ភ្នំពេញៈ គ្រូបង្រៀនម្នាក់រស់នៅភូមិឫស្សីស្រុក២ ឃុំឈើទាល ស្រុកគៀនស្វាយ ខេត្តកណ្តាល បានចោទប្រកាន់ក្រុមហ៊ុនវឌ្ឍនៈរំលោភយកដីខ្លួន និងបានសុំអន្តរាគមន៍ពីសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងសម្តេចកិត្តិព្រឹទ្ធបណ្ឌិត ជួយអន្តរាគមន៍ករណីក្រុមហ៊ុនវឌ្ឍនៈ បានចាក់ដីរំលោភលើដីរបស់គាត់។
ចំណែកអភិបាលខេត្តកណ្តាល បានឲ្យប្រជាពលរដ្ឋម្ចាស់ដីយកឯកសារមករដ្ឋបាលខេត្ត ដើម្បីមន្ត្រីជំនាញពិនិត្យ។
គ្រូបង្រៀនដែលជាម្ចាស់ដីឈ្មោះ សេក សិទ្ធិ បានរៀបរាប់ថា “កើតទុក្ខមិនសុខចិត្តដោយសារតែក្រុមហ៊ុន រំលោភយកដីរបស់ខ្ញុំ ហេតុអីបានខ្ញុំថារំលោភ ពីព្រោះខ្ញុំបានសុំអាជ្ញាធរភូមិ ឃុំ ស្រុក ខេត្ត និងមន្ត្រីដែនដីមន្ទីរខេត្តទៀតឲ្យចុះវាស់វែងដីឲ្យខ្ញុំ បានវាស់ពីរដងទៅបីដងដែរ តែចេះតែរំខានពីក្រុមហ៊ុន សន្តិសុខក្រុមហ៊ុនបានមកដេញស្ទាក់ពេលវាស់បាន ២ចំណុច ទៅ៣ចំណុច គឺសន្តិសុខមកដេញមិនឲ្យវាស់ និងដេញយើងមិនឲ្យចូលីតាំងដីរបស់យើងតែម្តង។ ហើយចុងក្រោយក្រុមហ៊ុនបានយកដីមកចាក់លើដីខ្ញុំ ពេលនោះខ្ញុំបានទៅឃាត់ ថែមទាំងបានប្តឹងទៅអាជ្ញាធរស្រុក ខេត្ត ក៏ផ្អាក ហើយបានមួយថ្ងៃពីរថ្ងៃគេចាក់ទៀត តែដោយសារបានចំណារពីអភិបាលខេត្តកណ្តាលគាត់ចារទៅបានជាគេលែងចាក់។ ជាដីរបស់ខ្ញុំពិតប្រាកដដោយខ្ញុំមានឯកដារត្រឹមត្រូវ…។
តែគេគ្មានដំណោះស្រាទេ ពេលចុះជាប្រព័ន្ធគាត់ថាចាំវាស់ជាប្រព័ន្ធ ដល់ពេលទៅចុះវាស់គេដេញ អយុត្តិធម៌ណាស់សម្រាប់ខ្លួនខ្ញុំ មានតែសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតទេ ដែលអាចជួយរកយុត្តិធម៌ឲ្យកូនចៅដែលមានទុក្ខជាទម្ងន់ដែលគេរំលោភលើដីខ្ញុំ។ ហើយមានចំណុចអ្វីបានជាគេហ៊ានរំលោភលើដីយើង ហើយអាជ្ញាធរដឹងឮហើយបែរជាមិនធ្វើឲ្យខ្ញុំ សូមសម្តេចជួយកូនចៅផង”។
