Friday, September 22, 2023

ព្រះមហាក្សត្រ យាង​ជា​ព្រះរាជាធិបតី ក្នុង​ពិធី​រំលឹក​ខួប​លើក​ទី​២៥​ឆ្នាំ នៃ​ការបង្កើត​មន្ទីរពេទ្យ​គន្ធបុប្ជា​, ២៥​ឆ្នាំ ចំណាយ​ថវិកា​៦៣២​លាន​ដុល្លារ​

spot_img

​ភ្នំពេញ ៖ ព្រះករុណា ព្រះបាទ​សម្ដេចព្រះ​បរមនាថ នរោត្ដម សីហ​មុនី ព្រះមហាក្សត្រ នៃ​ព្រះរាជាណាចក្រ​កម្ពុជា សម្តេច​ព្រះមហាក្សត្រី ព្រះវររាជ​មាតា​ជាតិខ្មែរ បាន​យាង​និង​អញ្ជើញ​ចូលួ​ម​ក្នុង​ពិធី​រម្លឹក​ខួប លើក​ទី​២៥​ឆ្នាំ នៃ​ការបង្កើត​មន្ទីរពេទ្យ​គន្ធបុប្ជា និង សម្ពោធ​អគារ​មជ្ឈមណ្ឌល​ព័ត៌មាន​នៃ​មន្ទីរពេទ្យ​គន្ធបុប្ជា កាលពី​ថ្ងៃ​ទី​១៥ ខែវិច្ឆិកា ឆ្នាំ​២០១៧​។​

​សូមបញ្ជាក់​ថា​៖ ក្នុង​រយៈពេល​២៥​ឆ្នាំ​កន្លងមកនេះ មន្ទីរពេទ្យ​គន្ធបុប្ជា​បានទទួល ពិនិត្យ​កុមារ និង​ស្ដ្រី​មាន​ផ្ទៃពោះ នៅ​ផ្នែក​ពិគ្រោះ​ជំងឺ​ក្រៅ បាន​ចំនួន​១៦.៨២២.២២៥​ករណី បាន​ព្យាបាល កុមារ​សម្រាក ក្នុង​មន្ទីរពេទ្យ បាន​ចំនួន​១.៨៥៣.៥១០​នាក់ និង​សម្រាល​បុត្រ បាន​ចំនួន ២៤៥.៥៩៦​នាក់ និង​ចំណាយ​ថវិកា សរុប​ប្រមាណ​៦៣២​លាន​ដុល្លារ​។​

​ព្រះករុណា ព្រះបាទ​សម្ដេចព្រះ​បរមនាថ នរោត្ដម សីហ​មុនី ព្រះមហាក្សត្រ នៃ​ព្រះរាជាណាចក្រ​កម្ពុជា បាន​មាន​ព្រះរាជបន្ទូល​កោតសរសើរ ចំពោះ​លោក​សាស្ដ្រាចារ្យ Beat Richner វេជ្ជបណ្ឌិត គ្រូពេទ្យ និង​បុគ្គលិក បម្រើការ​ទាំងអស់ នៅក្នុង​មន្ទីរពេទ្យ​កុមារ​គន្ធបុប្ជា ដែល​បាន​យកចិត្តទុកដាក់ ក្នុង​មនោសញ្ចេតនា​ស្រឡាញ់​រាប់ អាន​កុមារ​មាន​ជំងឺ និង​ស្ដ្រី​មាន​ផ្ទៃពោះ ហើយ​បាន​ខិតខំ​បំពេញ ភារកិច្ច​បាន​ល្អប្រសើរ ក្នុង​ការជួយ​សង្គ្រោះ​កុមារ​កម្ពុជា​ច្រើន​លាន​នាក់ និង​ស្ដ្រី​មួយចំនួន​ឱ្យ​រួចផុត ពី​ជំងឺ​ផ្សេងៗ ដែល​ជា​កត្ដា​ជំរុញ​អភិវឌ្ឍន៍​វិស័យ​ធនធានមនុស្ស សម្រាប់​កសាង​សង្គម​ជាតិ​នាពេល បច្ចុប្បន្ន​និង​ទៅ​អនាគត​។​

