ទង្វើដ៏គ្មានការប្រុងប្រយ័ត្ន និងគ្មានទំនួលខុសត្រូវ របស់ម្ចាស់ទីតាំងហាងលក់សម្ភារៈ និងកង់ឡានមួយកន្លែង ដែលបានទម្លាក់កង់ចុះពីឡាន ហើយក៏បណ្តាលឲ្យកង់ឡាននោះ ធ្លាក់ចូលផ្លូវ ខ្ទាតត្រូវម៉ូតូអ្នកដំណើរ បណ្តាលឲ្យដួលសន្លប់ស្តូកស្តឹង បានធ្វើឲ្យមហាជនសម្តែងការហួសចិត្ត និងផ្ទុះការរិះគន់ខឹងសម្បារយ៉ាងខ្លាំង។
ជាក់ស្តែង តាមរយៈវីដេអូកាមេរ៉ាឃ្លាំមើល បានបង្ហាញបុរសម្នាក់ កំពុងលើកកង់ឡាន១គ្រាប់ ចុះពីឡាន ប៉ុន្តែ ដោយសារតែមិនមែនការប្រុងប្រយ័ត្ន ជាហេតុធ្វើឲ្យកង់ឡាននោះ ធ្លាក់ចូលផ្លូវ ហើយក៏ខ្ទាតត្រូវម៉ូតូអ្នកដឹកជញ្ជូនម្នាក់ បណ្តាលឲ្យដួលសន្លប់ស្នូកស្តឹងតែម្តង នៅលើផ្លូវ៩៣ ខណ្ឌដូនពេញ រាជធានីភ្នំពេញ កាលពីវេលាម៉ោង ៤ រសៀល ថ្ងៃទី២ ខែមករា ឆ្នាំ២០២៥។
តែអ្វីដែលគួរឲ្យហួសចិត្តនោះ គឺបន្ទាប់ពីហេតុការណ៍បានកើតឡើង គេពុំបានឃើញមនុស្ស ឬ ម្ចាស់ទីតាំងហាងលក់សម្ភារៈ ជាងគ្រប់ប្រភេទនោះ ស្ទុះស្ទាប្រញាប់ប្រញាល់ទៅជួយសង្គ្រោះជនរងគ្រោះនោះទេ ដោយបាននាំគ្នាឈរមើលយ៉ាងព្រងើយ និងជាពិសេសបុរសបង្កហេតុនោះ បែរជាបន្តធ្វើការងារទម្លាក់កង់ឡាន ហាក់ដូចគ្មានរឿងហេតុអ្វីកើតឡើង។
អ្វីដែលកាន់តែហួសចិត្តខ្លាំងបំផុតទៀតនោះ គឺដើម្បីបិទបាំងពីកំហុសទង្វើរបស់ខ្លួន ម្ចាស់ទីតាំងនេះ បែរជាបានយកលុយ ៤០ ដុល្លារ ទៅញាត់ចូលហោប៉ោជនរងគ្រោះ ដែលកំពុងដេកសន្លប់នៅលើផ្លូវ, នេះបើតាមជនរងគ្រោះប្រាប់ឲ្យដឹង។
ទោះជាយ៉ាងណា មហាជនបានស្នើដល់សមត្ថកិច្ចមូលដ្ឋាន សូមចុះទៅណែនាំអប់រំម្ចាស់ទីតាំងនេះផង ដើម្បីកុំឲ្យថ្ងៃមុខថ្ងៃក្រោយ ធ្វើការធ្វេសប្រហែសបង្កគ្រោះថ្នាក់នៅតាមបណ្តោយផ្លូវសាធារណៈបែបនេះទៀត។ នេះចាត់ទុកជាសំណាងហើយ ដែលជនរងគ្រោះមិនរងរបួសរបួសធ្ងន់ធ្ងរ និងប៉ះពាល់ដល់អាយុជីវិត៕
