ថ្វីត្បិតជនរងគ្រោះត្រូវបានគេចាប់រំលោភក្ដី ប៉ុន្ដែនារីវ័យ១៥ឆ្នាំរូបនេះនៅតែត្រូវបានកាត់ទោសឱ្យជាប់គុក ក្រោមការចោទប្រកាន់ថានាងបានបំពានច្បាប់អនីតិជនក្នុងការរម្លូតកូន។
នារីម្នាក់ចូលរួមក្នុងបាតុកម្មប្រឆាំងការរំលោភបំពានក្មេងមិនទាន់ពេញវ័យ
AFP បានដកស្រង់សម្ដីអ្នកនាំពាក្យតុលាការស្រុក Muara Bulian លើកោះស៊ូម៉ាត្រា Listyo Arif Budiman ឱ្យដឹងថា ក្មេងស្រីដែលរងការចោទប្រកាន់នោះត្រូវកាត់ទោសឱ្យជាប់គុក៦ខែ ពីបទបានបំពានច្បាប់ការពារក្មេងមិនទាន់ពេញវ័យ ហើយរម្លូតកូន។នៅថ្ងៃនោះដែរ បងប្រុសបង្កើតរបស់នាងមានអាយុ១៧ឆ្នាំ ដែលជាជនចាប់រំលោភក៏ត្រូវបានកាត់ទោសឱ្យជាប់គុក២ឆ្នាំ។
ប៉ូលិសបានចាប់ខ្លួនបងប្អូន២នាក់នេះកាលពីខែមិថុនា ក្រោយពេលពួកគេរកឃើញសាកសពទារកម្នាក់នៅជិតចម្ការដូងប្រេង Lulau ខេត្ដJambi ។ក្មេងស្រីរូបនេះបានត្រូវបងប្រុសចាប់រំលោភចាប់ពីខែកញ្ញាឆ្នាំ២០១៧។ម្ដាយរបស់ក្មេងស្រីក៏កំពុងប្រឈមមុខនឹងការជាប់ពន្ធនាគារដែរ ព្រោះបានជួយកូនស្រីឱ្យរម្លូតកូន។
ឥណ្ឌូណេស៊ីបានហាមឃាត់ការរម្លូតកូន លើកលែងតែគភ៌នេះអាចប៉ះពាល់អាយុជីវិតម្ដាយ ឬក្នុងករណីលើកលែងដែលជន រងគ្រោះរងការរំលោភផ្លូវភេទ។ ការរម្លូតទាមទារត្រូវបានដំណើរការដោយអ្នកមានជំនាញ ហើយគភ៌នោះត្រូវមានអាយុមិនលើសពី៦សប្ដាហ៍៕
សូយន