លោកគ្រូ សេក សិទ្ធិ បានបញ្ជាក់ថា ចំពោះករណីនេះ ផ្តើមចេញលើកទី១ គឺលោកបានដាក់ពាក្យស្នើសុំចុះបញ្ជីទៅឃុំ ស្រុក និងខេត្ត គឺសុំចុះបញ្ជីតាំងពីមុនចុះជាប្រព័ន្ធ តែគេគេចវេសថ្ងៃនេះថ្ងៃនោះ។ ហើយដីគេនៅជាប់ដីលោកគេធ្វើប្លង់បាន ហើយរឿងអីដែលលោកធ្វើប្លង់មិនបាន។ ហើយដោយសារក្រុមហ៊ុនបានចាក់នៅលើដីរបស់លោក លោកក៏បានប្តឹងសុំអន្តរាគមន៍ទៅសម្តេចតេជោ ហ៊ុន សែន និងក្រសួងរៀបចំដែនដីនគរូបនីយកម្ម និងសំណង់។
លោកបានអះអាងថា “ខ្ញុំការពារដីខ្ញុំដាច់ខាត ដីនឹងខ្ញុំទិញដោយញើសឈាមរបស់ខ្ញុំ ខ្ញុំត្រូវតែរក្សាដីខ្ញុំទោះត្រូវដាក់ជីវិតក៏ខ្ញុំត្រូវតែធ្វើដែរ ខ្ញុំនឹងសង់រោងនៅលើដីខ្ញុំ ហើយកុំមករំលោភយកដីខ្ញុំ ខ្ញុំអត់ឲ្យជាដាច់ខាត ទោះជីវិតស្លាប់ក៏ខ្ញុំមិនឲ្យដែរ”។
ចំណែកលោក គង់ សុភ័ណ្ឌ អភិបាលខេត្តកណ្តាល បានបញ្ជាក់ថា “យកឯកសារមករដ្ឋបាលខេត្ត ដើម្បីមន្ត្រីជំនាញពិនិត្យ”។
រីឯលោកនូវ បេងច័ន្ទតារា អភិបាលរងខេត្តកណ្តាល បានបញ្ជាក់ថា “កំពុងស្រាវជ្រាវឯកសារនិងសម្របសម្រួលអោយគូភាគីចូលរួមដោះស្រាយ ដោយគូភាគីម្ខាងមានបណ្ណ័កម្មសិទ្ធ លុះណាគាត់ព្រមចូលរួមដោះស្រាយទើបរដ្ឋបាលខេត្តសម្របសម្រួលដោះស្រាយជូនបាន”។
ទាក់ទងករណីចោទប្រកាន់ខាងលើនេះ ក្រុមហ៊ុន វឌ្ឍនៈ មិនអាចសុំការអត្ថាធិប្បាយបានទេ នៅថ្ងៃទី០១ ខែធ្នូ ឆ្នាំ២០២២ នេះ។
គួរបញ្ជាក់ថា លោកសេក សិទ្ធិ បានដាក់លិខិតស្នើសុំសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ជួយធ្វើអន្តរាគមន៍ទៅរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ជួយឲ្យមន្ទីររៀបចំដែនដី នគរូបនីយកម្មសំណង់ និងសុរិយោដី ខេត្តកណ្តាល ចុះវាស់វែងដីមួយកន្លែងទំហំ ៣ហិកតា ៧៣អា ៤៥ម៉ែត្រការ៉េ (៣៧៣៤៥ម៉ែត្រការ៉េ) មានទីតាំងនៅភូមិឫស្សីស្រុក ២ ឃុំឈើទាល ស្រុកគៀនស្វាយ ខេត្តកណ្តាល និងសុំជួយចេញវិញ្ញាបនបត្រសម្គាល់ម្ចាស់អចលនវត្ថុ ដើម្បីមានសិទ្ធិកាន់កាប់ដីធ្លីស្របច្បាប់ជាធរមាន។
បន្ទាប់ទទួលបានលិខិតសុំអន្តរាគមន៍ ខុទ្ទកាល័យសម្តេចតេជោ ហ៊ុន សែន បានធ្វើដីកាបញ្ជូនសំណើរបស់លោក សេក សិទ្ធិ ទៅរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ពិនិត្យជាសមត្ថកិច្ចតាមការគួរ៕ រក្សាសិទ្ធិដោយៈ CEN
