រឿងស្នេហា ពេលខ្លះពិបាកយល់ណាស់ បើស្រឡាញ់ហើយ អ្វីៗក៏ព្រមដែរ!! តែ ចុះបើចង់ឱ្យគូស្នេហ៍ស្រឡាញ់យើងយូរអង្វែងវិញនោះ តើត្រូវធ្វើយ៉ាងណា? ធ្លាប់គិតដែរទេថា ពេលខ្លះមូលហេតុ ដែលធ្វើឱ្យឈ្លោះគ្នាញឹកញាប់នោះ អាចដោយសារតែខ្លួនយើងមានចំណែកដែរទេដឹង? ដូច្នេះបើចង់ឱ្យជីវិតគូ មិនសូវមានជម្លោះ និងជីវិតអាពាហ៍ពិពាហ៍ស្ថិតស្ថេរគង់វង្ស នៅជាមួយយើងយូរអង្វែងរហូតទៅនោះ រឿងតទៅនេះមិនគួរធ្វើជាដាច់ខាត…
១-ប្រចែប្រចណ្ឌគ្មានហេតុផល
រឿងនេះសំខាន់ណាស់សម្រាប់គ្រប់គូស្នេហ៍ បើជឿជាក់ក្នុងចិត្តថា រូបអ្នកមានគុណតម្លៃស័ក្តិសម និងស្រឡាញ់គេតាមដែលអាចស្រឡាញ់បាន ហើយគេក៏ស្រឡាញ់អ្នកវិញដែរនោះ តើហេតុអីអ្នកចាំបាច់ត្រូវប្រចែប្រចណ្ឌរូបគេបែបគ្មានហេតុផលធ្វើអី? គួរតែមានភាពជឿជាក់លើគ្នាទៅវិញទៅមកឱ្យច្រើន ទើបល្អ។
២-និយាយអាក្រក់ពីបុព្វការី
ទោះជាគេតវ៉ា ឬរអ៊ូរទាំឱ្យអ្នកស្តាប់ពីរឿងរ៉ាវផ្សេងៗក្នុងក្រុមគ្រួសាររបស់គេក៏ដោយ តែមិនមែនមានន័យថា អ្នកអាចនិយាយអ្វី ឬមានយោបលអ្វី អំពីមនុស្សក្នុងក្រុមគ្រួសាររបស់គេបានដែរ ជាពិសេសនិយាយពីបុព្វការីរបស់គេ ក្នុងន័យអវិជ្ជមាន ព្រោះវានឹងហុចផលអាក្រក់ដល់រូបអ្នកខ្លួនឯង ហើយអ្នកខ្លួនឯងក៏មិនចង់ឱ្យគូស្នេហ៍និយាយ ឬគិតក្នុងន័យអវិជ្ជមានជាមួយក្រុមគ្រួសាររបស់អ្នកដែរ។
៣-កុំខុសសម្ដីខ្លួនឯង
មនុស្សប្រុសមិនត្រូវខុសសម្ដីខ្លួនឯងឡើយ ឯមនុស្សស្រី ក៏មិនខុសគ្នាដែរ។ បើណាត់គ្នាពេលណា ក៏គួរតែទៅឱ្យត្រូវពេល ឬយឺតបន្តិចបន្តួចក៏មិនអីដែរ ឬបើប្រាប់ថានឹងទូរស័ព្ទរក ក៏គួរតែទូរស័ព្ទទៅ ព្រោះការខុសសម្ដីខ្លួនឯង អាចបង្ហាញឱ្យដឹងថា អ្នកជាមនុស្សដែលមិនខ្វល់ពីអារម្មណ៍អ្នកដទៃ ហើយវានឹងហុចផលមិនល្អដល់សម្ព័ន្ធភាពរបស់អ្នកយ៉ាងពិតប្រាកដ។
៤-របៀបរបបច្រើនពេក
រឿងនេះ គឺជារឿងធ្ងន់ធ្ងរណាស់សម្រាប់សម្ព័ន្ធភាពស្នេហ៍។ បុរសៗ ច្រើនតែមិនសូវចេះទ្រាំចំពោះភាពរបៀបរបប និងរឿងច្រើនរបស់ស្រ្តីទេ។ ដំបូងៗពេលស្នេហានៅផ្អែមល្ហែម ក៏ធ្វើជាមិនយកចិត្តទុកដាក់ និងទទួលយកបានទាំងអស់ តែនៅពេលដែលពេលវេលានៃការសម្របខ្លួនឱ្យចូលគ្នាចប់អស់ហើយ ហើយភាពរបៀបរបបច្រើន មានវិន័យតឹងរ៉ឹងច្រើន រឿងច្រើន បែរជាកើនឡើង ទៅជារអ៊ូឥតឈប់ រអ៊ូគ្រប់រឿង ពេលនោះប្រហែលជាគ្មាននរណាចង់ស្តាប់ និងធ្វើតាមឡើយ។
