ស្តីពីកិច្ចសហប្រតិបត្តិការរវាងរដ្ឋសភានិងអគ្គលេខាធិការដ្ឋានរដ្ឋសភានៃប្រទេសទំាងពីរ
បន្ទាប់ពីជំនួបពិភាក្សាការងារទ្វេភាគី រវាងសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា និងឯកឧត្ដម ឡាស្លូ កូវឺរ (László Kövér) ប្រធានរដ្ឋសភាហុងគ្រី នៅព្រឹកថ្ងៃទី២៧ ខែតុលាឆ្នាំ២០២៥នេះ រួចមក ថ្នាក់ដឹកនាំរដ្ឋសភានៃប្រទេសទំាងពីរបានចុះហត្ថលេខាលើអនុស្សារណៈនៃការយោគយល់គ្នានិងបានអញ្ជើញធ្វើជាអធិបតីក្នុងការចុះហត្ថលេខាលើអនុស្សារណៈនៃការយោគយល់គ្នា រវាងអគ្គលេខាធិការដ្ឋានរដ្ឋសភានៃប្រទេសទំាងពីរផងដែរ។
អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការនិងភាពជាដៃគូសភារវាងរដ្ឋសភានៃប្រទេសហុងគ្រី និងរដ្ឋសភានៃព្រះរាជាណាចក្រកម្ពុជា បានចុះហត្ថលេខាដោយ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា និងឯកឧត្ដម ឡាស្លូ កូវឺរ (László Kövér) ប្រធានរដ្ឋសភាហុងគ្រី។
ចំណែកអនុស្សារណៈនៃការយោគយល់ស្តីពីកិច្ចសហប្រតិបត្តិការ រវាងអគ្គលេខាធិការដ្ឋាន រដ្ឋសភានៃប្រទេសទំាងពីរ បានចុះហត្ថលេខាដោយឯកឧត្តមបណ្ឌិត កែវ ពិសិដ្ឋ អគ្គលេខាធិការរងប្រចាំការរដ្ឋសភា តំណាងឱ្យ ឯកឧត្តម ឡេង ប៉េងឡុង អគ្គលេខាធិការរដ្ឋសភាកម្ពុជានិង ឯកឧត្តម ជឺរជី ស៊ុច (György Such) អគ្គលេខាធិការរដ្ឋសភា ប្រទេសហុងគ្រី។
អនុស្សារណៈនៃការយោគយល់គ្នាដែលបានចុះហត្ថលេខានាពេលនេះ មានសារៈសំខាន់បំផុត នៅក្នុងការលើកកម្ពស់ទំនាក់ទំនង កិច្ចសហប្រតិបត្តិការរដ្ឋសភានៃប្រទេសទំាងពីរ នៅគ្រប់កម្រិត ទំាងក្នុងកម្រិតរដ្ឋសភានិងអគ្គលេខាធិការដ្ឋាន ដូចជាក្នុងការជំរុញឱ្យមានការផ្លាស់ប្ដូរទស្សនកិច្ច ការចែករំលែកបទពិសោធន៍ ចែករំលែកព័ត៌មានគ្នាទៅវិញទៅមក ការបណ្តុះបណ្តាល និងការលើកកម្ពស់ភាពជាដៃគូ និងការបណ្តុះបណ្តាលកសាងសមត្ថភាពមន្រ្តី នៃរដ្ឋសភាប្រទេសទំាងពីរជាដើម។
សម្តេចរដ្ឋសភាធិបតី ឃួន សុដារី និងឯកឧត្ដម ឡាស្លូ កូវឺរ ចាត់ទុកអនុស្សារណៈនៃការយោគយល់គ្នា ដែលរដ្ឋសភាប្រទេសទំាងពីរបានចុះហត្ថលេខានាពេលនេះ ជាការបើកទំព័រប្រវត្តិសាស្រ្តថ្មីមួយ នៃទំនាក់ទំនងល្អរវាងប្រទេសទំាងពីរដែលមានតំាងពីយូរណាស់លង់ណាស់ហើយនោះ។ អនុស្សារណៈនៃការយោគយល់គ្នានាពេលនេះ នឹងផ្តល់ផលប្រយោជន៍ដល់ប្រជាពលរដ្ឋនៃប្រទេសទំាងពីរ ក្នុងការលើកកម្ពស់ការភ្ជាប់ទំនាក់ទំនងប្រជាជននិងប្រជាជន ពីព្រោះរដ្ឋសភាប្រទេសទំាងពីរ ជាស្ថាប័នតំណាងឱ្យប្រជាពលរដ្ឋ៕រក្សាសិទ្ធដោយ៖សុទ្ធលី
