នេះជាខណៈពេលស្លុតរន្ធត់មួយ ដែលធ្វើឲ្យបុរស២នាក់ភ័យស្លន់ស្លោព្រលឹងចុងសក់តែម្តង ខណៈកំពុងធ្វើដំណើរនៅលើដងផ្លូវសុខៗ ស្រាប់តែអាគុយម៉ូតូអគ្គិសនីរបស់ពួកគេ ផ្ទុះឆេះភ្លើងសន្ធោសន្ធៅតែម្តង ។
យោងតាមប្រភពព័ត៌មាន បានឲ្យដឹងថា ហេតុការណ៍ដ៏ភ្ញាក់ផ្អើលនេះ បានកើតឡើងកាលពីថ្ងៃទី៤ មិថុនា ស្ថិតនៅតាមបណ្តោយផ្លូវមួយកន្លែងនៅក្នុងប្រទេសចិន ។ វីដេអូឃ្លីបពីកាមេរ៉ាសន្តិសុខដងផ្លូវ ពីហេតុការណ៍ផ្ទុះអាគុយឆេះម៉ូតូនេះផងដែរ ក៏បានបង្ហាញឲ្យឃើញបុរសជាអ្នកបើកបរបានស្រវាស្ទុះចេញពីម៉ូតូយ៉ាងលឿនដោយសុវត្ថិភាព ប៉ុន្តែ បុរសម្នាក់ទៀតអង្គុយខាងក្រោយបានរងរបួស ដោយសារលោតចុះពុំទាន់ពេលវេលា ។
ឆ្លើយតបនឹងហេតុការណ៍ពុំនឹកស្មានដល់នេះ ប៉ូលីសចរាចរណ៍ប្រចាំតំបន់ ក៏បានគ្រប់គ្រងពន្លត់ភ្លើងឆាបឆេះម៉ូតូដ៏ខ្លាំងក្លានោះ និងបញ្ជូនជនរងគ្រោះទៅកាន់មន្ទីរពេទ្យស្ថិតនៅក្បែរកន្លែងកើតហេតុផងដែរ ៕ ឧត្តម
