ភ្នំពេញ៖ ទីប្រឹក្សាផ្ទាល់សម្តេចតេជោ និងជាប្រធានគណបក្សប្រជាជនរាជធានី បានលើកឡើងថា កន្លងមក បក្សប្រឆាំង បានប្រើបដិវត្តន៍ពណ៌ ដើម្បីផ្តួលរំលំរដ្ឋាភិបាលស្របច្បាប់។ នេះជាទង្វើល្មើសច្បាប់ ដែលត្រូវតែរំលាយចេញ ដោយច្បាប់ ហើយការបោះឆ្នោតនា ថ្ងៃទី ២៩កក្កដា២០១៨ នឹងគ្មានគណបក្សសង្គ្រោះជាតិទៀតទេ តែបណ្តាគណបក្សនយោបាយដទៃទៀត ពិតជាមានឱកាស។
ក្នុងកិច្ចប្រជុំផ្សព្វផ្សាយសភាពការណ៍ថ្មី លោក ប៉ាសុជាតិវង្ស បានបញ្ជាក់ជូន មន្ត្រីបុគ្គលិក មន្ទីរសុខាភិបាលរាជធានី ចំនួន ៦៥០នាក់ នៅទីស្នាក់ការគណបក្សប្រជាជនកម្ពុជា កាលពីថ្ងៃទី១០វិច្ឆិកា បន្ថែមទៀតថា៖ ការបោះឆ្នោតនា ថ្ងៃទី ២៩កក្កដា២០១៨ ខាងមុខនេះ នឹងគ្មានគណបក្សសង្គ្រោះជាតិទៀតទេ ។តែបណ្តាគណបក្សនយោបាយដទៃទៀត ពិតជាមានឱកាសចូលរួមប្រកួតប្រជែងដោយសុចរិត ត្រឹមត្រូវ យុត្តិធម៌ សមស្រប តាមរបបប្រជាធិបតេយ្យសេរីពហុបក្ស និង រដ្ឋធម្មនុញ្ញនៃ ព្រះរាជាណាចក្រកម្ពុជា។
លោកបន្តថា បដិវត្តព៌ណ គឺជាទង្វើខុសច្បាប់ ជាអំពើក្បត់ជាតិ វាបំផ្លាញសុខសន្តិភាព និងការអភិវឌ្ឍន៍ជាតិយ៉ាងពិតប្រាកដ បើសិនជាយើងមិនបានទុបស្កាត់ វាទាន់ពេលវេលាទេនោះ ករណីនេះថ្នាក់ដឹកនាំគណបក្សសង្គ្រោះជាតិ ត្រូវតែទទួលខុស ត្រូវនូវអំពើក្បត់របស់ខ្លួនចំពោះមុខច្បាប់ ក៍ប៉ុន្តែសំរាប់បងប្អូនជាក្រុមប្រឹក្សាគ្រប់ជាន់ថ្នាក់ និងសកម្មជន ដែលគាំទ្រគណបក្សសង្គ្រោះជាតិ គឺ មិនគ្រាន់តែ គ្មានកំហុសប៉ុណ្ណោះទេ តែបានក្លាយជាជន រងគ្រោះ ដែលត្រូវមេបក្សខ្លួនបោកប្រាស់ ប្រើជាឧបករណ៏បំរើផលប្រយោជន៍ឲ្យបរទេស ក្បត់ប្រជាជនឯង ឲ្យចូលរួមធ្វើ” បដិវត្តពណ៌” បំផ្លាញសុខសន្តិភាព និងកិច្ចអភិវឌ្ឍជាតិមាតុភូមិ។
សូមបងប្អូនកុំចាញ់បោកថ្នាក់ ដឹកនាំគណបក្ស CNRP ទៀត គណបក្សប្រជាជន បានផ្តល់ឱកាសហើយ សូមប្រញាប់មករួមជីវភាពនយោបាយជាមួយ CPP ដើម្បីបានទទួលតំណែងជាក្រុមប្រឹក្សា ឬជាមេឃុំ- ចៅសង្កាត់ ដើម្បីមានឱកាសបំរើប្រជាជនបន្តទៀត ព្រោះថា CNRP នឹងត្រូវរំលាយ ១០០% គ្មានការសង្ស័យឡើយ។
លោកប៉ា សុជាតិវង្ស ទីប្រឹក្សាផ្ទាល់សម្តេចតេជោ និងជាប្រធានគណបក្សប្រជាជនរាជធានី បានបញ្ជាក់ថាមេដឹកនាំគណបក្សសង្គ្រោះជាតិ ត្រូវតែទទួល ខុសត្រូវចំពោះទង្វើល្មើសច្បាប់របស់ខ្លួន ។ តែដោយឡែក ចំពោះបងប្អូនជាក្រុមប្រឹក្សាគ្រប់ថ្នាក់ និងសកម្មជនគាំទ្រគណបក្សសង្គ្រោះជាតិ គឺ មិនគ្រាន់តែគ្មានកំហុសប៉ុណ្ណោះទេ តែបានក្លាយជាជនរងគ្រោះ ដែលត្រូវមេបក្សខ្លួន បោកប្រាស់ ប្រើជាឧបករណ៍បំរើផលប្រយោជន៍បរទេស ក្បត់ជាតិឯង ឲ្យចូលរួមក្នុង” បដិវត្តពណ៌” បំផ្លាញសុខសន្តិភាពនិងកិច្ចអភិវឌ្ឍមាតុភូមិ។
លោក ប៉ា សុជាតិវង្ស ប្រធានគណបក្សរាជធានី បានបញ្ជាក់ថា ” ការសំរេចចិត្តរបស់អ្នកគាំទ្រគណបក្សសង្គ្រោះជាតិ វិលមករួមរស់ជីវភាពនយោបាយជាមួយគណបក្សប្រជាជនកម្ពុជា គឺពិតជាត្រឹមត្រូវ ប្រកបដោយកិត្តិយសបំផុតដើម្បីឯកភាពជាតិ រួមគ្នាបន្តការពារបុព្វហេតុ ជាតិ សាសនា ព្រះមហាក្សត្រនៃយើង ៕ ដោយ៖បញ្ញស័ក្តិ
