ភ្នំពេញ ៖ លោក គឹម រ័ត្នណារិន ចៅក្រមស៊ើបសួរ សាលាដំបូងរាជធានីភ្នំពេញ នៅរសៀលថ្ងៃទី១១ ខែវិច្ឆិកានេះ បានចេញដីកាបង្គាប់ឲ្យភ្នាក់ងារមានសមត្ថកិច្ច ធ្វើការនាំខ្លួន ឧកញ៉ា ជួប ច័ន្ទ ទៅឃុំខ្លួននៅពន្ធនាគាររាជធានីភ្នំពេញ (PJ) ដែលពាក់ព័ន្ធការចេញសែកគ្មានសាច់ប្រាក់ជាង១លានដុល្លារ។
យោងតាមដីកាសម្រេចឃុំខ្លួនបានបង្គាប់ឲ្យឃុំខ្លួន ទាក់ទងនឹងសំណុំរឿងស៊ើបសួរលេខ ៣៨៦២ចុះថ្ងៃទី១២ខែតុលាឆ្នាំ២០១៧ ដែលទាក់ទងនឹងលោកឧកញ៉ា ជួប ច័ន្ធ ភេទប្រភេទប្រុស ជនជាតិខ្មែរ ជាពាណិជ្ជករ ទីកន្លែងកំណើតនៅសង្កាត់លេខ៦ ខណ្ឌចំការមន ក្រុងភ្នំពេញ ទីលំនៅបច្ចុប្បន្ន ស្នាក់នៅផ្ទះលេខ៥២ ផ្លូវលេខ១២៣ ភូមិ៤ សង្កាត់ទួលទំពូង១ ខណ្ឌចំការមន រាជធានីភ្នំពេញ ប្រពន្ធឈ្មោះរស់ សុគន្ធី ។ លោកឧកញ៉ា ប្រវត្តិនៃការផ្តន្ទាទោសដោយតុលាការគ្មាន។ ជននេះ ត្រូវបានដាក់ឲ្យស្ថិតនៅក្រោមការពិនិត្យពីបទ មិនបំពេញកាតព្វកិច្ចចំពោះឧបករណ៍អាចជួញដូរបាន ប្រព្រឹត្តនៅចំណុចក្រុមហ៊ុនគឹមហាប់ ខូអិលធីឌី ផ្ទះលេខ៥៤ ផ្លូវលេខ៣៨៨ សង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ កាលពីថ្ងៃទី៣០ខែមិថុនា ឆ្នាំ២០១៧ បទល្មើសព្រហ្មទណ្ឌដែលមានចែងឲ្យផ្តន្ទាទោសតាមបញ្ញត្តិមាត្រា២៣១ នៃច្បាប់ស្តីពីឧបករណ៍ដែលអាចជួញដូរបាន និងប្រតិបត្តិការទូទាត់ប្រាក់។ លោក គឹម រ័ត្នណារិន បានឃើញដីកាសម្រេចឲ្យឃុំខ្លួនបណ្តោះអាសន្ន លេខ៦៥០៥ ដពស ចុះថ្ងៃទី១១ខែវិច្ឆិកា ឆ្នាំ២០១៧។ ចៅក្រម បានបង្កាប់ ឲ្យភ្នាក់ងារមានសមត្ថកិច្ចនៃកងកម្លាំងសាធារណៈ ធ្វើការនាំខ្លួនជនត្រូវចោទដែលមានឈ្មោះ ជួប ច័ន្ទ ទៅពន្ធនាគាររាជធានីភ្នំពេញ (PJ) ដោយអនុវត្តឲ្យបានត្រឹមត្រូវតាមនីតិវិធីនៃច្បាប់។ ឲ្យប្រធានពន្ធនាគាររាជធានីភ្នំពេញ (PJ) ទទួល និងឃុំខ្លួនជននេះ រហូតដល់មានបទបញ្ជាថ្មី សម្រេចផ្សេងពីនេះ និងឲ្យគ្រប់ភ្នាក់ងារនៃកងកម្លាំងសាធារណៈទាំងអស់ សហការអនុវត្តឲ្យបានល្អនៅពេលដីកានេះ ត្រូវបានបង្ហាញក្នុងករណីចាំបាច់។
សូមជម្រាបថា លោក លីវ វុទ្ធី តំណាងក្រុមហ៊ុនរបស់លោកឧកញ៉ា គឹម កៅ ដែលជាដើមបណ្តឹង បានដាក់ពាក្យប្តឹងឧកញ៉ា ជួប ច័ន្ទ ពីបទចេញមូលប្បទានប័ត្រគ្មានសាច់ប្រាក់ ចំនួនជាងមួយលានដុល្លារអាមេរិក។ ករណីចេញមូលប្បទានប័ត្រគ្មានសាច់ប្រាក់នេះគឺ ឧកញ៉ា ជួប ច័ន្ទ បានរកស៊ីជាមួយក្រុមហ៊ុនដែលមានលោក លីវ វុទ្ធី ជាតំណាង ដែលមានលោកឧកញ៉ា គឹម កៅ ជាប្រធានក្រុមហ៊ុន លើទឹកប្រាក់ប្រមាណ៣លានដុល្លារអាមេរិក។ ប៉ុន្តែក្រោយមកលោកឧញ៉ា គឹម កៅ បានទារប្រាក់នេះវិញ ទើបឧកញ៉ា ជួប ច័ន្ទ ចេញសែកឲ្យទៅឧកញ៉ា គឹម កៅ ដែលមានទឹកប្រាក់ជាងមួយលានដុល្លារអាមេរិក ដោយបានកំណត់ ឱ្យទៅបើកនៅធនាគារនៅថ្ងៃទី៣០ ខែកក្កដាឆ្នាំ ២១០៧។ ប៉ុន្តែពេលភាគីឧកញ៉ា គឹម កៅ យកសែកទៅបើកលុយ ស្រាប់តែខាងធនាគារបញ្ជាក់មកវិញថា មូលប្បទានប័ត្រនេះគ្មានសាច់ប្រាក់ទេ។ ក្រោយបានទទួលពាក្យបណ្តឹងរបស់លោក លីវ វុទ្ធី រួចហើយ សមត្ថកិច្ចបានអញ្ជើញឧកញ៉ា ជួប ច័ន្ទ ឱ្យចូលបំភ្លឺលើពាក្យបណ្តឹងនេះ។
សូមបញ្ជាក់ថា កាលពីថ្ងៃទី១២ ខែកញ្ញា ឆ្នាំ២០១៧ ឧកញ៉ា ជួប ច័ន្ទ ត្រូវបានសមត្ថកិច្ចនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ឃាត់ខ្លួនម្តងរួចហើយ ពាក់ព័ន្ធករណីនេះ តាមការឯកភាពឱ្យឃាត់ខ្លួនរបស់លោក ស៊ិន វីរៈ ព្រះរាជអាជ្ញារងអមសាលាដំបូងរាជធានីភ្នំពេញ ប៉ុន្តែក្រោយការសួរនាំ ក៏អនុញ្ញាតឱ្យត្រឡប់ទៅផ្ទះវិញ៕ ដោយ៖បញ្ញាស័ក្តិ
