បច្ចុប្បន្ននេះ សង្កេតឃើញថា អំពើចោរកម្ម ជាពិសេសចោរឆក់ទូរស័ព្ទ ឆក់កាបូបលុយ គឺបានចាប់ផ្តើមចេញសធ្វើកម្មភាពយ៉ាងរលូន មិនថាពេលយប់ ឬពេលថ្ងៃ នេះក៏ព្រោះតែសមត្ថកិច្ចមូលដ្ឋាន ហាក់ធ្លាក់ចុះការរឹតបន្តឹងសន្តិសុខ ខណៈបទល្មើសបានកើតឡើងជារៀងរាល់ថ្ងៃ។
ពិតណាស់ បើតាមការសង្កេត ខណៈធ្វើដំណើរនៅពេលយប់ គឺកម្រឃើញសមត្ថកិច្ចចេញល្បាតតាមដងផ្លូវ ឬប្រចាំគោលដៅក្នុងមូលដ្ឋាន ដូចមុននោះទេ ដែលជាឱកាសធ្វើឲ្យក្រុមចោរស្ទាវៗ ហ៊ានធ្វើសកម្មភាពគ្មានខ្លាចញញើត សូម្បីទាំងកណ្តាលពេលថ្ងៃបែបនេះ។
ជាក់ស្តែង កាលពីពេលថ្មីៗនេះ (ថ្ងៃទី៤ ខែកុម្ភៈ ឆ្នាំ២០២៣) ក្រុមចោរស្ទាវបានធ្វើសកម្មភាពឆក់កាបូបជនជាតិចិន នៅគោលដៅតែមួយ (ប្លុកផ្សារចិន ស្តុបព្រៃទា) ១ភ្លែត២ដង។ តែទោះជាយ៉ាងណា ដោយសារជនជាតិចិនមានការប្រុងប្រយ័ត្ន និងកាបូបមានគុណភាព ជាហេតុធ្វើឲ្យពួកវាឆក់ពុំបានសម្រេចនោះទេ។
តាមរយៈវីដេអូកាមេរ៉ាសុវត្ថិភាព បានបង្ហាញឲ្យឃើញថា ករណីឆក់ទាំងពីរលើកនេះ គឺបានធ្វើសកម្មភាពរំលងគ្នាតែប៉ុន្មាននាទីប៉ុណ្ណោះ ដោយករណីទី១ នៅវេលាម៉ោង ៥ និង ៥៤ នាទី និងទី២ នៅវេលាម៉ោង ៥ និង ៥៩ នាទី។
សូមបញ្ជាក់ថា សកម្មភាពឆក់កាបូបជនជាតិចិនមិនបានសម្រេចទាំងពីរលើកនេះ គឺធ្វើឡើងដោយក្រុមចោរតែមួយ ដោយចោរស្ទាវម្នាក់ជិះម៉ូតូ Dream សង់ ជាអ្នកឆក់ ខណៈគ្នីគ្នាម្នាក់ទៀតជិះម៉ូតូ next 4395 ជាអ្នកឃ្លាំមើល និងចាំបិទគូទ៕ រក្សាសិទ្ធិដោយ៖ លឹម ហុង
