ស្រ្តីជនជាតិថៃអ្នកលក់មាន់ល្បីពូកែសន្សំលុយក្នុងធនាគារ «ធុងទឹក» នៅថ្ងៃទី០២ ខែមករា ឆ្នាំ២០២៤ កន្លងទៅថ្មីៗនេះ បានធ្វើឲ្យមានការចាប់អារម្មណ៍សារជាថ្មី បន្ទាប់ពីបានប្រមូល «លុយសន្សំ» ក្នុងរយៈ១ឆ្នាំពេញបានសរុបរហូតដល់ទៅជិត ១ម៉ឺនដុល្លារ ដ៏មិនធម្មតានោះទេ។
ជាក់ស្តែង នៅក្នុងសារបង្ហោះនៅលើគណនីហ្វេសប៊ុករបស់ខ្លួនឈ្មោះថា Parinatra Soonklang ស្រ្តីអ្នកលក់មាន់ស្រស់ មកពី Damnoen Saduak, Ratchaburi បានសរសេររៀបរាប់ថា៖ «កាដូថ្ងៃចូលឆ្នាំសកល 2024 បញ្ចប់ការរង់ចាំថ្ងៃ 1 មករា 2023 រហូតដល់ 31 ធ្នូ 2023 ធនាគារក្រដាសប្រាក់ 50 បាត សរុប 6,601 x 50 = 330,050 បាត ឆ្នាំនេះពិតជាឆ្នាំដែលលើសពីការរំពឹងទុក។ ខ្ញុំមិនដែលស្រមៃថាការយកឈ្នះខ្លួនឯងនឹងនាំមកនូវរង្វាន់ដ៏អស្ចារ្យបែបនេះទេ។ ខំប្រឹងអត់ឈប់សំរាក ព្រោះចង់មានថ្ងៃនេះ អរគុណម៉ាក់ដែលតែងតែនៅក្បែរខ្ញុំ។ អរគុណកូនប្រុសសម្រាប់ការលើកទឹកចិត្ត សន្សំទុកក្រដាសប្រាក់ 50បាត ក្នុងធនាគារធុងទឹកពិតជាមិនខកបំណងនោះទេ!»។
អ្នកស្រី ប៉ារិន ត្រា ម្ចាស់ធនាគារសន្សំប្រាក់រូបនេះ នៅរសៀលថ្ងៃទី៣១ ខែធ្នូ ឆ្នាំ២០២៣ បានបង្ហាញសកម្មភាពចាក់លុយ ៥០បាត ពេញមួយធុងទឹកដែលសន្សំរយៈពេលមួយឆ្នាំ។ បន្ទាប់ពីប្រើពូថៅដើម្បីកាប់ធុងរហូតដល់បែក អ្នកស្រី ប៉ារិន បានថតរូបភាព និងវីដេអូទុកជាភស្តុតាងថា សាច់ប្រាក់ទាំងអស់នេះគាត់បានរក្សាទុកក្នុងធុងទឹកចាប់ពីថ្ងៃទី 1 ខែមករា ឆ្នាំ 2023 ដល់ថ្ងៃទី 31 ខែធ្នូ ឆ្នាំ 2023 គឺជាការពិត។ តាមរយៈការរាប់លុយប្រភេទ ៥០ បាត ចំនួន ៦,៦០១ សន្លឹក សរុបជាទឹកប្រាក់ ៣៣០,០៥០ បាត គឺត្រូវចំណាយពេលជាង ៣ ម៉ោងដើម្បីបញ្ចប់ ដោយមានការជួយរាប់ពីម្តាយ បងស្រី និងកូនប្រុសរបស់នាង។
