វីដេអូមួយពីតំបន់ Boading ខេត្ត Hebei ភាគខាងជើងនៃប្រទេសចិន បានកំពុងរីករាលយ៉ាងលឿននៅលើបណ្តាញសង្គម ដោយបង្ហាញឲ្យពីទិដ្ឋភាពគួរឲ្យភ្ញាក់ផ្អើល ខណៈដែលរថយន្តពណ៌ទឹកប្រាក់ Hyundai Sonata កំពុងត្រូវបានគេដាក់បញ្ចុះសន្សឹមៗទៅក្នុងផ្នូរដ៏ធំមួយ ។
យោងតាម China Daily បុរសដែលបានស្លាប់ទៅនេះ ត្រូវបានគេនិយាយថា កាលនៅរស់ គាត់ពិតជាស្រលាញ់រថយន្តមួយនេះរបស់គាត់ខ្លាំងណាស់ ហេតុនេះ នៅពេលគាត់ស្លាប់ទៅ គាត់បានផ្តាំផ្ញើគ្រួសាររបស់គាត់ថា សូមដាក់គាត់នៅក្នុងរថយន្តនេះជំនួសឲ្យមឈូស ។
ជាក់ស្តែង ក្នុងថ្ងៃចុងក្រោយនៃពិធីបញ្ចុះសពរបស់គាត់ ក្រុមគ្រួសារបានជួលអេស្កាវ៉ាទ័រ ដើម្បីសួច «រថយន្តមឈូស» របស់បុរសនោះ ទម្លាក់ចុះក្នុងរណ្តៅផ្នូរដ៏ធំ ស្ថិតនៅទីបញ្ចុះសពមួយនាជាយភូមិរបស់ពួកគេ ៕ ឧត្តម
