ដូចដែលប្រិយមិត្តបានទទួលជ្រាបរួចហើយ ករណីស្រ្តីជនជាតិបារាំង ដែលបានបង្ខំចិត្តលោតចុះពីកង់បី (PassApp) កាលពីវេលាទៀបភ្លឺថ្ងៃទី៥ ខែសីហា ឆ្នាំ២០២៣ បន្ទាប់ពីបានដឹងថាអ្នករត់កង់បីមានបំណងអ្វីមិនល្អ មកលើរូបនាង ដែលបណ្តាលឲ្យរងរបួសគួរឲ្យអាសូរ។
តែទន្ទឹងនឹងករណីនេះ ត្រូវបានមហាជននៅលើបណ្តាញសង្គម ជំរុញឲ្យអាជ្ញាធរសមត្ថកិច្ចខេត្តបាត់ដំបង ស្រាវជ្រាវរកមុខអ្នករត់កង់បីខិលខូចនោះ មកផ្តន្ទាទោសកុំឲ្យរួចខ្លួនឲ្យសោះ ខណៈស្រ្តីបរទេសរងគ្រោះក៏បានដាក់ពាក្យបណ្តឹងរួចរាល់ផងដែរនោះ នៅទីបំផុត កម្លាំងសមត្ថកិច្ចខេត្តបាត់ដំបង បានស្រាវជ្រាវ និងឈានធ្វើការឃាត់ខ្លួនអ្នករត់កង់បីមានគំនិតដ៏អាក្រក់រូបនេះ បន្ទាប់ពីធ្វើប៉ុនប៉ងសកម្មភាពមិនបានប៉ុន្មានម៉ោង។
យោងតាមទំព័រហ្វេសប៊ុក ស្នងការដ្ឋានគរបាលខេត្តបាត់ដំបង បាន Update ព័ត៌មានលម្អិតករណីប៉ុនប៉ងរបស់អ្នករត់កង់បីរូបនេះឲ្យដឹងថា នៅចំពោះមុខសមត្ថកិច្ចជនសង័្សយបានឆ្លើយបង្វែងស្ថានភាព និងដោះសារជាមួយសមត្ថកិច្ចជាច្រើនលើកច្រើនសារ ប៉ុន្តែនៅទីបំផុត រូបគេបានឆ្លើយថា សកម្មភាពរបស់គេនាវេលាទៀបភ្លឺថ្ងៃទី៥ ខែ សីហា ឆ្នាំ២០២៣ ចំពោះ ស្រី្តជាជនជាតិបរទេសនោះ គឺប៉ុនប៉ង(គំរាមប្លន់)យកទ្រព្យសម្បត្តិរបស់ស្រ្តីរងគ្រោះ នៅពេលដែលរូបគេដឹកស្រ្តីរូបនោះទៅដល់ចំណុចស្ងាត់ណាមួយក្នុងភូមិសាស្រ្ត សង្កាត់អូរចារក្រុងបាត់ដំបង តែប៉ុណ្ណោះ គឺពុំមានសកម្មភាពអ្វីផ្សេងនោះទេ។
សូមជម្រាបជូនថា នាវេលាទៀបភ្លឺថ្ងៃទី០៥ ខែ សីហា ឆ្នាំ ២០២៣ វេលាម៉ោង ០៤និង០៧ នាទីនៅចំណុចលើផ្លូវបេតុង ស្ថិតនៅក្នុងភូមិ អញ្ចាញ សង្កាត់អូរចារ ក្រុងបាត់ដំបង ខេត្តបាត់ដំបង ជនសង្ស័យខាងលើបានធ្វើសកម្មភាពប្រើប្រាស់ម៉ូតូកង់បី ដឹកជនរងគ្រោះ ឈ្មោះ DIETSCHY HELENE EMMA ភេទស្រី អាយុ ២២ ឆ្នាំ ជនជាតិ បារាំង