ភ្នំពេញ៖ ប្រទេសកម្ពុជា បានបង្ហាញពីសញ្ញាវិជ្ជមានគួរឲ្យកត់សម្គាល់ នៃទិសដៅការធ្វើពិពិធិកម្មមុខទំនិញនាំចេញផលិតផល ក្រៅការកាត់ដេរ ដើម្បីបង្កើតមូលដ្ឋានសេដ្ឋកិច្ចកាន់ តែរឹងមាំ និងមានតម្លៃបន្ថែមខ្ពស់។
បើយោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា បានឲ្យដឹងថា កម្ពុជា បាននាំចេញផលិតផលគ្រឿងម៉ាស៊ីន ឧបករណ៍អគ្គិសនី គ្រឿងបន្លាស់ និងគ្រឿងអេឡិចត្រូនិក មានតម្លៃទឹកប្រាក់សរុប ១,៥៨ពាន់លានដុល្លារអាមេរិក នៅឆមាសទី ១ឆ្នាំ ២០២៣ កើនឡើង ១០៨,៧% បើធៀបនឹងរយៈពេលដូចនិងឆ្នាំមុន។
វិស័យយានយន្ត និងអេឡិចត្រូនិក ត្រូវបានរាជរដ្ឋាភិបាលជ្រើសរើស និងកំណត់ជាវិស័យអាទិភាព ដើម្បីចូលរួមចំណែកដល់ការស្តារសេដ្ឋកិច្ចកម្ពុជា ក្រោយវិបត្តិជំងឺកូវីដ-១៩ និងជំរុញកំណើនសេដ្ឋកិច្ចរយៈពេលវែង ព្រមទាំងការធ្វើទំនើបកម្ម និងពិពិធកម្ម ដែលមានសង្គតិភាពជាមួយ«គោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ ២០១៥-២០២៥»។
បច្ចុប្បន្នរាជដ្ឋាភិបាលកម្ពុជា បានរៀបចំសេចក្តីព្រាងផែនទីបង្ហាញផ្លូវអភិវឌ្ឍន៍វិស័យយានយន្ត និងអេឡិចត្រូនិករបស់ខ្លួន ដែលរំពឹងថា វានឹងអាចបង្កើនទំហំនាំចេញក្នុងទឹកប្រាក់លើសពី ២ពាន់លានដុល្លារ និងអាចបង្កើតការងារថ្មីជាង ២២ពាន់កន្លែងក្នុងរយៈពេល ៥ឆ្នាំខាងមុខ ក៏ដូចជាបង្កើនកាលានុវត្តភាពថ្មីៗសម្រាប់សហគ្រាសធុនតូច និងមធ្យមក្នុងស្រុកក្នុងវិស័យទាំងនេះ។
ដោយឡែក សម្រាប់វិស័យកម្មន្តសាល មិនមែនកាត់ដេរ នៅតែបន្តបានរក្សាកំណើនខ្ពស់ ដោយសារសក្តានុពលខ្ពស់នៃផលិតកម្មបម្រើឲ្យការនាំចេញ ស្របពេលដែលផលិតកម្មបម្រើឲ្យទីផ្សារក្នុងស្រុក នៅបន្តនិន្នាការល្អប្រសើរ។
គួរបញ្ជាក់ថា រាជដ្ឋាភិបាល បានកំណត់ទិសដៅប្រែក្លាយប្រទេសកម្ពុជា ទៅជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងចំណូលខ្ពស់ នៅឆ្នាំ ២០៥០។ ដើម្បីសម្រេចមហិច្ឆតានេះ កម្ពុជា ត្រូវមានមូលដ្ឋានសេដ្ឋកិច្ចរឹងមាំ និងងាកទៅផលិតមុខទំនិញដែលមានតម្លៃបន្ថែមខ្ពស់៕