ព្រះសីហនុ៖ ប្រធានគណបក្សសង្គ្រោះជាតិ ខេត្តព្រះសីហនុ បានទទួលស្គាល់ថា មានសមាជិក របស់ខ្លួនម្នាក់ មានតួនាទីជាចៅសង្កាត់រងទី២ សង្កាត់លេខ៣ ក្រុងព្រះសីហនុ ស្ថិតក្នុងចំណោមសមាជិកក្រុមប្រឹក្សា មេឃុំចៅសង្កាត់ទាំង៦៣រូប ដែលជាប់ការបោះឆ្នោតនាពេលកន្លងមកទៅ បានទៅចុះចូលជាមួយគណបក្សប្រជាជនកម្ពុជាកំពុងកាន់អំណាច។
លោក សុខ សាវ៉ាត ប្រធានគណៈកម្មាធិការប្រតិបត្តិគណបក្សសង្គ្រោះជាតិ ប្រចាំខេត្តព្រះសីហនុ ផ្តល់សម្ភាសឲ្យអ្នកយកព័ត៌មាន cen.com.kh ប្រចាំខេត្តព្រះសីហនុ ដឹងនៅថ្ងៃពុធ ទី៨ ខែវិច្ឆិកាឆ្នាំ២០១៧ថា លោកបានទទួលលិខិតលាឈប់ពីគណបក្សសង្គ្រោះជាតិ របស់ លោក អ៊ុក សារាយ ចៅសង្កាត់រងទី២ តាមរយៈការបាញ់ផ្ញើជូនមករូបលោក តាមបណ្តាញសង្គមWhatsApp ដោយ លោក អ៊ុក សារាយ មិនបានយកពាក្យសុំលាឈប់នោះ មកប្រគល់ជូនលោកផ្ទាល់ដៃទេ។
លោក សុខ សាវ៉ាត បានចាត់ទុកការចាកចេញពីគណបក្សសង្គ្រោះជាតិ របស់ អតីតចៅសង្កាត់រងទី២ សង្កាត់លេខ៣ មកពីកូតាគណបក្សសង្គ្រោះជាតិ ជាកូនចៅ ទៅចុះចូលជាមួយគណបក្សប្រជាជនកម្ពុជា ថាជាសិទ្ធិ របស់បុគ្គលម្នាក់ៗ ហើយរូបលោកមិនមានអ្វីអត្ថាធិប្បាយជំនួសអ្នកចាកចេញនោះទេ។
នៅក្នុងពាក្យសុំលាឈប់ ពីគណបក្សសង្គ្រោះជាតិ ចុះថ្ងៃទី៦ ខែវិច្ឆិកា ឆ្នាំ២០១៧ មានស្នាមផ្តិតមេដៃ លោក អ៊ុក សារាយ អតីតប្រធានគណៈកម្មាធិការប្រតិបត្តិសង្កាត់លេខ៣ គណបក្សសង្គ្រោះជាតិ និងជាអតីតចៅសង្កាត់រងទី២ សង្កាត់លេខ៣ ក្រុង-ខេត្តព្រះសីហនុ គោរពជូន លោក សុខ សាវ៉ាត ប្រធានគណៈកម្មាធិការប្រតិបត្តិគណបក្សសង្គ្រោះជាតិ ខេត្តព្រះសីហនុ។ លោក អ៊ុក សារាយ បានរៀងរាប់ ដោយយោងតាមសភាពការបច្ចុប្បន្ន គណបក្សសង្គ្រោះជាតិ នឹងត្រូវរលាយពីគណបក្សនយោបាយនៅពេលដ៏ខ្លីខាងមុខនេះ ហើយរូបលោកមានបំណងចង់នៅបំរើប្រជាពលរដ្ឋនៅក្នុងមូលដ្ឋានសង្កាត់លេខ៣ ក្រុង-ខេត្តព្រះសីហនុជាបន្តទៀត ទើបរូបលោក អ៊ុក សារាយ បានសម្រេចចិត្តសុំចាកចេញ ពីគណបក្សសង្គ្រោះជាតិ មកចូលរួមជីវភាពនយោបាយ ជាមួយគណបក្សប្រជាជនកម្ពុជាវិញ ចាប់ពីថ្ងៃខ្ញុំផ្តិតស្នាមមេដៃ គឺថ្ងៃទី៦ ខែវិច្ឆិកា ឆ្នាំ២០១៧នេះតទៅ។
ចំណែកពាក្យសុំចូលរួមរស់ជាមួយ គណបក្សប្រជាជនកម្ពុជា ចុះថ្ងៃទី៦ ខែវិច្ឆិកាឆ្នាំ២០១៧ មានផ្តិតស្នាមមេដៃ លោក អ៊ុក សារាយ គោរពជូន លោក ជួន ណារិន្ទ ប្រធានក្រុមការងារគណបក្សប្រជាជនកម្ពុជា ខេត្តព្រះសីហនុ និងជាស្នងការនគរបាលខេត្តព្រះសីហនុ។ លោក អ៊ុក សារាយ បានរៀបរាប់ថា ពីមុនរូបខ្ញុំមិននឹកស្មានថា ការតស៊ូដណ្តើមអំណាចតាមរយៈការបោះឆ្នោត និងតាមរបៀបលទ្ធិប្រជាធិបតេយ្យពិតប្រាកដ ប៉ុន្តែក្រោយពីបានឃើញឃ្លីប វីដេអូ Video និងសកម្មភាពជាក់ស្តែង ការញុះញង់បំបែកបំបាក់ខ្មែរជាពីរ ដែលលោក កឹម សុខា និងគណបក្សសង្គ្រោះជាតិ សុខចិត្តអោនក្បាលបំរើបរទេស គឺដើម្បីតែអំណច មិនគិតពីមហន្តរាយ របស់ជាតិមាតុភូមិនេះហើយជាអំពើក្បត់ជាតិ។
ផ្តើមពីបញ្ហានេះ លោក អ៊ុក សារាយ បានបញ្ជាក់ថា សម្រេចចិត្តសុំចូលរួមរស់ជីវភាពជាមួយគណបក្សប្រជាជនកម្ពុជាវិញ។
ខាងក្រោមនេះ គឺជាពាក្យសុំលាឈប់ពីគណបក្សសង្គ្រោះជាតិ និងពាក្យសុំចូលរួមរស់ជាមួយគណបក្សប្រជាជនកម្ពុជា របស់ លោក អ៊ុក សារាយ អតីតចៅសង្កាត់រងទី២ សង្កាត់លេខ៣ ក្រុង-ខេត្តព្រះសីហនុ ដែលបានចុះចូលជាមួយគណបក្សប្រជាជនកម្ពុជា៕ ដោយ៖ សត្យា