​ព្រះអង្គ មាន​ព្រះរាជបន្ទូល បន្ដថា ចាប់តាំងពី​ឆ្នាំ​១៩៩២​មក មូលនិធិ​កុមារ​គន្ធបុប្ជា ដោយ​មាន​ការឧបត្ថម្ភ​គាំទ្រ​ពី រដ្ឋាភិបាល​ស្វ៊ី​ស និង​សប្បុរសជន​ស្វ៊ី​ស ព្រមទាំង​សប្បុរសជន​ជាតិ និង​អន្ដរជាតិ ផ្សេងទៀត ជាពិសេស​លោក​សាស្ដ្រាចារ្យ Beat Richner បាន​កសាង​មន្ទីរពេទ្យ​គន្ធបុប្ជា​ចំនួន​៥​កន្លែង នៅ​រាជធានី​ភ្នំពេញ និង​ខេត្ដ​សៀមរាប សម្រាប់​ទទួល​កុមារ ស្ដ្រី​មាន​ផ្ទៃពោះ និង​ស្ដ្រី​មាន ជំងឺ​មក​ពិនិត្យ សម្រាក​ព្យាបាល​បាន​ច្រើន​លាន​នាក់​ដោយ​មិន​យក​ថ្លៃ​។​

​ព្រះអង្គ បាន​មាន​ព្រះបន្ទូល​ទៀតថា “​នេះ​ជា​សក្ខីភាព​បញ្ជាក់​ឱ្យ​ឃើញ​នូវ​ទំហំ​នៃ ទឹកចិត្ដ​មនុស្សធម៌ ដ៏​ជ្រាលជ្រៅ​បំផុត​របស់​លោក​សាស្ដ្រាចារ្យ រដ្ឋាភិបាល​ស្វ៊ី​ស សប្បុរសជន​ស្វ៊ី​ស ព្រមទាំង​សប្បុរស ជនជាតិ អន្ដរជាតិ​ផ្សេងៗ​ទៀត ចំពោះ​ប្រជាជន​កម្ពុជា ព្រម​ទាំង​លើ​ផ្នែក ផ្ដល់​សេវា​សុខភាព​កុមារ និង​ស្ដ្រី​”​។​

​ព្រះមហាក្សត្រ ក៏​បាន​អរគុណ​ចំពោះ​ការខិតខំ​ប្រឹងប្រែង របស់​រាជរដ្ឋាភិបាល​កម្ពុជា ដើម្បី​អភិវឌ្ឍន៍ វិស័យ​សុខាភិបាល លើកកម្ពស់​សុខុមាលភាព របស់​ប្រជាពលរដ្ឋ​នៅ​ទូទាំង ព្រះរាជាណាចក្រ​កម្ពុជា ជាពិសេស​តាមរយៈ​សកម្មភាព​របស់​មន្ទីរពេទ្យគ​ន្ធ​បុប្ជា ដែល​បាន​រួមចំណែក​ថែរក្សា ការពារ​សុខភាព​ស្ដ្រី និង​កុមារ​ក្នុង​រយៈពេល​២៥​ឆ្នាំ​កន្លងមកនេះ​។​
​ព្រះអង្គ​បាន​ថ្លែងអំណរគុណ ចំពោះ​សម្ដេច​អគ្គមហាសេនាបតី​តេជោ ហ៊ុន សែន នាយករដ្ឋមន្ដ្រី នៃ​ព្រះរាជាណាចក្រ​កម្ពុជា ដែល​បាន​ផ្ដល់​ដី​ដ៏​ធំ​មួយ​កន្លែង​នៅក្នុង​ខេត្ដ សៀមរាប សម្រាប់​កសាង​មន្ទីរ ពេទ្យ​ជ័យវរ្ម័ន​ទី​៧ កាលពី​ឆ្នាំ​១៩៩៨ និង​បាន​ជួយឧបត្ដម្ភ ក្នុង​មួយ​ឆ្នាំៗ​ច្រើន​លាន​ដុល្លារ​សហរដ្ឋអាមេរិក ព្រមទាំង​បាន​បង្ក​លក្ខណៈ​គ្រប់បែប យ៉ាង​ដល់​មូលនិធិ​មន្ទីរពេទ្យ​កុមារ​គន្ធបុប្ជា ក្នុង​ការកសាង​មន្ទីរពេទ្យ កុមារ​គន្ធបុប្ជា​។ កាយវិកា​ដ៏​ឧត្តុង្គ ឧត្តម​នេះ បាន​បង្ហាញ​នូវ​ការយកចិត្ដទុកដាក់​ខ្ពស់​របស់​ថ្នាក់ដឹកនាំ និង​សប្បុរសជន​ជាតិ ចំពោះ​សុខភាព​កុមារ​ដែល​ជា​ទំពាំង​ស្នង​ឫស្សី​ទៅ​ថ្ងៃ​អនាគត​។​

