ជាការលើកកម្ពស់តម្លៃវប្បធម៌ ប្រពៃណី ពាក់ព័ន្ធនឹងខ្លែងឯកខ្មែរដ៏អស្ចារ្យតាំងពីបុរាណកាលមកនោះ កម្មវិធីបង្ហោះខ្លែងឯកអមដោយការកម្សាន្តសប្បាយលេងទឹក ត្រូវបានរៀបចំឡើងដោយមានអ្នកចូលរួមយ៉ាងគគ្រឹកគគ្រេង សប្បាយអឺងកងផង ហើយក៏ជាសកម្មភាពពង្រីក និងផ្សព្វផ្សាយវប្បធម៌លើវិស័យខ្លែងខ្មែរឱ្យកាន់តែផុសផុល និងក្នុងបំណងលុបបំបាត់អំពីផ្នត់គំនិតដែលថា ខ្លែងឯកខ្មែរចង្រៃ ព្រមទាំងប្រើប្រាស់សក្តានុពលវប្បធម៌មួយនេះទាក់ទាញទេសចរ ដែលជាចំណែកមួយចូលរួមកំណើនសេដ្ឋកិច្ចជាតិ។
ពិធីបង្ហោះខ្លែង អមដោយការកម្សាន្តសប្បាយលេងទឹកនេះ គេឱ្យឈ្មោះថា ” ខល្លឺ ដឹ ស្កាយ បាយ អង្គរស្កាយ = Colour the Sky by Angkor Sky ” ធ្វើឡើងនៅសួនទឹក ហ្គាឌិន ស៊ីធី ជិតសារមន្ទីរវិមានឈ្នះៗ និងភ្នំពេញសាហ្វារី តាមបណ្ដោយមហាវិថីវិមានឈ្នះៗ ស្ថិតក្នុងខណ្ឌជ្រោយចង្វារ រាជធានីភ្នំពេញ រយៈពេលពីរថ្ងៃ គឺថ្ងៃទី១៤ – ១៥ ខែធ្នូ ឆ្នាំ២០២៤ ចាប់ពីវេលាម៉ោង ១០ព្រឹក ដល់ ៩យប់ ដោយមានការលក់សំបុត្រឱ្យអតិថិជន ក៏ដូចជាប្រជាពលរដ្ឋ ចូលមើល និងដើរលេងកម្សាន្ត ដូចជា មើលការបង្ហោះខ្លែង និងលេងទឹកនៅសួនទឹក ហ្គាឌិន ស៊ីធី នេះតែម្ដង។
ពន្យល់ឆ្លើយតបនឹងពាក្យដំណាលថា ខ្លែងឯកខ្មែរ ធ្លាក់លើផ្ទះអ្នកណា ផ្ទះនោះចង្រៃ…? ត្រូវបានមន្ត្រីជាន់ខ្ពស់នៃក្រសួងវប្បធម៌ និងវិចិត្រសិល្បៈ បានថ្លែងថា តាមពិតវាមិនមែនបែបនោះទេ វាគ្រាន់តែជាការយល់ច្រឡំមួយតែប៉ុណ្ណោះ ដោយមនុស្សចាស់ៗជំនាន់មុន បានរអ៊ូរទាំដាក់អ្នកបង្ហោះខ្លែងថា ខ្លែងហ្អែង ធ្លាក់លើដំបូលផ្ទះអញ ក្មេងទាញកន្ទុយទម្លាក់ចុះ រហែករបើកដំបូលស្បូវអស់ហើយ ចង្រៃហ្មង , មនុស្សចាស់ គ្រាន់តែនិយាយបែបខឹងបន្ទោសក្មេងតែប៉ុណ្ណោះ មិនសំដៅទៅលើភាពចង្រៃ ឧបទ្រព ឬអពមង្គល អ្វីនោះទេ, ដូច្នេះហើយ សូមពលរដ្ឋខ្មែរជំនាន់នេះតទៅ ឈប់យល់ច្រឡំទៀតទៅ ដែលធាតុពិត គឺខ្លែងឯកខ្មែរ មានភាពអស្ចារ្យណាស់ដោយបង្ហោះបានខ្ពស់ ហើយឮសំឡេងពីរោះ ដូចគេប្រគំតន្ត្រី នៅលើលំហអាកាសទៀតផង។
ការរៀបចំកម្មវិធីបង្ហោះខ្លែងនេះ គឺជាការអប់រំយុវជនខ្មែរជំនាន់ក្រោយឱ្យទទួលយក និងថែរក្សានូវទំនៀមទម្លាប់ វប្បធម៌ ប្រពៃណីនៃការបង្ហោះខ្លែងខ្មែរទៅថ្ងៃអនាគត។រហូតមកដល់ពេលនេះ វប្បធម៌នៃការបង្ហោះខ្លែងខ្មែរ កំពុងជះឥទ្ធិពលយ៉ាងខ្លាំងក្លាដល់គ្រប់មជ្ឍដ្ឋានជាតិ និងអន្តរជាតិ ជាពិសេស ទាក់ទាញភ្ញៀវទេសចរ ខ្មែរ-បរទេស ឱ្យចូលរួមកម្សាន្ត បន្ថែមកំណើនសេដ្ឋកិច្ច។
គួរបញ្ជាក់ថា ជារៀងរាល់ឆ្នាំ ក្រសួងវប្បធម៌ និងវិចិត្រសិល្បៈ តែងតែប្រារព្ធពិធីបើកមហោស្រពបង្ហើរខ្លែងខ្មែរនៅទូទាំងប្រទេស (ក្រសួងគេប្រើពាក្យបង្ហើរខ្លែង ចំណែក CEN សូមអភ័យទោស សូមប្រើពាក្យបង្ហោះខ្លែងវិញ… ព្រោះថា ពាក្យបង្ហោះ គឺវត្ថុអ្វីមួយអាចហោះឡើងទៅលើលំហបាន វាអាស្រ័យដោយមនុស្សជាអ្នកធ្វើ ឬមានវត្ថុមួយទៀតទៅជំរុញ ដូចជា យន្តហោះ និងខ្លែងនេះ ជាដើម, ចំណែកពាក្យបង្ហើរ វាគ្រាន់តែអាចហើររសាត់អណ្ដែតបានតែមួយភ្លែតប៉ុណ្ណោះ វានឹងធ្លាក់ចុះមកវិញ ដូចជាខ្យល់បក់ ស្លឹកឈើ សំណាត់ ស្បោង ចាបហើរ ជាដើម… ជាក់ស្ដែង សត្វបក្សី គេប្រើពាក្យ ហើរ ដោយសារតែវាចេះប្រើស្លាបខំប្រឹងហើរដោយខ្លួនឯង ខុសពីវត្ថុខ្លែង ត្រូវបានគេយកវាទៅបង្ហោះ ដើម្បីឱ្យវាជក់ខ្យល់ ហោះនៅលើលំហអាកាសបានយូរ) ដើម្បីជ្រើសរើសយកអ្នកដែលមានទេពកោសល្យក្នុងការធ្វើខ្លែង និងបង្ហោះខ្លែង៕ ពិសិដ្ឋ CEN
