មន្ត្រីឧទ្យានុរក្សនៅតាមតំបន់ការពារធម្មជាតិ បានធ្វើការដោះសារខ្សែអន្ទាក់ប្រភេទខ្សែនីឡុងបានចំនួន ៣៣ខ្សែអន្ទាក់ ក្នុងដែនជម្រកសត្វព្រៃ និងឧទ្យានជាតិក្នុងភូមិសាស្ត្រខេត្តពោធិ៍សាត់

ថ្ងៃសៅរ៍ ទី២៩ ខែវិច្ឆិកា ឆ្នាំ២០២៥ មន្ត្រីឧទ្យានុរក្សប្រចាំការតាមស្នាក់ការនីមួយៗ បន្តចុះស្រាវជ្រាវ រុករក ទប់ស្កាត់ បង្ក្រាបបទល្មើសធនធានធម្មជាតិ នៅក្នុងដែនជម្រកសត្វព្រៃ និងឧទ្យានជាតិក្នុងភូមិសាស្ត្រខេត្តពោធិ៍សាត់។ ដោយមានសហការជាមួយកងកម្លាំងប្រដាប់អាវុធ និងប្រជាពលរដ្ឋ មន្រ្តីឧទ្យានុរក្សបានធ្វើការល្បាត និងបានធ្វើការដោះសារខ្សែអន្ទាក់ប្រភេទខ្សែនីឡុងបានចំនួន ៣៣ខ្សែអន្ទាក់ (អញ្ញាតជន)។

ក្រុមការងារ បានប្រទះឃើញសំណាកសត្វព្រៃ(សំណាកស្បែកនិងឆ្អឹង) ជាប្រភេទសំណាកសត្វប្រីស ចំនួន១ក្បាលផងដែរ នៅចំនុចក្នុងភូមិសាស្រ្តភូមិចំការជ្រៃខាងត្បូង ឃុំអន្លង់រាប ស្រុកវាលវែង ខេត្តពោធិ៍សាត់។

ដោយឡែក មន្ត្រីឧទ្យានុរក្ស ប្រចាំស្នាក់ការស្ទឹងថ្មី បានសហការជាមួយអាជ្ញាធរ ភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់ ធ្វើការចុះស្រាវជ្រាវ អត្តសញ្ញាណជនសង្ស័យតាមដីការ របស់សាលាដំបូងខេត្តពោធិ៍សាត់ចំពោះ ករណីកាប់គាស់ ឬរុករានដីព្រៃ ឬឆ្ការ ដុត ដើម្បីយកធ្វើជាកម្មសិទ្ធិដោយគ្មានការអនុញ្ញាត នៅចំណុចដីព្រៃក្នុងតំបន់ការពារធម្មជាតិ សហគមន៍ស្ទឹងថ្មី ដែលប្រព្រឹត្តកាលពីថ្ងៃទី២៥ ខែមិថុនា ឆ្នាំ២០២៥។

បន្ទាប់មកនៅថ្ងៃដដែល មន្រ្តីឧទ្យានុរក្សនៃការិយាល័យឧទ្យានជាតិ បានចូលរួមក្នុងសវនាកានៅសាលាដំបូងខេត្តពោធិ៍សាត់ ពាក់ព័ន្ធនឹងបទល្មើសធនធានធម្មជាតិ ដែលបានដាក់បណ្ដឹងទៅសាលាដំបូងខេត្តពោធិ៍សាត់ចំនួន ១ករណី ក្នុងសំណុំរឿងធនធានធម្មជាតិលេខ ០៧៩/២៤ កឧជ.បស្ថ.ពស សំណុំរឿងព្រហ្មទណ្ឌលេខ ៧០៨ ចុះថ្ងៃទី៣ ខែសីហា ឆ្នាំ២០២៥ ករណីធ្វើសន្និធីធនធានធម្មជាតិ ដោយគ្មានការអនុញ្ញាត នៅចំណុចគីឡូ៤៤ ភូមិអង្គ្រង ឃុំសំរោង ស្រុកភ្នំក្រវាញ ខេត្តពោធិ៍សាត់ ប្រព្រឹត្តិឡើងដោយឈ្មោះ បឿន ដាវុធ ភេទប្រុស អាយុ ៣៣ឆ្នាំ កាលពីថ្ងៃទី២ ខែសីហា ឆ្នាំ២០២៥។

ជាមួយគ្នានេះ មន្ត្រីឧទ្យានុរក្សការិយាល័យឧទ្យានជាតិ ប្រចាំការនៅស្នាក់ការអូរសោមថ្មី សហការជាមួយកម្លាំងកងរាជអាវុធហត្ថលើផ្ទៃប្រទេស គាំទ្រដោយអង្គការ (WA) បានចុះប្រតិបត្តិការស្រាវជ្រាវរុករកបទល្មើសធនធានធម្មជាតិ ចំណុចអូរបេង ស្ថិតនៅក្នុងភូមិផ្ជឹកជ្រុំ ឃុំប្រម៉ោយ ស្រុកវាលវែង ខេត្តពោធិ៍សាត់ក្នុងដែនជម្រកសត្វព្រៃភ្នំសំកុស ពុំមានសកម្មភាពបទល្មើសធនធានធម្មជាតិកើតឡើង។

បន្ទាប់មកនៅចំណុចព្រៃស្លែង ភូមិរគោ ឃុំសំរោង ស្រុកភ្នំក្រវាញ ខេត្តពោធិ៍សាត់ ក្រុមល្បាតបានធ្វើការចុះពិនិត្យទីតាំង កាប់គាស់ ឬរុករានដីព្រៃ ឬឆ្ការដុត ឬឈូសឆាយដីព្រៃ ដើម្បីយកដីធ្វើជាកម្មសិទ្ធ មួយកន្លែង និងបានរុះរើជំរុំប្រក់តង់តូចៗចំនួន០៧ខ្នង ដែលក្រុមជនល្មើសប្រព្រឹត្តស្នាក់នៅ និងបានចុចឃ្លុំផ្ទៃដីបិទជិតទំហំប្រហែល ១៧.៥៤ហិចតា ដើម្បីកសាងសំណុំរឿង និងបន្តនិតិវិធីច្បាប់។ ក្រុមការងារបានធ្វើការស្រាវជ្រាវ រកឃើញមុខសញ្ញាជនសង្ស័យចំនួន ០២នាក់ ដែលជាមេខ្លោងក្នុងការប្រព្រឹត្តកាប់គាស់រុករានដីព្រៃខាងលើ ដែលនឹងត្រូវនាំខ្លួននិងចាត់ការតាមនីតិវិធីច្បាប់៕ រក្សាសិទ្ធដោយ៖សុទ្ធលី