ភ្នំពេញ ៖ ចៅក្រមស៊ើបសួរ សាលាដំបូងរាជធានីភ្នំពេញ ប៊ុន ធី កាលពីថ្ងៃទី៤ខែមិថុនា បានចេញដីកាបង្គាប់ឲ្យចាប់ខ្លួន មន្ត្រីនគរបាលម្នាក់ ដែលបានក្លែងតួនាទីជាទីប្រឹក្សា ឆបោកក្រុម អ្នកវិនិយោគជនជាតិថៃ អស់ប្រាក់ជាង២លានដុល្លារ ក្រោមរូបភាពថា យកប្រាក់នេះមកវិនិយោគបើកក្រុមហ៊ុននៅកម្ពុជា។
ចៅក្រមស៊ើបសួរ បានបញ្ជាក់ថា ជនត្រូវចោទឈ្មោះ សារិន រ៉ាត់ណាត់ដាណៃ ភេទប្រុស អាយុ៣៥ឆ្នាំ ជាតិខ្មែរ មុខរបរមន្ត្រីនគរបាល ទីកន្លែងកំណើតភូមិ៥ សង្កាត់៤ ក្រុងព្រះសីហនុ ខេត្តព្រះសីហនុ ទីលំនៅបច្ចុប្បន្ន ផ្ទះលេខ៥៩អាយ ផ្លូវលេខ២០៩បេ ភូមិ៤ សង្កាត់ច្រាំងចំរេះ១ ខណ្ឌឫស្សីកែវ រាជធានីភ្នំពេញ ។ ជននេះ ត្រូវដាក់ឲ្យស្ថិតនៅក្រោមការពិនិត្យពីបទ “មិនបំពេញកាតព្វកិច្ចចំពោះឧបករណ៍អាចជួញដូរបាន” ដែលបានប្រព្រឹត្តនៅរាជធានីភ្នំពេញ កាលពីថ្ងៃទី១៣ ខែធ្នូ ឆ្នាំ២០១៧ បទល្មើសព្រហ្មទណ្ឌដែលមានចែកឲ្យផ្តន្ទាទោសតាមមាត្រា ៣២១ នៃច្បាប់ស្តីពីឧបករណ៍អាចជួញដូរបាន និងប្រតិបត្តិការទូទាត់សងប្រាក់។ តុលាការបានចេញដីការបង្គាត់ឲ្យចូលខ្លួនម្តងរួចមកហើយតែជនត្រូវចោទមិនបានមកតាមការកំណត់របស់តុលាការនោះទេ។ តំណាងអយ្យការបានឯកភាពឲ្យចៅក្រមស៊ើបសួរចេញដីការបង្គាត់ឲ្យចាប់ខ្លួនឈ្មោះ សារិន រ៉ាត់ណាត់ដាណៃ តាមនីតិវិធី។ ដូច្នេះសម្រេចបង្គាប់ឲ្យចាប់ជនត្រូវចោទរូបនេះ និងបានបញ្ជាឲ្យកងកម្លាំងសាធារណៈ ស្រាវជ្រាវរកចាប់ខ្លួន និងនាំខ្លួនឈ្មោះនេះ មកប្រគល់ជូនសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់។
បុគ្គលខាងលើនេះធ្លាប់ត្រូវបាន លោកស៊ិន វិរៈ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ចេញដីកាបញ្ជាឲ្យចូលខ្លួនចុះថ្ងៃទី២៧ ខែធ្នូ ឆ្នាំ២០១៧ កន្លងទៅ បំភ្លឺនៅនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ ដើម្បីសាកសួរលើករណី គំរាមថានឹងសម្លាប់ បរិហារបង្កាច់កេរ្តិ៍ ប្រើប្រាស់ឯកសារក្លែង និងឆបោកប្រាក់ តាមពាក្យបណ្តឹងរបស់ឈ្មោះ សិទ្ធិសាក់ មហាសិទ្ធីវ៉ាដ ដែលតំណាងឲ្យក្រុមអ្នកវិនិយោគជនជាតិថៃ។
បើតាមអ្នកវិនិយោគជនជាតិថៃ បានឲ្យដឹងថា បុគ្គលខាងលើនេះ ក៏កំពុងរងពាក្យបណ្តឹងពីអ្នកវិនិយោគជនជាតិថៃផ្សេង នៅប្រទេសថៃ ហើយតុលាការនៅប្រទេសថៃ ក៏កំពុងស្វែងរកចាប់ខ្លួនបុគ្គលនេះផងដែរ។
ក្រុមអ្នកវិនិយោគថៃ បានធ្វើការអំពាវនាវដល់សាធារណជន បើសិនជាបានឃើញបុគ្គលរូបនេះ ហើយរាយការណ៍ជូនសមត្ថកិច្ចផង ពួកគេនឹងជូនជាសាគុណជាទឹកប្រាក់ជាច្រើនគួរជាទីគាប់ចិត្ត៕ ដោយ៖បញ្ញាស័ក្តិ
