ភ្នំពេញ៖ នៅអគ្គបញ្ជាការដ្ឋាន ព្រឹកថ្ងៃទី២២ ខែមិថុនា ឆ្នាំ២០១៨ លោកនាយឧត្តមសេនីយ៍ ប៉ុល សារឿន អគ្គមេបញ្ជាការនៃកងយោធពលខេមរភូមិន្ទ បានទទួលស្វាគមន៍ចំពោះគណៈប្រតិភូកងទ័ពភូមិន្ទថៃ ដឹកនាំដោយលោក នាយឧត្តមសេនីយ៍ Tarchaiyan Srisuwan អគ្គមេបញ្ជាការកងទ័ពភូមិន្ទថៃ ដែលបានមកបំពេញទស្សនកិច្ចនៅព្រះរាជាណាចក្រកម្ពុជា ដើម្បីរឹតចំណងមិត្តភាព សាមគ្គីភាព និងកិច្ចសហប្រតិបត្តិការល្អ រវាងរាជរដ្ឋាភិបាល កងទ័ព និងប្រជាជននៃប្រទេសទាំងពីរ កម្ពុជា-ថៃ ឱ្យកាន់តែរីកចម្រើនរឹងមាំថែមទៀត។
នាយកឧត្តមសេនីយ៍ បានថ្លែងពីកិច្ចសហប្រតិបត្តិការល្អ រវាងប្រទេសទាំងពីរ កម្ពុជា-ថៃ ដែលបានគ្របដណ្តប់ លើវិស័យជាច្រើនរួមមាន៖ វិស័យការទូត ធនធានមនុស្ស ហេដ្ឋារចនាសម្ព័ន្ធ ពាណិជ្ជកម្ម ឧស្សាហកម្ម វប្បធម៌ អប់រំ និងកីឡា ជាដើម ។ល។ ជាពិសេសសហការបង្ក្រាបបទល្មើសនានា នៅតាមព្រំដែន ដើម្បីឱ្យក្លាយជាព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍស្របតាមគោលការណ៍ដ៏ខ្ពង់ខ្ពស់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
លោកអគ្គមេបញ្ជាការ បានសំណូមពរដល់ភាគីថៃ ឲ្យបន្តជួយបណ្តុះបណ្តាលធនធានមនុស្សតាមជំនាញនីមួយៗ។ បើមានបញ្ហាអ្វីត្រូវរួមគ្នាដោះស្រាយ ដោយសន្តិវិធី ក្នុងនាមជាបងប្អូន។ បន្តបង្កើនទំនាក់ទំនងលើវិស័យវប្បធម៌ និងកីឡា ពីព្រោះ កីឡា គឺជាកត្តាសំខាន់មួយ ក្នុងការពង្រឹងសាមគ្គីភាពរវាងកម្ពុជា-ថៃ។
អគ្គមេបញ្ជាការកងទ័ពភូមិន្ទថៃ បានថ្លែងពីការរីកចម្រើននៃ កិច្ចសហប្រតិបត្តិការល្អ រវាងប្រទេសទាំងពីរ ថៃ-កម្ពុជា លើវិស័យការទូតសេដ្ឋកិច្ច ពាណិជ្ជកម្ម វប្បធម៌ អបរំ និងកីឡា ជាដើម ។ល។ គោលបំណង នៃដំណើរទស្សកិច្ចនេះ ដើម្បីបន្តរឹតចំណងមិត្តភាពសាមគ្គីភាព និងកិច្ចសហប្រតិបត្តិការល្អ រវាងរាជរដ្ឋាភិបាល កងទ័ព និងប្រជាជន នៃប្រទេសទាំងពីរកម្ពុជា-ថៃឱ្យកាន់តែរីកចម្រើនរឹងមាំថែមទៀត។ ចំពោះសំណូមពររបស់ភាគីកម្ពុជា ភាគីថៃបានឯកភាព។
លោកនាយឧត្តមសេនីយ៍ប៉ុល សារឿន បានជូនពរចំពោះដំណើរទស្សនកិច្ច របស់គណៈប្រតិភូកងទ័ពភូមិន្ទថៃ ប្រកបដោយជោគជ័យនិងសូមឱ្យចំណងមិត្តភាព សាមគ្គីភាព និងកិច្ចសហប្រតិបត្តិការ រវាងប្រទេសនិងកងទ័ពទាំងពីរ កម្ពុជា-ថៃ ស្ថិតស្ថេរជានិច្ចនិរន្តរ៍៕ ដោយ ៖ កូឡាប