​ក្នុង​ឱកាស​នេះ​ដែរ ព្រះករុណា ព្រះបាទ​សម្ដេចព្រះ​បរមនាថ នរោត្ដម សីហ​មុនី ព្រះមហាក្សត្រ នៃ​ព្រះរាជាណាចក្រ​កម្ពុជា ចូល​រួមវិភាគទាន​ព្រះរាជ​ទ្រព្យ​ចំនួន ១០.០០០​ដុល្លារ និង​សម្តេច​ព្រះមហាក្សត្រី ព្រះវររាជ​មាតា​ជាតិខ្មែរ ក៏​បាន​ចូល​រួមវិភាគទាន​ព្រះរាជ​ទ្រព្យ​ចំនួន ១០.០០០​ដុល្លារ​សហរដ្ឋអាមេរិក ជូន​ចំពោះ​មូលនិធិ​មន្ទីរពេទ្យ​កុមារ​គន្ធបុប្ផា​ផងដែរ​។​

​លោក ម៉ម ប៊ុនហេង រដ្ឋមន្ដ្រីក្រសួង​សុខាភិបាល​បាន​លើកឡើង​ថា ក្នុង​រយៈពេល ២៥​ឆ្នាំ​កន្លងមកនេះ មូលនិធិ​គន្ធបុប្ជា ដែល​មាន​លោក​វេជ្ជបណ្ឌិត Beat Richner បាន​ពង្រីក ទីតាំង​មន្ទីរពេទ្យ​បាន ចំនួន​៥​សាខា នៅក្នុង​រាជធានី​ភ្នំពេញ និង​ខេត្ដ​សៀមរាប ដែល​បំពាក់​ទៅ​ដោយ​ឧបករណ៍​បច្ចេកវិទ្យា វេជ្ជសាស្ដ្រ បរិក្ខារ​ពេទ្យ​ទំនើបៗ និង​មាន​ចំណុះ​គ្រែ​សរុប​ចំនួន ២.១៥៩​គ្រែ ក្នុង​នោះ​ផ្នែក​សម្ភព មាន​ចំនួន​២២០​គ្រែ ព្រមទាំង​មាន​បុគ្គលិក​កម្ពុជា​ចំនួន ២.៥០០​នាក់ កំពុង​បម្រើ​ការងារ ដើម្បី​ផ្ដល់​សេវា សុខភាព ព្យាបាល​កុមារ និង​ស្ដ្រី​មាន​ផ្ទៃពោះ ប្រកប​ដោយ​វិជ្ជាជីវៈ គុណភាព និង​ប្រសិទ្ធភាព​ដោយ ឥតគិតថ្លៃ ដែល​មាន​អត្រា​គ្របដណ្ដប់ លើ​កុមារ​ទូទាំងប្រទេស​។​

​លោក​រដ្ឋមន្ត្រី បាន​បន្ដថា ក្រៅ​ពី​ការពិនិត្យ និង​ព្យាបាល​ជំងឺ​មន្ទីរពេទ្យ គន្ធបុប្ជា បាន​ដើរតួនាទី​យ៉ាងសំខាន់ ក្នុង​ការបណ្ដុះបណ្ដាល​ផ្នែក​វេជ្ជសាស្ដ្រ ឯកទេស​កុមារ ហើយ​បាន​ក្លាយទៅជា​មន្ទីរពេទ្យ​សកល​វិទ្យាល័យ ដែល​បាន​ជួយ​បណ្ដុះបណ្ដាល​និស្សិត ពេទ្យ​បាន យ៉ាង​ច្រើន​ថែមទៀត​ផង​៕ ដោយ​៖​កូឡាប​

+85571 614 000 5
Contact Us Telephone

spot_img