ភ្នំពេញ ៖ អ្នកនាំពាក្យក្រសួងការពារជាតិបានថ្លែងថា គិតត្រឹមព្រឹក ថ្ងៃទី ៦ ខែសីហានេះ សភាពការណ៍តាមបន្ទាត់ព្រំដែនទិសខេត្តព្រះវិហារ និងខេត្តឧត្តរមានជ័យ ពិសេសតំបន់អានសេះ មានសភាពការណ៍ស្ងប់ស្ងាត់ ប៉ុន្តែកងកម្លាំងយើងនៅតែបន្តប្រុងប្រយ័ត្នខ្ពស់ជានិច្ច។ លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានថ្លែងក្នុងសន្និសីទសារព័ត៌មាន ស្តីពី « លទ្ធផលនៃការអនុវត្តបទឈប់បាញ់រវាងកម្ពុជា-ថៃ » នៅទីស្តីការគណៈរដ្ឋមន្ត្រី នៅវេលា ម៉ោង ០៧ : ០០ ព្រឹក ថ្ងៃពុធ ១២កើត ខែស្រាពណ៍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី០៦ ខែសីហា ឆ្នាំ២០២៥។
អ្នកនាំពាក្យក្រសួងការពារជាតិ បានថ្លែងថា ៖ ស្ថានភាពព្រំដែនជួរមុខស្ងប់ស្ងាត់ ខណៈលួសបន្លាដែលភាគីថៃបានដាក់ពង្រាយនៅតំបន់អានសេះត្រូវបានរុះរើ និងគ្រឿងចក្ររបស់ថៃបានផ្អាកធ្វើសកម្មភាព នៅវេលាម៉ោង ៥:៣០នាទីល្ងាចថ្ងៃទី៥ ខែសីហា ក្រោយពីមានការចរចារវាងយោធាកម្ពុជា-ថៃ។ កម្ពុជាសូមគូសបញ្ជាក់ថា ទីតាំងអានសេះ គឺស្ថិតនៅក្រោមអធិបតេយ្យកម្ពុជា និងក្រោមការគ្រប់គ្រងរបស់កងកម្លាំងប្រដាប់អាវុធកម្ពុជា បន្ទាប់ពីបទឈប់បាញ់ចូលជាធរមាន កាលពីរំលងអធ្រាត្រ ថ្ងៃទី២៨ ខែកក្កដា ឆ្នាំ២០២៥ យ៉ាងពិតប្រាកដ។ រក្សាសិទ្ធដោយ៖សុទ្ធលី
