ភ្នំពេញ៖ ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ នៅថ្ងៃទី១៦ ខែតុលា បានចេញអធិបញ្ជាឱ្យព្រះរាជអាជ្ញានៃអយ្យការអមសាលាដំបូងរាជធានីភ្នំពេញ ប្ដឹងឧទ្ធរណ៍ ក្នុងករណីគ្រោះថ្នាក់ចរាចរណ៍បង្កដោយអតីតនគរបាល ឈ្មោះ ហ៊ុន ហេង។
ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ បានធ្វើអធិបញ្ជាឱ្យព្រះរាជអាជ្ញាប្តឹងឧទ្ធរណ៍ចំពោះសាលក្រមព្រហ្មទណ្ឌលេខ ៣៨០៩ “ភ” ចុះថ្ងៃទី ១៤-១០-២០២៥ របស់សាលាដំបូងរាជធានីភ្នំពេញ ដែលសម្រេចផ្តន្ទាទោសលើជនជាប់ចោទឈ្មោះ ហ៊ុន ហេង ភេទប្រុស អាយុ៦១ឆ្នាំ ដាក់ពន្ធនាគារ កំណត់រយៈពេល ០៣ (បី) ឆ្នាំ ដោយទោសនេះត្រូវអនុវត្តទោសក្នុងពន្ធនាគាររយៈពេល ១ឆ្នាំ ទោសសល់ពីនេះ ត្រូវព្យួរ និងពិន័យជាប្រាក់ចំនួន ៤ ០០០ ០០០ (បួនលាន) រៀល ពីបទ បើកបរបង្កគ្រោះថ្នាក់ចរាចរណ៍ បណ្តាលឱ្យស្លាប់ និងរបួសអ្នកដទៃ ប្រព្រឹត្តនៅចំណុចមុខក្រសួងវប្បធម៌ និងវិចិត្រសិល្បៈ មហាវិថីព្រះនរោត្តម ភូមិ១០ សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃទី១៥ ខែឧសភា ឆ្នាំ២០២៥ ។
នៅថ្ងៃទី ១៦ ខែ តុលា ឆ្នាំ២០២៥ ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានចេញលិខិតជម្រាបមកឯកឧត្តម ច្រឹង ខៅ្ម ព្រះរាជអាជា្ញ នៃអយ្យការអមសាលាដំបូងរាជធានីភ្នំពេញ ក្នុងកម្មវត្ថុ៖ ការធ្វើអធិបញ្ញាឱ្យប្តឹងឧទ្ធរណ៍តាមកំណត់ច្បាប់ចំពោះសាលក្រមព្រហ្មទណ្ឌលេខ ៣៨០៩ “ភ” ចុះថ្ងៃទី ១៤-១០-២០២៥ របស់សាលាដំបូងរាជធានីភ្នំពេញ។
យោង ៖ មាត្រា ២៩ នៃក្រមនីតិវិធីព្រហ្មទណ្ឌនៃព្រះរាជាណាចក្រកម្ពុជា។
ឯកឧត្តមឧបនាយករដ្ឋមន្ត្រី បានថ្លែងជម្រាប ឯកឧត្តម ជ្រាបថា កាលពីថ្ងៃទី ១៥-០៥-២០២៥ ស្ថិតនៅចំណុចមុខក្រសួងវប្បធម៌ និងវិចិត្រសិល្បៈ មហាវិថីព្រះនរោត្តម ភូមិ១០ សង្កាត់ទន្លេបាសាក់ ខណ្ឌ ចំការមន រាជធានីភ្នំពេញ, ឈ្មោះ ហ៊ុន ហេង ភេទប្រុស បានបើករថយន្តមួយគ្រឿងម៉ាក Lexus RX4ooh ពណ៌ទឹកមាស ពាក់ផ្លាកលេខ ភ្នំពេញ ២AQ-២១៨៨ ស្ថិតក្នុងស្ថានភាពស្រវឹង ដោយបានបុកពីក្រោយយានយន្ត ចំនួន ៥គ្រឿង បណ្តាលឱ្យមានមនុស្សស្លាប់ចំនួន ១នាក់ និងរងរបួសធ្ងន់និងស្រាលមួយចំនួន ព្រមទាំងបង្កឱ្យមានការខូចខាតដល់យានយន្ត និងទ្រព្យសម្បត្តិមួយចំនួនផងដែរ។ ចំពោះសំណុំរឿងនេះ, សាលាដំបូង រាជធានីភ្នំពេញបានសម្រេចផ្តន្ទាទោសឈ្មោះ ហ៊ុន ហេង ដាក់ពន្ធនាគារកំណត់ ៣ឆ្នាំ តែទោសនេះអនុវត្តក្នុង ពន្ធនាគារ ១ឆ្នាំ ទោសសល់ពីនេះត្រូវព្យួរ និងពិន័យជាប្រាក់ចំនួន ៤លានរៀល ពីបទបើកបរបង្កគ្រោះថ្នាក់ចរាចរណ៍ បណ្តាលឱ្យស្លាប់ និងរបួសអ្នកដទៃ តាមសាលក្រមព្រហ្មទណ្ឌលេខ ៣៨០៩ “ភ” ចុះថ្ងៃទី ១៤-១០-២០២៥។
ក្រសួងយុត្តិធម៌ ពិនិត្យឃើញថា អង្គហេតុខាងលើមានមនុស្សស្លាប់ និងរងរបួសច្រើននាក់ ព្រមទាំងយានយន្ត និងទ្រព្យសម្បត្តិជាច្រើនរងការខូចខាត ដែលបានបង្កឱ្យមានភាពវឹកវរដល់សណ្ដាប់ធ្នាប់សាធារណៈ។
អាស្រ័យហេតុនេះ, យោងតាមមាត្រា ២៩ នៃក្រមនីតិវិធីព្រហ្មទណ្ឌនៃព្រះរាជាណាចក្រកម្ពុជា, ក្រសួងយុត្តិធម៌សូមចេញអធិបញ្ញាឱ្យ ឯកឧត្តម ធ្វើបណ្ដឹងឧទ្ធរណ៍ចំពោះសាលក្រមព្រហ្មទណ្ឌលេខ ៣៨០៩ “ភ” ចុះថ្ងៃទី ១៤-១០-២០២៥ របស់សាលាដំបូងរាជធានីភ្នំពេញខាងលើ ស្របតាមនីតិវីធីជាធរមាន ដើម្បីធានាដល់ការពង្រឹងការអនុវត្តច្បាប់នៅព្រះរាជាណាចក្រកម្ពុជា៕ រក្សាសិទ្ធដោយ៖សុទ្ធលី