ពីចំណុចផ្លូវបេតុងក្រោយផ្សារវត្តលៀប ស្ថិតក្នុងភូមិវត្តលៀប សង្កាត់ចំការសំរោង ក្រុងបាត់ដំបង ខេត្តបាត់ដំបង ដោយជនរងគ្រោះប្រាប់ថាឱ្យជូនទៅផ្ទះសំណាក់ ពេជ្រ ខៀវ ប៉ុន្តែជនសង្ស័យខាងលើមិនបានជូនទៅផ្ទះសំណាក់ទេ ហើយជិះទៅតាមផ្លូវបេតុងក្រោយផ្សារ ភួ ពុយ ពេលនោះជនរងគ្រោះបានប្រាប់ថាឱ្យឈប់ ប៉ុន្តែជនសង្ស័យខាងលើមិនឈប់ ទើបបត់ឆ្វេងបណ្តាលឱ្យក្រឡាប់ម៉ូតូកង់បី ហើយជនរងគ្រោះក៏បានឱកាសលោតរត់ចេញពីកង់បីនោះ បណ្តាលឱ្យរងរបួសបាក់ឆ្អឹងម្រាមដៃកណ្តាល និងរលាត់ស្បែកលើច្រមុះ និងកែងដៃខាងស្តាំ ហើយភ្លាមៗអ្នកបើកម៉ូតូកង់បី បានលើកម៉ូតូនោះជិះគេចខ្លួនបាត់ទៅ។
នៅថ្ងៃដដែលនេះ សមត្ថកិច្ចនគរបាល បានទទួលព័ត៌មាននេះពីអ្នកប្រើប្រាស់បណ្តាញសង្គម ទើបសមត្ថកិច្ច ធ្វើការស្រាវជ្រាវភ្លាមៗស្វែងរកជនរងគ្រោះ និងសាក្សី ភស្តុតាងនានា រហូតដល់ថ្ងៃទី៧ ខែ សីហា ឆ្នាំ ២០២៣ ទើបសមត្ថកិច្ចកំណត់មុខសញ្ញាបាននិងឈានដល់ការឃាត់ខ្លួនបានតែម្តង។
តែអ្វីដែលមិននឹកស្មានដល់នោះ គឺថាជនសង្ស័យឈ្មោះ ទេព ភាឡី ហៅលីញ រូបនេះ ធ្លាប់ត្រូវបានសមត្ថកិច្ចនគរបាលនៃស្នងការដ្ឋាននគរបាល ខេត្តបាត់ដំបង ធ្វើការបង្រ្កាបឃាត់ខ្លួនបញ្ជូនទៅអនុវត្តទោសតាមផ្លូវច្បាប់ម្តងរួមមកហើយ កាលពីថ្ងៃទី០១ ខែវិច្ឆិកាឆ្នាំ២០១៨ ដែលកាលនោះរូបគេបានធ្វើសកម្មភាពឆក់យកទ្រព្យសម្បត្តិរបស់ជនរងគ្រោះម្នាក់ជាស្ត្រីជនជាតិបារាំងផងដែរ នៅថ្ងៃទី៣១ ខែតុលា ឆ្នាំ២០១៨ នៅក្រុងបាត់ដំបង ប៉ុន្តែក្រោយពីចេញពីពន្ធនាគារវិញ រូបគេនៅតែបន្តប្រព្រឹត្តិសកម្មភាពបែបនេះបន្តទៀត ដោយគ្មានការរាងចាលនោះឡើយ ដែលពេលនេះសមត្ថកិច្ចនគរបាលកំពុងរៀបចំសំណុំរឿងបញ្ជូនជនសង័្សយ និងវត្ថុតាងទៅកាន់អយ្យការអមសាលាដំបូងខេត្តបាត់ដំបង អនុវត្តទោសជាថ្មីម្តងទៀតទៅតាមផ្លូវច្បាប់៕ រក្សាសិទ្ធិដោយ៖ លឹម ហុង
