Thursday, March 28, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

ប្រជាពលរដ្ឋ​កុំ​បោះ​សំណល់ ឬ​ថង់ប្លាស្ទិក​ចោលទៅ​ក្នុង​បរិស្ថាន ព្រោះ​សារធាតុ​គីមី បង្ក​ឲ្យ​ប៉ះពាល់​ដល់​សុខភាព​

spot_img

​ភ្នំពេញ ​៖ ស្របគ្នា​នឹង​ពិធី​អបអរសាទរ​ទិវា​បរិស្ថាន​ជាតិ និង​បរិស្ថាន​ពិភពលោក ៥ មិថុនា ឆ្នាំ​២០១៨ នា​ថ្ងៃ​អង្គារ ទី​៥ ខែមិថុនា ឆ្នាំ​២០១៨ ក្រសួង​បរិស្ថាន បាន​សហការ​ជាមួយ​ក្រសួង​អប់រំ យុវជន និង​កីឡា ប្រកាស​បើក​យុទ្ធនាការ “​រួម​គ្នា​កាត់បន្ថយ​ប្លា​ស្ទិក​” តាមរយៈ​ការបញ្ជ្រាប​ការយល់ដឹង​បរិស្ថាន​នៅ​តាម​សាលារៀន​។​

​ព្រឹត្តិការណ៍​ដ៏​មាន​សារសំខាន់​នេពេលនេះ រៀបចំឡើង​ដោយ​នាយកដ្ឋាន​ព័ត៌មាន និង​ផ្សព្វផ្សាយ​បរិស្ថាន បាន​ប្រព្រឹត្តទៅ​នៅ​វិទ្យាល័យ​ហ៊ុន សែន ប៊ុន រ៉ានី ផ្សារ​ដើមផ្កូវ រាជធានី​ភ្នំពេញ​ដោយ​មាន​ការចូលរួម ពី លោក ស៊ូ សូវុធ អនុរដ្ឋលេខាធិការ​ក្រសួង​បរិស្ថាន និង​លោកស្រី សឿ សុជាតា អនុរដ្ឋលេខាធិការ​ក្រសួង​អប់រំ យុវជន និង​កីឡា រួម​ជាមួយ​តំណាង​ក្រសួង ស្ថាប័ន​ពាក់ព័ន្ធ អាជ្ញាធរ​រាជធានី​ភ្នំពេញ ដល់​លោកគ្រូ អ្នកគ្រូ សិស្សានុសិស្ស ។​

​លោកស្រី ងិន លី​ណា អគ្គនាយក នៃ​អគ្គនាយកដ្ឋាន​ចំណេះដឹង និង​ព័ត៌មាន​បរិស្ថាន ក្រសួង​បរិស្ថាន បានឱ្យដឹងថា វេទិកា​នា​ថ្ងៃនេះ ប្រារព្ធ​ឡើង​ដើម្បី​បង្កើន​ការយល់ដឹង​ដល់​សាធារណជន​អំពី​បញ្ហា​បរិស្ថាន ជាពិសេស​ការប៉ះពាល់​នៃ​ប្លា​ស្ទិក​ចំពោះ​បរិស្ថាន និង​សុខភាព​មនុស្ស​។ លោកជំទាវ​បាន​បញ្ជាក់​ដែរ​ថា ការងារ​សំខាន់​របស់​យើងទាំងអស់គ្នា គឺ​រួម​គ្នា​ទទួលខុសត្រូវ​លើ​បញ្ហា​បរិស្ថាន គប្បី​យកចិត្តទុកដាក់​កាត់បន្ថយ​ការប្រើប្រាស​ថង់ប្លាស្ទិក ចូលរួម​ការពា​រធន​ធាន​ធម្មជាតិ ជីវៈចម្រុះ ដើម្បី​ការរស់នៅ​ប្រកបដោយ​ចីរភាព។​

លោកស្រី សឿ សុជាតា មានប្រសាសន៍ថា ការបញ្ជ្រាប​ការយល់ដឹង​នៅ​តាម​សាលារៀន និង​គ្រិះស្ថានឧត្តមសិក្សា​នានា ពិតជា​មាន​សារសំខាន់​ណាស់ និង​ឆាប់​បាន​ទទួល​ជ្រួតជ្រាប​ដល់​សាធារណជន ហើយ​ការកាត់បន្ថយ​ចង់​ប្លា​ស្ទិក គឺ​ផ្តើមចេញ​ពី​យើងទាំងអស់គ្នា ដូច្នេះ​ប្អូនៗ​ជា​យុវជន សិស្សានុសិស្ស គឺជា​ចលករ​យ៉ាងខ្លាំង​ក្នុង​ការផ្សព្វផ្សាយ​ឱ្យ​កាន់តែ​ប្រសិទ្ធភាព ។​

