងចម្លែកអ្វីដែរ បើសិនជាអ្នកកើតក្តីសង្ស័យថា តើពួកគេ ២នាក់នោះ មានអារម្មណ៍អ្វីពិសេសរវាងគ្នា ឬក៏អត់? តែវាប្រហែលជារឹតតែល្អជាងទៅទៀត បើសិនជាអ្នកបញ្ឈប់ការសង្ស័យលើទង្វើនោះ ហើយសាកល្បងសួរនាំរឿងរ៉ាវទាំងនោះអំពីគូស្នេហ៍របស់ខ្លួនដោយត្រង់ៗវិញ។
៤- ជឿជាក់លើខ្លួនឯង
ចាប់ផ្តើមដោយការនិយាយជាមួយខ្លួនឯង និងប្រាប់ខ្លួនឯងថា ការប្រចែប្រចណ្ឌ វាគ្រាន់តែជាអារម្មណ៍មួយ ដែលគួរតែលុបវាចោលទៅ និងមិនគួរឱ្យមានអារម្មណ៍បែបនេះកើតមានឡើងទៀតឡើយ។ វិធីនេះ ក្រៅពីជួយឱ្យអ្នកមានអារម្មណ៍ជឿជាក់លើខ្លួនឯងថា ខ្លួនអ្នកមានតម្លៃចំពោះសេចក្តីស្នេហា ដែលគេប្រគល់ឱ្យហើយ នៅជួយឱ្យសម្ព័ន្ធភាពស្នេហ៍របស់អ្នក មានភាពរឹងមាំស្ថិតស្ថេរ និងផ្អែមល្ហែមឡើងទៀតផង។
៥- បញ្ឈប់អារម្មណ៍ប្រចណ្ឌហួងហែង
ក្រៅពីនេះ អារម្មណ៍ប្រចណ្ឌ ថែមទាំងនាំមកនូវទង្វើ និងពាក្យសម្ដីក្រេវក្រោធ ដែលចេញពីអារម្មណ៍ពេញដោយទោស: និងកំហឹង និងមានជាច្រើនដងណាស់ ដែលវានឹងនាំយើងឆ្ពោះទៅរកការឈ្លោះទាស់ទែងគ្នា ដូច្នេះ បើសិនជាអាចទៅរួច គួរបញ្ឈប់អារម្មណ៍នេះតាំងពីដើមទី ទើបជាការប្រសើរ។
យើងជឿថា មានមនុស្សចំនួនមិនតិចទេ ដែលមានអារម្មណ៍សប្បាយចិត្ត នៅពេលដែលបានដឹងថា គូស្នេហ៍មានអារម្មណ៍ប្រចណ្ឌ និងហួងហែងចំពោះខ្លួនយើង ព្រោះវាជាការបង្ហាញឱ្យដឹងថា គេនៅតែស្រឡាញ់យើងជានិច្ច តែអ្វីៗទាំងអស់នេះ ទាំងការគិត ទាំងទង្វើ និងពាក្យសម្ដី គួរតែស្ថិតក្នុងរង្វង់នៃភាពសមល្មម មិនបង្ហាញអាការហួងហែង ប្រចណ្ឌជ្រុលហួសហេតុពេក រហូតធ្វើឱ្យគូស្នេហ៍មានអារម្មណ៍ថា ដូចជាត្រូវរងការគាបសង្កត់ ឬសាងនូវភាពទើសទាល់ធុញទ្រាន់ដល់រូបគេ រហូតដល់ក្លាយជារឿងរ៉ាវធំដុំ លែងអាចដោះស្រាយបាននោះឡើយ៕