៥-ខឹងសម្បាមិត្តភក្តិរបស់ស្វាមី ឬភរិយា
មុនពេលដែលគេស្គាល់រូបអ្នក គេមានក្រុមមិត្តភក្តិរបស់គេ មានភាពជិតដិតស្និទ្ធស្នាលខ្លាំងជាងរូបអ្នកច្រើនណាស់។ ដូច្នេះអ្នកគួររៀនយល់ដឹងអំពីវិធីក្នុងការចូលទៅរកក្រុមមិត្តភក្តិរបស់គេ បើសិនជាវាមិនធ្ងន់ធ្ងរពេកទេនោះ ហើយវិធីដែលល្អបំផុតនោះគឺ ព្យយាមធ្វើខ្លួនឱ្យសប្បាយរីករាយជាមួយអ្វីដែលគេធ្វើវិញប្រសើរជាង។
៦-បំផ្លាញជំនឿទុកចិត្ត
ការភូតកុហកប្រភេទ White lie ពេលខ្លះក៏បានលទ្ធផលដែរ តែពេលខ្លះបើនិយាយគ្នាត្រង់ៗបាន ក៏គួរតែនិយាយ ព្រោះបុរសៗ ច្រើនតែមិនគិតច្រើនដូចនារីៗទេ ព្រោះបុរសៗពេលខ្លះមិនបានយកចិត្តទុកដាក់នឹងអ្វីដែលនារីៗធ្វើប៉ុន្មានឡើយ។ ដូច្នេះបើមានអ្វី គួរតែនិយាយគ្នាត្រង់ៗទៅ ប្រសើរជាងការភូតកុហក ដែលបើថ្ងៃក្រោយបែកការណ៍ វានឹងមានផលប៉ះពាល់ដល់សម្ព័ន្ធជីវិតគូយ៉ាងពិតប្រាកដ។
៧-បន្ទោសតែគេគ្រប់យ៉ាង
អ្នកខ្លួនឯងអាចនឹងមិនដឹងខ្លួនថា ពេលរស់នៅជាមួយគ្នា ហើយមានអ្វីខុសឆ្គង អ្នកតែងតែតវ៉ាបន្ទោសគេ និងពេលខ្លះក៏បន្ទោសតវ៉ាហួសហេតុពេកទៀតផង។ សម្ព័ន្ធភាពដែលល្អ គឺការជួយគ្នាដោះស្រាយ កែបញ្ហា មិនថាអ្នកណាខុសក៏ដោយ។ ខឹងចុះ ខឹងបាន តែកុំឱ្យយូរពេក បន្ទាប់ពីនោះក៏ងាកមកនិយាយគ្នា ដើម្បីកែបញ្ហា នោះគ្រប់យ៉ាងនឹងល្អប្រសើរឡើងវិញមិនខាន។
៨-កុំព្យាយាមផ្លាស់ប្តូរ កែចរិតនិស្ស័យរបស់គេ
តើអ្នករៀបការជាមួយគេព្រោះអ្វី និងតើគេរៀបការជាមួយអ្នកព្រោះអ្វី? ចូរសម្លឹងរកមើលចំណុចនោះឱ្យបានជាប់ជានិច្ច ព្រោះការបានរួមរស់នឹងគ្នា វាច្បាស់ជាមានការសម្របសម្រួលខ្លួនចូលរកគ្នាមិនខាន តែកុំភ្លេចថា ការសម្របសម្រួលខ្លួន មិនមែនជាការផ្លាស់ប្តូរទាំងអស់នោះទេ និងសំខាន់បំផុត កុំប្រៀបធៀបគូស្នេហ៍របស់អ្នក ទៅនឹងបុរសណាផ្សេងឱ្យសោះ។
៩-មិនដែលនិយាយល្អជាមួយគេ
មនុស្សឆ្លាត តែងតែធ្វើជាអ្នកស្តាប់ច្រើនជាងនិយាយ ហើយបើនិយាយ នឹងច្រើនតែមានពាក្យដែលឆ្លាតៗចេញមកជានិច្ច។ បើអ្នកឈ្លោះគ្នា ចូរចៀសវាងការនិយាយបន្តជម្លោះ បើសិននរណាម្នាក់អាចត្រជាក់បាន រឿងដែលឈ្លោះគ្នានោះនឹងកាន់តែឆាប់ចប់ឡើង។ ចូរកុំភ្លេចថា ការផ្តល់កិត្តិយសដល់គ្នាទៅវិញទៅមក គឺជារឿងសំខាន់ក្នុងជីវិតគូរបស់មនុស្សគ្រប់រូប ការនិយាយជាមួយគ្នាល្អៗ ច្បាស់ជាហុចផលល្អក្នុងរយៈពេលយូរមិនខាន៕
