ភ្នំពេញ៖ ក្នុងឱកាសអញ្ជើញបើកវិញ្ញាសារសរសេរដំបូង សម្រាប់ការប្រឡងប្រជែងជ្រើសរើសគ្រូបង្រៀនឯកទេសអប់រំកាយ និងកីឡា នៅព្រឹកថ្ងៃទី២៨ ខែមករា ឆ្នាំ២០២៤នេះ ឯកឧត្តម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង បានបញ្ជាក់បន្ថែមពាក់ព័ន្ធដំណើរការប្រឡងនេះ ដោយឈរលើចម្បងគឺគុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។
តាមរយៈកិច្ចសម្ភាសជាមួយអ្នកសារព័ត៌មាន ឯកឧត្តមរដ្ឋមន្ដ្រី ហ៊ុន ម៉ានី នៅតែអះអាងថា ដំណើរការប្រឡងប្រជែងជ្រើសរើសគ្រូឯកទេសអប់រំ និងកីឡា នឹងប្រព្រឹត្តទៅក្នុងស្ថានភាពតឹងរឹងបំផុត តាមគោលការណ៍ អ្នកចេះ គឺជាប់ ជាប់ដោយមោទនៈ និងធ្លាប់ដោយអស់ចិត្ត ហើយស្របតាមការណែនាំ និងទស្សនវិស័យដឹកនាំដ៏វែងឆ្ងាយ ក្នុងឆន្ទៈកែទម្រង់រដ្ឋបាលសាធារណៈរបស់សម្តេចធិបតី នាយករដ្ឋមន្ត្រី។
នៅមណ្ឌលប្រឡងប្រជែងជ្រើសរើសគ្រូបង្រៀន ឯកទេសអប់រំកាយ និងកីឡា ថ្ងៃនេះ មានវត្តមានក្រុមគ្រួសារ អាណាព្យាបាល ជាច្រើនរូបបានមកចាំគាំទ្រ លើកទឹកចិត្តបេក្ខជនដែលកំពុងប្រឡងប្រជែង។ ពិតណាស់ ពូមីង បងប្អូនប្រជាពលរដ្ឋ ប្រាកដជាមានការព្រួយបារម្ភពីសុខទុក្ខរបស់បេក្ខជនជាកូន ជាប្អូន ជាក្មួយ ដែលកំពុងប្រឡងប្រជែងនៅខាងក្នុង តែសូម ពូមីង បងប្អូន កុំមានការព្រួយបារម្ភលើយន្តការ និងនីតិវិធីនៃការរៀបចំការប្រឡងប្រជែងដែលកំពុងអនុវត្តយ៉ាងល្អិតល្អន់ជាទីបំផុត។
ក្រសួងមុខងារសាធារណៈ មានភារកិច្ច និងទំនួលខុសត្រូវខ្ពស់ក្នុងការធានាថា បេក្ខជនគ្រប់ៗរូបមានឱកាសប្រឡងប្រជែងស្មើៗគ្នា ក្នុងស្មារតីទទួលខុសត្រូវ ជាមួយសមត្ថភាព «ចេះ គឺជាប់» ស្របតាមការណែនាំ និងទស្សនវិស័យដឹកនាំដ៏វែងឆ្ងាយ ក្នុងឆន្ទៈកែទម្រង់រដ្ឋបាលសាធារណៈរបស់សម្តេចធិបតី នាយករដ្ឋមន្ត្រី។ ដូច្នេះ សូមពូមីង បងប្អូនជឿជាក់លើប្រព័ន្ធរៀបចំការប្រឡងជ្រើសរើសមន្ត្រីរាជការស៊ីវិល ដែលប្អូនៗ ក្មួយៗកំពុងប្រឡងនាពេលនេះ។
គួរជម្រាបថា សម្រាប់ការប្រឡងជ្រើសរើសគ្រូឯកទេសអប់រំកាយ និងកីឡានេះ ក៏មានការចូលរួមពីអ្នកសង្កេតការណ៍ ដែលមកពីស្ថាប័នផ្សេងៗគ្នាផងដែរ ក្នុងនោះរួមមាន៖ ចំនួនមហាជនចុះឈ្មោះសង្កេតការណ៍ សរុប៤២៣នាក់, ចំនួនអ្នកសង្កេតការណ៍ តំណាងសាកលវិទ្យាល័យ មាន១០រូប, ចំនួនអ្នកសង្កេតការណ៍ សហភាពសហព័ន្ធយុវជនកម្ពុជា ចំនួន២០រូប និងចំនួនក្រុមការងារសង្កេតការណ៍ ACU ដែលបានត្រៀមចំនួន៨៧រូប។
ប្រភេទវិញ្ញាសាសរសេរ (វប្បធម៌ទូទៅ, ជីវវិទ្យា និងភាសាអង់គ្លេស) ប្រព្រឹត្តទៅនៅថ្ងៃទី២៨ ខែមករា ឆ្នាំ២០២៤ ម៉ោង១២កន្លះ នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និងប្រភេទវិញ្ញាសាអនុវត្តន៍កីឡា ចាប់ពីថ្ងៃទី២៩ ខែមករា ឆ្នាំ២០២៤ និងថ្ងៃបន្តបន្ទាប់ នៅវិទ្យាស្ថានជាតិអប់រំកាយ និងកីឡា។
សម្រាប់ប្រភេទវិញ្ញាសាអនុវត្តកីឡាមាន ៣វិញ្ញាសា រួមមាន ទី១៖ អនុវត្តវិញ្ញាសាចោលដុំដែក ទម្ងន់៥គីឡូក្រាម សម្រាប់បុរស និងទម្ងន់៣គីឡូក្រាម សម្រាប់នារី, ទី២៖ អនុវត្តវិញ្ញាសាលោតចម្ងាយ បុរស-នារី និងទី៣៖ អនុវត្តវិញ្ញាសារត់ល្បឿន ១០០ម៉ែត្រ សម្រាប់បុរស និង៨០ម៉ែត្រ សម្រាប់នារី៕ រក្សាសិទ្ធដោយ ៖ សុទ្ធលី
