តាមកាសែត “មនុស្សសៀងហៃ” ឲ្យដឹងថា មនុស្សជាច្រើនក្នុងហ្វូងមនុស្សដ៏កុះករ ដែលបានស្រែកឲ្យនារីវ័យ ១៩ឆ្នាំម្នាក់ លោតទម្លាក់ខ្លួនពីអគារខ្ពស់មួយនៅទីក្រុង Qingyang ខេត្តកានស៊ូ ត្រូវបានចាប់ខ្លួនព្រោះពួកគេបែរជាលើកទឹកចិត្តជំរុញឲ្យនារីវ័យក្មេងម្នាក់នេះលោតទម្លាក់ខ្លួនចុះមកដី ។
នារីវ័យក្មេងដែលលោតសម្លាប់ខ្លួនពីអគារជាន់ទី ៩
ដំណើររឿងគឺក្មេងស្រីត្រកូល Li បានឈរលើសំយ៉ាបផ្ទះនៃអគារជាន់ទី ៩ ខណៈពេលដែលនៅក្រោមដីមានមនុស្សរាប់រយនាក់ឈរសំឡឹងមើលថារឿងអ្វីនឹងកើតឡើង ។
នាង Li ឈរនៅលើនោះយ៉ាងយូរ ស្រាប់តែហ្វូងមនុស្សនោះហាក់ដូចជាតក់ក្រហល់ក៏ស្រែកខ្លាំងៗថា “លោតចុះឲ្យលឿនមក! ហេតុអ្វីមិនទាន់លោតដូច្នេះ?” ។
មនុស្សមួយចំនួននៅខាងក្រោមនោះនៅបាន Live នូវករណីនារីវ័យក្មេងដែលប៉ងធ្វើអត្តឃាតរូបនេះ ពួកគេថែមទាំងប្រើប្រាស់នូវពាក្យពេចន៍ជាអាទិ៍ ៖ “ខ្ញុំបានរង់ចាំក្រោមកំដៅថ្ងៃ១ម៉ោងហើយដើម្បីរង់ចាំមើលនាងនេះលោតចុះមក” ខ្លះទៀតពោលថា ៖ លោតចុះឲ្យលឿនមកខ្ញុំនៅប្រញាប់ទៅទទួលកូនខ្ញុំទៀត! ។
ប្រមាណ ៤ម៉ោងក្រោយមកនារីត្រកូល Li បានទម្លាក់ខ្លួនចុះ តែដៃនៅតោងជាប់តែលតោលកណ្តាលលំហ ។ មួយសន្ទុះក្រោយមកបន្ទាប់ពីបដិសេធការអង្វករស្នើរសុំរបស់ក្រុមសង្គ្រោះ នាងក៏ព្រលែងដៃរួចធ្លាក់ចុះ ។
នៅលើគេហទំព័រ Weibo ប្រជាអ៊ិនធើណេតចិនមួយចំនួនបានថ្កោលទោសហ្វូងមនុស្សនៅក្រោមថាជាអ្នកបានច្រាននាង Li ឲ្យធ្លាក់ចុះមកក្រោម ។ ខ្លះនិយាយថា ដើម្បីឲ្យភ្នែកពួកគេសប្បាយគេបានស្រែកប្រៀបដូចជាការពន្លត់ក្តីសង្ឃឹមចុងក្រោយ ព្រោះក្មេងស្រីនេះហាក់នៅអល់អែកចិត្តទេ ។
ក្រោយពេលដែលប្រព័ន្ធព័ត៌មានចុះផ្សាយ ទើបដឹងថា ក្មេងស្រីនេះពិតជាគួរឲ្យអាណិត ។ នាងបានកើតរោគចិត្ត ២ឆ្នាំមកហើយ បន្ទាប់ពីគ្រូបង្រៀនរបស់ខ្លួនចាប់រំលោភមក ។ នាងបានបន្សល់ទុកសំបុត្រសរសេរដៃ ៦ទំព័រ ដែលបង្កប់នូវអត្ថន័យដ៏ជ្រាលជ្រៅ ទាមទារឲ្យសង្គមជួយរកយុត្តិធម៌ដល់នាង ព្រោះតែជនត្រកូល Wu នៅក្រៅសំណាញ់ច្បាប់នៅឡើយ ។ ព្រោះតែថ្នាក់ដឹកនាំសាលារបស់នាងព្យាយាមបិទបាំងរួមទាំងបានបញ្ចុះបញ្ចូលគ្រួសារនាងទទួលប្រាក់ 350.000យាន់ ឲ្យដកពាក្យបណ្តឹងវិញ តែគ្រួសារនាងបានបដិសេធ ។
ភ្នាក់ងារជួយសង្គ្រោះបាននិយាយប្រាប់ពីសំដីរបស់នាងគឺ ៖ បង! ខ្ញុំអរគុណពួកបង! តែខ្ញុំចង់ឡើងឋានសួគ៌! ៕ សូយន
