រឿងរ៉ាវដ៏កម្រកើតមាននេះកំពុងត្រូវបានចែករំលែកយ៉ាងកក្រើកនៅលើបណ្តាញសង្គមប្រទេសចិន ។ ហេតុការណ៍នេះកើតឡើងតែប៉ុន្មានម៉ោងមុនពេលកូនកំលោះមកទទួលយកកូនក្រមុំឆ្ពោះទៅកាន់កន្លែងប្រារព្ធពិធី ។
តាមប្រភពព័ត៌មានចុះផ្សាយលើគេហទំព័រ Sohu កូនកំលោះនិងកូនក្រមុំបានស្គាល់គ្នាច្រើនឆ្នាំមកហើយ ក្រោយពេលបានស្គាល់គ្នារយៈពេលយូរកន្លងមកអ្នកទាំងពីរបានសម្រេចចិត្តរៀបការជាមួយគ្នា ហើយទទួលបានការយល់ព្រមពីម្តាយឪពុកទាំងសងខាង ។ នៅថ្ងៃដ៏នក្ខត្តឫក្សនេះ កូនកំលោះសាច់ញាតិ និងមិត្តភក្តិជិតស្និទ្ធបានធ្វើដំណើរទៅផ្ទះកូនក្រមុំតាំងពីព្រលឹម ដោយយកលុយកាក់ខ្លះៗធ្វើជាប្រាក់ធីបតាមប្រពៃណី ប៉ុន្តែពេលទៅដល់ផ្ទះកូនក្រមុំពុំមាននរណាម្នាក់ឈរនៅមាត់ទ្វារទារប្រាក់ធីបតាមប្រពៃណីឡើយ ពេលចូលទៅដល់ក្នុងផ្ទះស្រាប់តែឃើញឪពុកម្តាយកូនក្រមុំមានទឹកមុខមាំខុសធម្មតាធ្វើឲ្យភាគីកូនកំលោះមានអារម្មណ៍ថា ហេតុការណ៍អាក្រក់អ្វីមួយនឹងកើតឡើង ។
កូនកំលោះបានពោលទៅកាន់ឪពុកម្តាយក្មេក ស្រាប់តែពួកគេនិយាយខ្លាំងៗថា ៖ ថ្ងៃនេះប្រសិនបើកូនកម្លោះមិនផ្តល់លុយបន្ថែម ៥០០.០០០យេនទេនោះ ពួកគេនឹងមិនព្រមឲ្យកូនក្រមុំខ្លួនរៀបការទេ ។
ដំបូងឡើយកូនកំលោះរាងស្រឡាំងកាំង ហើយគិតថា នេះគ្រាន់តែជាការនិយាយលេងប៉ុណ្ណោះ ។ ប៉ុន្តែអាកប្បកិរិយារបស់ក្រុមគ្រួសារខាងស្រីមានភាពម៉ឺងម៉ាត់ និងគ្មានលក្ខណៈ និយាយលេងសោះឡើយ ។ ក្រោយមកពួកគេក៏បញ្ជាក់ប្រាប់កូនកំលោះត្រង់ៗថា ៖ កូនប្រុសពួកគេខ្វះបំណុលអ្នកដទៃ ហើយខ្លួនពុំមានលុយទើបតម្រូវឲ្យកូនប្រសារផ្តល់បន្ថែមថ្លៃទឹកដោះ ។
កូនកំលោះចាប់ផ្តើមយល់សាច់រឿង ហើយក៏ខំប្រឹងពន្យល់ថា ខ្លួនពុំមានលុយច្រើននោះទេ ប៉ុន្តែក្រោយពេលរៀបការ និងប្រឹងប្រែងរកស៊ី ដើម្បីយកប្រាក់មកជួយឲ្យឪពុកម្តាយក្មេកដោះបំណុលទេ ។ ប៉ុន្តែម្តាយកូនក្រមុំដាច់ខាតមិនយល់ព្រម ហើយទាមទារត្រូវតែប្រគល់លុយនោះភ្លាម ។
ពេលនោះកូនកំលោះក៏ងាកមកសួរកូនក្រមុំ ៖ “ប្រសិនបើថ្ងៃនេះ បងពុំប្រគល់លុយឲ្យម្តាយអូនថែមទៀត អូននឹងមិនទៅតាមបងទេមែនទេ?” នាងជាកូនក្រមុំឆ្លើយទាំងរលីងរលោងទឹកភ្នែកថា ៖ “អូនក៏គ្មានជម្រើសណាផ្សេងទៀតឡើយ” ។
បន្ទាប់ពីនោះមកគ្រួសារទាំងពីក៏កើតជម្លោះឈ្លោះប្រកែកគ្នាយ៉ាងខ្លាំង ។ នៅពេលជម្លោះបានឈានដល់កម្រិតមួយយ៉ាងខ្លាំងស្រាប់តែអ្នកកំដរកូនក្រមុំម្នាក់ស្រែកថា ៖ “កូនប្រុសគ្រួសារអ្នកខ្វះបំណុលគេ ហេតុអ្វីក៏បែរជាបង្ខំឲ្យកូនកម្លោះត្រូវទទួលខុសត្រូវ! ។ ប្រសិនបើថ្ងៃក្រោយ មានមនុស្សចង់ឲ្យកូនប្រុសអ្នកត្រូវស្លាប់ នោះតើអ្នកគិតយកជីវិតកូនប្រសារទៅប្តូរជំនួសឬ? សំណាងល្អណាស់ព្រោះតែអាពាហ៍ពិពាហ៍ផ្លូវការពុំទាន់ប្រព្រឹត្តទៅ! ។
អ្នកមានវត្តមាននៅទីនោះ កាន់តែស្រឡាំងកាំងពេលដែលអ្នកកំដរកូនក្រមុំរូបនេះ បានងាកទៅកាន់កូនកម្លោះ រួចសុំរៀបការនៅពីមុខគេឯងតែម្តង ។ ចំណែកកូនកម្លោះវិញ បន្ទាប់ពីពិចារណាមួយសន្ទុះ ក៏ទាញដៃអ្នកកំដរកូនក្រមុំរូបនោះធ្វើដំណើរចាកចេញទៅ ៕ ចន្ទ្រា