នៅរដូវក្តៅខែឧសភា ឆ្នាំ១៩៧៣ កំពូលតារាក្បាច់គុនកុងហ្វូ លី សៀវឡុង (Bruce Lee) បានទទួលមរណភាពក្នុងអាយុ ៣២ ឆ្នាំ ប៉ុន្មានសប្តាហ៍មុនពេលការចេញផ្សាយខ្សែភាពយន្ត «នាគកំណាចឆ្លងដែន» (Enter the Dragon) ។ នោះគឺពេលកំពុងថតរឿងចុងក្រោយនេះ គាត់បានដួលសន្លប់ ហើយត្រូវបានគេបញ្ជូនទៅមន្ទីរពេទ្យ Hong Kong Baptist ក្នុងទីក្រុង Kowloon។ នៅពេលនោះ ការធ្វើកោសល្យវិច័យរបស់គ្រូពេទ្យបានបង្ហាញថា លី សៀវឡុង បានស្លាប់ដោយសារការហើមខួរក្បាល។
ទន្ទឹមនឹងនោះផងដែរ ការស្លាប់ភ្លាមៗរបស់គាត់ ក៏បានបង្កឱ្យមានពាក្យចចាមអារ៉ាមថា គាត់អាចត្រូវបានធ្វើឃាតដោយក្រុមក្មេងទំនើង, ដាក់ថ្នាំបំពុលដោយគូស្នេហ៍ប្រច័ណ្ឌ។ រីឯទ្រីស្តីផ្សេងទៀត បានគិតថាគាត់ស្លាប់ដោយសារកំដៅ។
ទោះជាយ៉ាងណា ថ្មីៗនេះ ការសិក្សាមួយដែលត្រូវបានចេញផ្សាយនៅក្នុងទស្សនាវដ្តីវេជ្ជសាស្ត្រ Clinical Kidney Journal (USA) បានសន្មត់ថា លី សៀវឡុង បានស្លាប់ដោយសារតែការថយចុះកម្រិតសូដ្យូម ដែលបណ្តាលមកពីការលើសជាតិទឹក។
ជាការពិត ការលើសជាតិទឹកខ្លាំង ក៏អាចបណ្តាលឱ្យរលាកខួរក្បាលផងដែរ។
ក្រុមអ្នកស្រាវជ្រាវបាននិយាយថា «និយាយម្យ៉ាងទៀត យើងបានរកឃើញថា អសមត្ថភាពរបស់តម្រងនោម ក្នុងការបញ្ចេញទឹកច្រើនពេក បានសម្លាប់លោក លី សៀវឡុង»។
ពួកគេបាននិយាយថា កត្តាជាច្រើនបានណែនាំ លី សៀវឡុង ផឹកទឹកច្រើន ដូចដែលប្រពន្ធរបស់គាត់ Linda បាននិយាយអំពីរបបអាហារដែលមានជាតិរាវ ដែលរួមមានការ៉ុត និងទឹកផ្លែប៉ោម។ ហើយទន្ទឹមនឹងនោះ អ្នកសរសេរជីវប្រវត្តិរបស់ លី សៀវឡុង គឺ Matthew Polly ក៏បាននិយាយម្តងហើយម្តងទៀតថា លី សៀវឡុង បានផឹកទឹកនៅថ្ងៃដែលគាត់ស្លាប់ ហើយមុនពេលគាត់ធ្លាក់ខ្លួនឈឺធ្ងន់តែម្តង។
ក្រៅពីនេះ លី សៀវឡុង ក៏ត្រូវបានគេនិយាយថា បានប្រើប្រាស់សារធាតុរំញោច ដែលធ្វើអោយគាត់មានអារម្មណ៍ស្រេកទឹកផងដែរ។
ការសិក្សាបានព្យាករណ៍ថា ទោះបីជា លី សៀវឡុង មិនបានផឹកទឹកច្រើនក៏ដោយ ក៏តម្រងនោមរបស់តារាសម្តែងក្បាច់គុនដ៏កំពូលគ្មានរូបនេះ ទំនងជាមិនអាចដំណើរការបាន សូម្បីតែការទទួលទានទឹកធម្មតាក៏ដោយ។
គួរឲ្យដឹងផងដែរថា កើតនៅទីក្រុង San Francisco ក្នុងឆ្នាំ 1940 ប៉ុន្តែធំឡើងនៅទីក្រុងហុងកុង (ប្រទេសចិន) លី សៀវឡុង បានចាប់ផ្ដើមលេចមុខក្នុងខ្សែភាពយន្តកាលពីក្មេង ហើយបានសិក្សាកុងហ្វូកាលពីវ័យជំទង់។ ឪពុកម្តាយរបស់ សៀវឡុង មានការព្រួយបារម្ភនៅពេលដែលកូនប្រុសរបស់ពួកគេតែងតែឈ្លោះគ្នាតាមដងផ្លូវ ហើយបានបញ្ជូនគាត់ទៅសហរដ្ឋអាមេរិកនៅអាយុ ១៨ ឆ្នាំ។ នៅទីនោះ លី សៀវឡុង បានទាក់ទាញការចាប់អារម្មណ៍ពីផលិតករភាពយន្តនៅពេលសម្តែង Kungfu ក្នុងការប្រកួតការ៉ាតេនៅ Los Angeles ។ គាត់ត្រូវបានគេឲ្យដើរតួសម្ដែងក្នុងរឿង The Green Hornet (1966-67)។
បន្ទាប់ពីតស៊ូស្វែងរកការងារធ្វើ សៀវឡុង បានវិលត្រលប់ទៅហុងកុងវិញនៅឆ្នាំ 1971 ហើយបានសម្តែងក្នុងខ្សែភាពយន្តចំនួនពីរដែលបានបំបែកកំណត់ត្រាអាស៊ី ចាប់តាំងពីពេលនោះមក៕ រក្សាសិទ្ធិដោយ៖ លឹម ហុង
