ក្នុងជីវិតគ្មានអ្វីសុក្រិតតាមចិត្តយើងចង់បាននោះទេ ព្រោះយើងពុំមានសិទ្ធិជ្រើសរើស បានត្រឹមតែទទួលយកនិងសម្របខ្លួនរស់ជាមួយវាឲ្យបានល្អប៉ុណ្ណោះ ។
ក្មេងប្រុស Rommel Quemenales អាយុ ១១ រស់នៅទីក្រុង Quezon ប្រទេសហ្វីលីពីន ។
ដំបូងឡើយវារស់នៅជាមួយឪពុកម្តាយ ហើយក្រោយមកទើបឡើងមកទីក្រុងរស់នៅជាមួយជាបងស្រី ដែលមានជីវភាពក្រីក្រវេទនា ជាហេតុនាំឲ្យក្មេងប្រុសនេះត្រូវឈប់រៀនតាំងពី
ថ្នាក់ទី ២ រួចដើរសុំទានគេគ្រប់ទីកន្លែង ។ យ៉ាងនេះក្តីវាតែងចិញ្ចឹមចិត្តថានឹងមានថ្ងៃណាមួយវានឹងអាចទៅសាលាដូចក្មេងដទៃ… ។ ក្នុងវ័យក្មេងបែបនេះថែមទាំងមានមាឌតូចល្អិត
រស់នៅអនាថាគ្មានបង្អែក វាតែងត្រូវក្មេងអនាថាដទៃទៀតគំរាមសំឡុតយកលុយ ។ ប្រហែលជាវាសនាកំណត់ទើបថ្ងៃមួយនោះ Rommel បានជួបនឹងឆ្កែអនាថាមួយក្បាល
វាដាក់ឈ្មោះថា Badgi ។ ជីវិតវានិងឆ្កែនេះបានលុបចោលភាពឯកោទាំងសងខាង ។
Badgi តែងដើរជាមួយ Rommel ដើម្បីប្រកបរបរសុំទាន ។ រាល់ពេលបានចំណីអាហារ Rommel តែចែករំលែកអាហាររួចបរិភោគជាមួយគ្នា ។ ហាក់ដូចជាការតបស្នង Badgi តែង
ការពារម្ចាស់វារាល់ពេលដែលក្មេងអនាថាដទៃទៀតមកគំរាមសំឡុត ។ ពេលយប់ពួកវាទាំងពីរដេកឱបគ្នាតាមសំយ៉ាបផ្ទះ ឬទីកន្លែងដែលពុំត្រូវគេបណ្តេញ ។
ពិតណាស់ពេលនេះ ពួកវារស់នៅដោយពឹងពាក់គ្នា ហើយលែងរងទទួលភាពឯកោកណ្តោចកណ្តែងទៀតហើយ ។ ពេលវេលាកន្លងផុតទៅវាទាំងពីរក៏ពេញចិត្តទទួលជីវភាព
បែបនេះ ។
របត់ជីវិតវាបានមកដល់ក្រោយពេលដែលនាង Maria Kabs ដែលតែងសង្កេតតាមដានជីវិតពួកវាទាំងពីរ បានថតរូប សាកសួរព័ត៌មាន រួចបង្ហោះរូបភាព និងសាច់រឿងរបស់ Rommel
និង Badgi ឡើងលើគេទំព័រហ្វេសបុករបស់នាង ស្មានពុំដល់ថារឿងរ៉ាវដ៏តូចរវាងក្មេងម្នាក់និងឆ្កែមួយក្បាលបានទាក់ទាញអារម្មណ៍ អាណិតអាសូរ ទាំងនៅក្នុងស្រុក
ក៏ដូចជានៅបរទេស ។ ជំនួយផ្សេងៗបានផ្តល់ឲ្យក្មេងប្រុសនេះយ៉ាងច្រើនសន្ធឹកសន្ធាប់ ធ្វើឲ្យវាអាចស្ពាយកាតាបចូលសាលារៀន ដោយមានក្រុមគ្រួសារតូចមួយជាបង្អែក ។
ប្រាកដណាស់ក្នុងនោះក៏មាន Badgi មិត្តភក្តិកម្សត់កម្ររបស់វាផងដែរ ។
ក្នុងជីវិតរបស់មនុស្សម្នាក់ៗ យើងគ្មានសិទ្ធិក្នុងការជ្រើសរើសយកនូវអាស័យដ្ឋានចាប់កំណើតណាមួយឡើយ ប៉ុន្តែពេលដឹងក្តីយើងមានសិទ្ធិក្នុងការជ្រើសរើសពីរបៀបធ្វើឲ្យជីវិត
ដែលវេទនាបានធូស្រាលជាងមុន ។ កុំអស់សង្ឃឹមអ្នកត្រូវដឹងថា នៅគ្រប់ទីកន្លែង តែងមានបំណែកជីវិតដែលវេទនាជាងយើង ហើយវានឹងធ្វើឲ្យយើងទទួលអារម្មណ៍ថា យើង
ពិតជាមានសំណាងជាងគេ ៕ ចន្ទ្រា