នេះជាហេតុការណ៍មួយដ៏ភ្ញាក់ផ្អើល និងគួរឲ្យហួសចិត្តខ្លាំងតែម្តង ខណៈដែលឡានក្រឡុកស៊ីម៉ងត៍មួយគ្រឿង បានបុកខ្លោងទ្វារវត្តបណ្តាលឲ្យបាក់ខ្ទេចខ្ទីអស់។ ហេតុការណ៍នេះបានកើតឡើងនៅវត្តព្រៃអង្គុញ ស្ថិតនៅភូមិព្រៃអង្គុញ ក្រុងបាវិត ខេត្តស្វាយរៀង តាមបណ្ដោយផ្លូវ316A កាលពីថ្ងៃទី២០ ខែមីនា ឆ្នាំ២០២៥។
តាមរយៈវីដេអូដែលបងប្អូនប្រជាពលរដ្ឋ ថតបង្ហោះនៅលើបណ្តាញសង្គម បានបង្ហាញរថយន្តក្រឡុកស៊ីម៉ង់តិ៍ដ៏ធំ១គ្រឿង ជាប់កឿងនៅខាងក្រោមទៅមុខលែងរួច ខណៈគ្រោងខ្លោងទ្វារទាំងមូល បានបាក់រលើងសង្កត់លើ។ ប្រភពពីប្រជាពលរដ្ឋ ក៏បានឲ្យដឹងថា ក្រោយពេលកើតហេតុ អ្នកបើកបរបានរត់គេចខ្លួនបាត់។
ពិតណាស់ ក្រោយពីបានឃើញបែបនេះ មហាជនជាច្រើនបានសម្តែងការហួសចិត្ត និងដាក់ឲ្យបែបៗនេះថា អាតាណើប ចង្រៃណាស់! សួរថាមុនបើកចូលទៅហ្នឹង ម្តេចបានមិនមើលថា តើឡានខ្លួនប៉ុណ្ណាបើកឆ្លងរួចអត់? ឬក៏ទើបតែរៀនចេះបើកឡាន!, ពុំត្រឹមនាំទុក្ខដាក់ខ្លួនទេ គឺថែមទាំងនាំទុក្ខដល់ថៅកែទៀត មិនក្រោម 40000$ ទេ ខ្លោងទ្វារវត្តមួយៗថ្លៃណាស់!។
តែយ៉ាងណា ក្រោយមក ទើបដឹងថា ឡានក្រឡុកស៊ីម៉ង់តិ៍នេះ បានបើកបុកម៉ូតូយុវជនម្នាក់ បណ្តាលឲ្យដួលម៉ូតូរងរបួស ហើយក៏បានបើករត់គេចខ្លួនមិនទទួលខុសត្រូវនោះទេ។ ប៉ុន្តែ ដោយសារប្រហែលភ័យស្លន់ខ្លាំង ក៏បង្ខំបើកបំបុកខ្លោងទ្វារវត្តតែម្តង។ តែសំណាងអាក្រក់ ត្រូវខ្លោងទ្វារវត្តសង្កត់លើរថយន្តជាប់ទៅមុខលែងរួច ជាហេតុធ្វើឲ្យអ្នកបើកបររត់គេចខ្លួន បន្សល់ទុកឡានក្រឡុកស៊ីម៉ង់តិ៍នៅកន្លែងកើតហេតុបែបនេះ៕
