រាជធានីភ្នំពេញ ៖ ឯកឧត្តម ឧត្តមសេនីយ៍ឯក ជា ពៅ បានបញ្ជាក់ថា នាពេលអនាគតប្រព័ន្ធ Hotline Scam នឹងដើរតួនាទីយ៉ាងសំខាន់ក្នុងការដាក់ពាក្យបណ្តឹងតាមប្រព័ន្ធអនឡាញ ហើយតម្រូវឲ្យមន្ត្រីជំនាញទាំងអស់ ត្រូវយល់ដឹងឲ្យបានច្បាស់អំពីប្រព័ន្ធខាងលើនេះ ក៏ដូចជាត្រូវមានជំនាញ និងចំណេះដឹងអំពីបទល្មើសបច្ចេកវិទ្យា។
ឯកឧត្តម ឧត្តមសេនីយ៍ឯក ជា ពៅ អគ្គស្នងការរងនគរបាលជាតិ បានថ្លែងយ៉ាងដូច្នេះ ក្នុងឱកាសអញ្ជើញជាអធិបតី នៅក្នុងកម្មវិធីបណ្តុះបណ្តាល និងផ្សព្វផ្សាយប្រព័ន្ធ Hotline Scam 24/7 ដែលរៀបចំឡើងដោយអគ្គស្នងការដ្ឋាននគរបាលជាតិ នៅទីស្តីការក្រសួងមហាផ្ទៃ នាព្រឹកថ្ងៃព្រហស្បតិ៍ ទី១៤ ខែធ្នូ ឆ្នាំ២០២៣នេះ ។
ឯកឧត្តម ឧត្តមសេនីយ៍ឯក ជា ពៅ បានប្រកាសផ្សព្វផ្សាយអំពីប្រព័ន្ធ Hotline Scam របស់អគ្គស្នងការដ្ឋាននគរបាលជាតិ ដែលបានដាក់ដំណើរការនាពេលកន្លងមក ក៏ដូចជាធ្វើការចែករំលែកនូវចំណេះដឹងពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា។
ឯកឧត្តមអគ្គស្នងការរងនគរបាលជាតិ បានបន្តថា អស់លោកឧត្តមសេនីយ៍ វរសេនីយ៍ បានដឹងហើយ បច្ចុប្បន្ននេះ គឺយើងនិយាយអំពីយុទ្ធសាស្ត្របញ្ចកោណដំណាក់កាលទី៧ របស់រាជរដ្ឋាភិបាល ដែលក្នុងនោះ ឯកឧត្តមបានលើកយកមួយចំណុច គឺកសាងធនធានមនុស្ស តែទន្ទឹមនឹងកសាងធនធានមនុស្សបាន ល្គឹកណារដ្ឋាភិបាលជារដ្ឋាភិបាលឌីជីថល ។ ដូច្នេះហើយវគ្គឌីជីថលនេះ បង្កើតឡើងដោយផ្អែកលើគោលការណ៍របស់រាជរដ្ឋាភិបាល របស់ក្រសួងមហាផ្ទៃ ក៏ដូចជាអគ្គស្នងការដ្ឋាននគរបាលជាតិ ដែលមានឯកឧត្តម នាយឧត្តមសេនីយ៍ ស ថេត ជាអគ្គស្នងការនគរបាលជាតិ ដែលជាអ្នកផ្តួចផ្តើមគំនិតបង្កើតឲ្យមានវគ្គនេះឡើង ដើម្បីឆ្លើយតបទៅនឹងគោលនយោបាយរបស់រាជរដ្ឋាភិបាល។
ឯកឧត្តម ឧត្តមសេនីយ៍ឯក ជា ពៅ បានស្នើសុំឲ្យសិក្ខាកាមដែលបានចូលរួមវគ្គខាងលើនេះ ជួយធ្វើការចែករំលែកចំណេះដឹងបន្តទៅតាមបណ្តាអង្គភាពសាមីរបស់ខ្លួន ហើយនៅថ្ងៃខាងមុខនឹងមានការរៀបចំវគ្គបណ្តុះបណ្តាលបន្ថែមទៀត ដើម្បីពង្រឹងទៅដល់មន្ត្រីតាមបណ្តាស្នងការដ្ឋាននគរបាលរាជធានី-ខេត្ត៕ រក្សាសិទ្ធដោយ ៖ សុទ្ធលី