អ្នកស្រ្តី ប៉ារិន ត្រា បាននិយាយថា នេះជាលើកទី៥ហើយ ដែលអ្នកស្រីបានសន្សំលុយ បន្ទាប់ពីមានការបំផុសគំនិតពីអ្នកនិយមលេងអ៊ីនធឺណែត ដែលបានចេញមកចែករំលែកអំពីការសន្សំលុយក្នុងធុងទឹក ដែលអ្នកស្រីបានព្យាយាមធ្វើ និងបានជោគជ័យចំនួន ៤ លើក រួចមកហើយ។ រីឯវិធីនៃការសន្សំ គឺនៅពេលដែលអ្នកស្រីទទួលបានលុយពីអតិថិជនក្នុងក្រដាសប្រាក់ ៥០ បាត អ្នកស្រីនឹងជ្រើសរើសក្រដាសថ្មីមួយ ដាក់វានៅក្នុងធុង។ នៅថ្ងៃណាដែលអាចទទួលបានច្រើន សូមដាក់ឲ្យបានច្រើន។ តែបើថ្ងៃណាដែលទទួលបានតិច ក៏ទម្លាក់តិចតាមហ្នឹង។ ហេតុដូច្នេះ អ្នកលក់ដូរដែលចូលចិត្តទុកលុយ ៥០ បាត គួរតែចាប់ផ្តើមដាក់ក្នុងធុងទឹក ចាប់ពីថ្ងៃទី១ ខែមករា រហូតរយៈពេលពេញមួយឆ្នាំដល់ថ្ងៃទី៣១ ខែធ្នូ។
អ្នកស្រី ប៉ារិន បន្តថា នេះជាការប្រមូលផលឆ្នាំទី៥ហើយ។ ប៉ុន្តែ អ្នកស្រីមិនបានរំពឹងថានឹងទទួលបានច្រើនបែបនេះទេ។ ប្រមូលបានលើកដំបូងក្នុងឆ្នាំ២០១៨ បានចំនួន៦៨.០០០បាត ។ លើកទីពីរក្នុងឆ្នាំ 2019-2020 គឺអំឡុងពេលមានការរីករាលដាលជំងឺកូវីដ-១៩ ប្រមូលបាន ១៤៧,៨០០បាត លើកទី៣ ក្នុងឆ្នាំ២០២១ ចំនួន ១៨០,៨៥០បាត និងលើកទី៤ នៅឆ្នាំ២០២២ ចំនួន ២៧៨,១០០បាត។ លើកនេះក្នុងឆ្នាំ២០២៣ ចំនួនទឹកប្រាក់ ៣៣០.០៥០បាត ។ ជាមួយគ្នានេះ ថវិកាចំនួន ១សែនបាត អ្នកស្រីបានប្រគល់ជូនម្តាយ ដើម្បីទៅធ្វើបុណ្យនៅកន្លែងផ្សេងៗ ហើយនៅសល់ប៉ុន្មានទៀត នឹងយកទៅដាក់ក្នុងធនាគារ និងប្រើដើម្បីសងបំណុល និងសម្រាប់ការសិក្សាកូនប្រុស។
តែនៅពេលអ្នកយកព័ត៌មានសួរថា តើប្រើវិធីអ្វីដើម្បីសន្សំលុយរហូតដល់ជោគជ័យ? អ្នកស្រី ប៉ារិន ត្រា បានឆ្លើយថា ទី១ គឺចេតនា ការតាំងចិត្ត។ ប្រាក់ដែលប្រើសម្រាប់ការទម្លាក់ចុះនេះ មិនត្រូវបង្កបញ្ហាដល់ដើមទុន ឬលុយដែលប្រើសម្រាប់ចំណាយប្រចាំថ្ងៃឡើយ។ បើនៅសល់ច្រើន ដូច្នេះយើងរក្សាទុកច្រើន បើមានតិច យើងទុកតិច (សន្សំទៅតាមកាលៈទេសៈ)។ សំខាន់ជាងនេះទៅទៀត យើងមិនត្រូវគិតថាយើងមានធុងនេះដើម្បីទុកលុយនោះទេ។ ចូរធ្វើដូចយើងភ្លេច ហើយកុំដើរលេងពេលយប់ កុំផឹកស្រា ត្រូវឧស្សាហ៍ព្យាយាម នោះយើងនឹងជោគជ័យ។ ជាមួយគ្នានេះ អ្នកស្រីក៏ចង់លើកទឹកចិត្តអ្នកដែលសន្សំសំចៃ កុំអស់សង្ឃឹម «ត្រូវអត់ធ្មត់ទុកលុយដែលនៅសល់មិនប៉ះពាល់ដល់ការចំណាយ»៕ រក្សាសិទ្ធិដោយ៖ លឹម ហុង
