ទីក្រុងហ្សឺណែវ៖ នៅថ្ងៃទី៥ ខែកញ្ញា ឆ្នាំ២០២៥ កញ្ញា ឆ្នាំ២០២៥ ឯកឧត្តម ឯកអគ្គរាជទូត អុិន តារា តំណាងអចិន្ត្រៃយ៍កម្ពុជា ប្រចាំអង្គការសហប្រជាជាតិ នៅទីក្រុងហ្សឺណែវ បានចូលរួមកិច្ចប្រជុំពិសេសរបស់ក្រុម Like-Minded Group (LMG) UN80 រៀបចំដោយបេសកកម្មអចិន្ត្រៃយ៍របស់ចិនប្រចាំអង្គការសហប្រជាជាតិនៅទីក្រុងហ្សឺណែវ មានការចូលរួមពីលោកជំទាវ Tatiana Valovaya អគ្គនាយកនៃការិយាល័យអង្គការសហប្រជាជាតិនៅទីក្រុងហ្សឺណែវ នាយកក្រុមប្រឹក្សាសិទ្ធិមនុស្ស និងផ្នែកយន្តការសន្ធិសញ្ញា ព្រមទាំងឯកអគ្គរាជ/រដ្ឋទូត និងតំណាងនៃប្រទេសសមាជិក LMG ។
កិច្ចប្រជុំនេះត្រូវបានរៀបចំឡើងដើម្បីរំលឹកដល់ខួបលើកទី៨០ នៃអង្គការសហប្រជាជាតិ និងជ័យជំនះក្នុងសង្គ្រាមប្រឆាំងហ្វាស៊ីសពិភពលោក ទនឹ្ទមនឹងការប្រជុំពិគ្រោះយោបល់របស់ក្រុម LMG ក្នុងការរៀបចំសម្រាប់សម័យប្រជុំលើកទី៦០ នៃក្រុមប្រឹក្សាសិទ្ធិមនុស្ស។
នៅក្នុងពិធីនោះ ឯកឧត្តម ឯកអគ្គរាជទូត អុិន តារា បានធ្វើអន្តរាគមន៍មួយបញ្ជាក់ពីការប្តេជ្ញាចិត្តមិនងាករេរបស់កម្ពុជាចំពោះសន្តិភាព ការទូត និងពហុភាគីនិយម (ដូចមានក្នុងបទអន្តរាគមន៍ភ្ជាប់ជាមួយ)។ ឯកឧត្តមបានរំឮកពីជ័យជំនះអរិយធម៌នៃធម្មនុញ្ញអង្គការសហប្រជាជាតិ ថាជាជ័យជំនះនៃច្បាប់លើការឈ្លានពាន និងជ័យជំនះនៃការសាមគ្គីភាពលើការត្រួតត្រា ខណៈពេលដែលការព្រមានអំពីការគំរាមកំហែងជាថ្មីដែលបង្កឡើងដោយឯកតោភាគីនិយម យោធានិយម និងការមិនយកចិត្តទុកដាក់ចំពោះច្បាប់អន្តរជាតិ។ ឯកឧត្តមក៏បានលើកឡើងពីភាពស្មោះត្រង់របស់កម្ពុជាចំពោះគោលការណ៍នៃធម្មនុញ្ញនៃអធិបតេយ្យភាព បូរណភាពទឹកដី ការមិនប្រើប្រាស់កម្លាំង និងការដោះស្រាយជម្លោះដោយសន្តិវិធី ដោយបានទាញការយកចិត្តទុកដាក់ចំពោះជម្លោះប្រដាប់អាវុធដែលកំពុងបន្តនៅតាមព្រំដែន និងបទឈប់បាញ់ដ៏ផុយស្រួយ ប៉ុន្តែសំខាន់ដែលបានឆ្លងកាត់ការសម្រុះសម្រួលអន្តរជាតិ៕ រក្សាសិទ្ធដោយ៖សុទ្ធលី