ក្នុងឱកាស​នោះ​ដែរ​លោក ស៊ូ សូវុធ អនុរដ្ឋលេខាធិការ​ក្រសួង​បរិស្ថាន មានប្រសាសន៍ថា ការងារ​បរិស្ថាន​ជា​កិច្ចការ​ដែល​ត្រូវបាន​ពិភពលោក បាន​និង​កំពុង​យកចិត្តទុកដាក់​យ៉ាងខ្លាំង ហើយ​តម្រូវ​ឱ្យ​គ្រប់​អ្នកពាក់ព័ន្ធ​ទាំងអស់​ទាំង​ក្នុង​ក្របខ័ណ្ឌ​សហគមន៍ សង្គមជាតិ តំបន់ និង​ពិភពលោក ត្រូវ​បន្ត​ចូលរួម​ពង្រឹង​ប្រសិទ្ធភាព​ការងារ​គ្រប់គ្រង​បរិស្ថាន និង​ធនធានធម្មជាតិ ដោយ​ខិតខំ​រិះរក​វិធានការ និង​ដំណោះស្រាយ​ឱ្យបាន​សមស្រប ដើម្បី​រក្សា​ឱ្យបាន​នូវ​សុវត្ថិភាព​នៃ​ភពផែនដី វឌ្ឍនភាព​សង្គម និង​ការរស់នៅ​ដោយ​ចីរភាព ។​

ក្នុងឱកាស​នោះ​ដែរ លោក ស៊ូ សូវុធ បាន​លើកទឹកចិត្ត​ដល់​មន្ត្រីរាជការ លោកគ្រូ អ្នកគ្រូ សិស្សានុសិស្ស និង​ប្រជាពលរដ្ឋ​កុំ​បោះ​សំណល់ ឬ​ថង់ប្លាស្ទិក​ចោលទៅ​ក្នុង​បរិស្ថាន ព្រោះ​សារធាតុ​គីមី នៅក្នុងប្លា​ស្ទិក អាច​បង្ក​ឱ្យ​មាន​ការបំពុល​ដល់​គុណភាព​ដី គុណភាព​ទឹក និង​មាន​គ្រោះថ្នាក់​ដល់​ប្រព័ន្ឋ​អេកូឡូស៊ី ជាពិសេស​ជីវៈចម្រុះ​នៅក្នុង​ទឹក អាច​ច្រលំ​ថា​ជា​ចំណី​ហើយ​លេប​ចូល និង​ជាតិពុល​នេះ​អាច​ជ្រៀត​ចូលទៅ​ក្នុង​ខ្លួន​មនុស្ស​នៅ​ពេល​ដែល​យើង​បរិភោគ​វា​ចូលទៅ និង សូម​កុំ​ដុត​ថង់ប្លាស្ទិក ព្រោះ​វា​នឹង​ភាយ​ឧស្ម័ន​ពុល ដែល​ធ្វើឱ្យ​ប៉ះពាល់​ស្រទាប់​អូហ្សូន​យើង ។​

ជាមួយគ្នានេះ លោក​បាន​ជំរុញ​ឱ្យ ទិវា​នេះ​មាន​នៅក្នុង​ប្រតិទិន​ប្រចាំឆ្នាំ ដោយ​មន្ទីរ​បរិស្ថាន​នៅតាម​បណ្តា​រាជធានី​-​ខេត្ត ធ្វើ​ការសហការ​ជាមួយ អាជ្ញាធរ​ដែនដី និង​បំផុស​ចលនា​មហាជន​ឱ្យ​រៀបចំ​ព្រឹត្តិការណ៍​នេះ ទៅតាម​ទីតាំង​នានា​។​

សូមបញ្ជាក់ថា​នៅក្នុង​ពិធី​អបអរសាទរ​ទិវា​បរិស្ថាន​ជាតិ និង​ទិវា​បរិស្ថាន​ពិភពលោក ៥ មិថុនា​ឆ្នាំ​២០១៨​នេះ ក្រសួង​បរិស្ថាន​បាន​ប្រកាស​បើក យុទ្ធនាការ “​រួម​គ្នា​កាត់បន្ថយ​ប្លា​ស្ទិក​”​។ យុទ្ធនាការ​នេះ​មាន គោលបំណង​បំផុស​ចលនា​ទូលំទូលាយ​កាត់បន្ថយ​ប្លា​ស្ទិកនៅ​កម្ពុជា តាម​គោលការណ៍​ស្ម័គ្រចិត្ត ក៏ដូចជា​ជំរុញ​ការអនុវត្ត​អនុក្រឹត្យ​របស់​រាជរដ្ឋាភិបាល លេខ ១៦៨ អនក្រ​.​បក ចុះ​ថ្ងៃ​ទី​១០ ខែតុលា ឆ្នាំ​២០១៧ ស្តីពី​ការគ្រប់គ្រង​ថង់ប្លាស្ទិក​ផងដែរ​៕​ ដោយ ​៖​ បញ្ញា​ស័ក្តិ​

spot_img
×