ដោយមើលឃើញថាកសិករកម្ពុជា ដែលប្រកបរបរកសិកម្ម បានថយចុះជាលំដាប់ពីមួយឆ្នាំទៅមួយឆ្នាំនោះ ទីភ្នាក់ងារបារាំងសម្រាប់ការអភិវឌ្ឍន៍ បានបញ្ជាក់ប្រាប់ក្រសួងកសិកម្ម ឲ្យផ្តល់នូវធាតុចូលសំខាន់ៗ ដែលជាបញ្ហាគន្លឹះ ដែលវិស័យកសិកម្មកំពុងប្រឈម និងអាចប្រឈមនាពេលខាងមុខ ខណៈដែលកំពុងរៀបចំគម្រោងអភិវឌ្ឍកសិកម្មថ្មី ដែលផ្តោតលើការវិនិយោគ ប្រព័ន្ធធារាសាស្ត្រ កាត់បន្ថយផលប៉ះពាល់បរិស្ថាន ពង្រឹងប្រព័ន្ធសុវត្ថិភាពស្បៀងអាហារ បង្កើនតម្លៃបន្ថែម ទៅលើផលិតផលកសិកម្ម ការគាំទ្រសហគមន៍។
លោក Vatche PAPAZIAN បានថ្លែងប្រាប់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន ថា គោលបំណងនៃ ជំនួបនេះគឺ ដើម្បីពិភាក្សាអំពីគម្រោងអភិវឌ្ឍវិស័យកសិកម្ម ជំហានថ្មី និងស្នើសុំការណែនាំពីក្រសួងដើម្បី ជំរុញឲ្យការ អនុវត្តគម្រោងនេះមានប្រសិទ្ធិភាព និងនិរន្តភាព។
ឆ្លៀតក្នុងឱកាសនេះ អ្នកស្រី Alexia HOFMANN អ្នកស្រី Alexia HOFMANN នាយកគម្រោង ផ្នែកកសិកម្ម អភិវឌ្ឍជនបទ និងជីវចម្រុះ របស់ទីភ្នាក់ងារបារាំងសម្រាប់ការអភិវឌ្ឍន៍នៅទីក្រុងប៉ារីស បានបញ្ជាក់ថា ទីភ្នាក់ងារបារាំងសម្រាប់ការអភិវឌ្ឍន៍ កំពុងរៀបចំគម្រោងអភិវឌ្ឍកសិកម្មថ្មី ដែលផ្តោតលើការវិនិយោគប្រព័ន្ធធារាសាស្ត្រ កាត់បន្ថយផលប៉ះពាល់បរិស្ថាន ពង្រឹងប្រព័ន្ធសុវត្ថិភាពស្បៀងអាហារ បង្កើនតម្លៃបន្ថែមទៅលើផលិតផលកសិកម្ម ការគាំទ្រសហគមន៍ និងចងក្រងជាសហភាពសហគមន៍ ការអនុវត្តកសិកម្មតាមកិច្ចសន្យា និងការធ្វើពិពិធកម្មកសិកម្ម ដែលមានភាពវៃឆ្លាតទៅនឹងស្ថានភាពអាកាសធាតុ។ ហើយ AFD ក៏សង្ឃឹមថា ស្ថាប័នពាក់ព័ន្ធទាំងអស់ ជាពិសេសក្រសួងកសិកម្ម នឹងផ្តល់នូវធាតុចូលសំខាន់ៗ ដែលជាបញ្ហាគន្លឹះដែលវិស័យកសិកម្មកំពុងប្រឈម និងអាចប្រឈមនាពេលខាងមុខ ដើម្បីធានាឲ្យការវិនិយោគនៃគម្រោងទទួលបាននូវលទ្ធផលវិជ្ជមាន។ ឯកឧត្តមរដ្ឋមន្ត្រី បានថ្លែងអំណរគុណដល់រដ្ឋាភិបាលបារាំង តាមរយៈទីភ្នាក់ងារបារាំងសម្រាប់ការអភិវឌ្ឍន៏ ដែលបាន និងកំពុងគាំទ្រដល់ការអភិវឌ្ឍន៏វិស័យកសិកម្មនៅកម្ពុជា ទាំងហេដ្ឋារចនាសម្ព័ន្ធផ្នែករឹងនិងទន់។
នៅថ្ងៃទី១៤ ខែវិច្ឆិកា ឆ្នាំ២០១៧ នៅទីស្តីការក្រសួងកសិកម្ម រុក្ខាប្រមាញ់ និងនេសាទ លោករដ្ឋមន្ត្រី វេង សាខុន បានទទួលជួបលោក Vatche PAPAZIAN និងអ្នកស្រី Alexia HOFMANN នាយកគម្រោង ផ្នែកកសិកម្ម អភិវឌ្ឍជនបទ និងជីវចម្រុះ របស់ទីភ្នាក់ងារបារាំងសម្រាប់ការអភិវឌ្ឍន៍នៅទីក្រុងប៉ារីស។ លោករដ្ឋមន្ត្រី បានមានប្រសាសបន្តថា ចំនួនកសិករដែលប្រកបរបរកសិកម្ម បានថយចុះជាលំដាប់ដោយនៅក្នុងឆ្នាំ២០១៧ ចំនួនកសិកម្មបានថយមកត្រឹមជាង ៤២ភាគរយ និងនៅក្នុងឆ្នាំ២០៣០ ខាងមុខនឹងថយមកត្រឹម ២៩ភាគរយតែប៉ុណ្ណោះ។
លោករដ្ឋមន្ត្រី បានមានប្រសាសន៍ថា ដោយមើលឃើញពីការវិវឌ្ឍនេះ ក្រសួងកសិកម្ម រុក្ខាប្រមាញ់ និងនេសាទ បាន និងកំពុងជំរុញឲ្យមានការពង្រីក ការប្រើប្រាស់គ្រឿនយន្តកសិកម្ម និងប្រព័ន្ធធារាសាស្ត្រ បែបទំនើប ដើរដោយប្រព័ន្ធស្វ័យប្រវត្តិ ដើម្បីកាត់បន្ថយការប្រើប្រាស់កម្លាំងពលកម្ម និងផ្តល់ភាពងាយស្រួល ដល់កសិករក្នុងការបង្កបង្កើនផល។ ក្រសួងក៏មានគោលនយោបាយ ជំរុញការអភិវឌ្ឍវិស័យកសិកម្ម ដោយផ្អែកទៅតាមតម្រូវការទីផ្សារ និងការអនុវត្តកិច្ចសន្យាកសិកម្ម ដើម្បីធានាដល់និរន្តភាពនៃការដាំដុះ និងបង្កើនកម្រិតជីវភាពប្រជាកសិករ។ ទន្ទឹមនឹងនេះ ក្រសួងក៏បានយកចិត្តទុកដាក់ លើការផ្សព្វផ្សាយការធ្វើពិពិធកម្មកសិកម្ម តាមរយៈការការយល់ដឹង ពីលក្ខណៈសេដ្ឋកិច្ច នៃការប្រើប្រាស់ដីកសិកម្មដែលមាន ឲ្យស្របទៅតាមស្ថានភាពធនធាន ដែលមាន ដើម្បីធានាឲ្យមានតុល្យភាព រវាងកំណើនសេដ្ឋកិច្ច និងចំណូលកសិករ៕ ដោយ៖បញ្ញាស័ក្តិ
