ភ្នំពេញ ៖ នៅរសៀលថ្ងៃទី២២ខែមិថុនាឆ្នាំ២០១៨នេះ សាលាដំបូងរាជធានីភ្នំពេញ បានចេញដីការឃុំខ្លួនស្ត្រីស្អាតម្នាក់ជាម្ចាស់ផ្ទះ សំណាក់ណារ៉ាវី ដែលជួញដូរគ្រឿងញៀនប្រភេទមេតំហ្វេតាមីន(ice) ចំនួន ១១កញ្ចប់ថង់ធំ ស្មើទម្ងន់ 736.26g។
សូមបញ្ជាក់ថា នៅថ្ងៃទី១៩ ខែមិថុនា ឆ្នាំ២០១៨ វេលាម៉ោង ១៧ និង៤០នាទី កម្លាំងជំនាញនៃមន្ទីរប្រឆាំងគ្រឿងញៀន(ក៥) បាន សហការជាមួយកម្លាំងនគរបាលប៉ុស្តិ៍បឹងទំពន់ទី១ នៃស្នងការរាជធានី ភ្នំពេញ ដោយបានការដឹកនាំសម្របសម្រួលពីលោក អ៊ុំ សុភក្កិ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បង្ក្រាបបទល្មើស ជួញដូរគ្រឿងញៀន នៅចំណុចមុខផ្ទះសំណាក់ណារ៉ាវី និងបានបន្ត ឆែកឆេរលំនៅដ្ឋាន១កន្លែង ស្ថិតនៅផ្ទះជួលេខ១៣ ផ្លូវលេខ៣បេតេ ភូមិចំរើនផល សង្កាត់បឹងទំពន់ទី១ ខណ្ឌ មានជ័យ រាជធានីភ្នំពេញ ។ ជាលទ្ធផល សមត្ថកិច្ច បានឃាត់ខ្លួនម្ចាស់ផ្ទះម្នាក់ឈ្មោះ ណៃ ផារី ភេទស្រី អាយុ ៣២ឆ្នាំ ហើយចាប់យកវត្ថុតាងរួមមាន ៖ គ្រឿងញៀនប្រភេទមេតំហ្វេតាមីន(ice) ចំនួន ១១កញ្ចប់ថង់ធំ ស្មើរទម្ងន់ 736.26g និង ជញ្ជីងអេឡិចត្រូនិចចំនួន ១ គ្រឿង ៕ ដោយ ៖ បញ្ញាស័ក្តិ
