រាជធានីភ្នំពេញ ៖ នាព្រឹកថ្ងៃសៅរ៍ ៥រោច ខែមាឃ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៧ ខែកុម្ភៈ ឆ្នាំ២០២៦ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា និង ឯកឧត្តមបណ្ឌិត ថងលុន ស៊ីសុលីត(Thongloun Sisoulith) អគ្គលេខាធិការបក្សប្រជាជនបដិវត្តន៍ឡាវ និងជាប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ បានអញ្ជើញដឹកនាំកិច្ចប្រជុំកំពូលលើកទី១៦ រវាង គណបក្សប្រជាជនកម្ពុជា និងគណបក្សប្រជាជនបដិវត្តន៍ឡាវ។
ឯកឧត្តម ជា ធីរិទ្ធ អ្នកនាំពាក្យគណបក្សប្រជាជនកម្ពុជា បានអឱ្យដឹងថា នៅក្រោយជំនួបគណបក្សទាំងពីរ
បានផ្លាស់ប្ដូរយោបល់គ្នាស្ដីអំពីកិច្ចសហប្រតិបត្តិការនៅក្នុងក្របខ័ណ្ឌនៃគណបក្សទាំងពីរ ផ្តោតទៅលើការអនុវត្តលើកិច្ចព្រមព្រៀងអ្វីដែលបានសម្រេចកាលពីលើកមុន និងបន្តអនុវត្តមកដល់ពេលនេះ ដែលសមិទ្ធផលជាច្រើនបានកើតឡើងសម្រាប់ការពង្រីកនូវទំនាក់ទំនងទ្វេភាគីរវាងគណបក្សប្រជាជនកម្ពុជា និងគណបក្សប្រជាជនបដិវត្តន៍ឡាវ និយាយដោយឡែក និងនិយាយជារួមគណបក្សប្រជាជនកម្ពុជា គណបក្សកុម្មុយនីសវៀតណាម និងគណបក្សប្រជាជនបដិវត្តន៍ឡាវ។
នៅក្នុងក្របខ័ណ្ឌកិច្ចសហប្រតិបត្តិការទ្វេភាគី រវាងគណបក្សប្រជាជនកម្ពុជា និងគណបក្សប្រជាជនបដិវត្តន៍ឡាវ ថ្នាក់ដឹកនាំកំពូលទាំងពីរបានរំលេចនិងពង្រីកសក្តានុពល និងសហប្រតិបត្តិការបន្ថែមទៀត ដែលគណបក្សទាំងពីរនៅមានជាមួយគ្នាជាពិសេសបន្តការផ្លាស់ប្ដូរនូវទំនាក់ទំនងផ្នែកយុវជន ថ្នាក់ដឹកនាំ នៃគណបក្សទាំងពីរតាមរយៈដំណើរទស្សនកិច្ចនៃថ្នាក់ដឹកនាំកំពូលនៃគណបក្សទាំងពីរ រួមទាំងការផ្លាស់ប្ដូរ និងបណ្ដុះបណ្ដាលយុវជនអ្នកបន្តវេនដើម្បីរក្សាឱ្យបាននូវចំណងមិត្តភាពនៃគណបក្សទាំងពីរ។
ឯកឧត្តម ថងលុន ស៊ីសូលីតបានអរគុណចំពោះ គណបក្សប្រជាជនកម្ពុជា រាជរដ្ឋាភិបាលកម្ពុជា និងប្រជាជនកម្ពុជាដែលតែងតែឧបត្ថម្ភគាំទ្រដល់ប្រទេសឡាវ ដែលទាំងនេះជាការបង្ហាញអំពី ស្មារតីនៃការប្រគៀកស្មើគ្នា ក្នុងឋានៈជាប្រទេសជិតខាងគ្នា ហើយការរក្សាបាននូវទំនាក់ទំនង និងកិច្ចសហប្រតិបត្តិការទាំងអស់នេះ គឺជាចំណុចស្នូលនៃទំនាក់ទំនងទ្វេភាគីក្នុងក្របខ័ណ្ឌគណបក្សនយោបាយទាំងពីរ រួមទាំងទំនាក់ទំនងរដ្ឋាភិបាលនៃប្រទេសទាំងពីរផងដែរ។
សម្ដេចតេជោ និងឯកឧត្តម ថងលុន ស៊ីសូលីត បានឯកភាពគ្នា ក្រៅពីការពង្រីកនូវទំនាក់ទំនង បន្ថែមទៅលើគណបក្សទាំងពីរ ក៏បានជំរុញឱ្យរដ្ឋាភិបាលនៃប្រទេសទាំងពីរ ជាពិសេសនៅក្នុងឱកាសនៃខួបទំនាក់ទំនង៧០ឆ្នាំខាងមុខនេះ បានជំរុញឱ្យថ្នាក់ដឹកនាំទាំងពីរឯកភាពគ្នាក្នុងការរៀបចំព្រឹត្តិការណ៍ផ្សេងៗដើម្បីអបអរសាទរខួបទំនាក់ទំនងនៃប្រទេសទាំងពីរ ដែលឯកឧត្តមនាយករដ្ឋមន្ត្រីឡាវមានគោលបំណងដើម្បីរៀបចំឱ្យមានទិវាវប្បធម៌ដើម្បីអបអរសាទរទៅលើទំនាក់ទំនងការទូតរវាងប្រទេសទាំងពីរផងដែរ។
បន្ថែមលើពេលនេះ ប្រមុខគណបក្សនៃប្រទេសទាំងពីរក៏បានជជែកគ្នាទៅលើវិស័យការពារជាតិ វិស័យពាណិជ្ជកម្ម វិស័យសេដ្ឋកិច្ច ជារួមធ្វើយ៉ាងណាដើម្បីគាំទ្របន្ថែមទៀតដល់ទំនាក់ទំនង នៃគណបក្សផង និងរដ្ឋាភិបាលផងឱ្យកាន់តែរីកចម្រើន។
ប្រមុខដឹកនាំទាំងពីរក៏បានសម្តែងនូវការពេញចិត្តចំពោះ សុវត្ថិភាព សន្តិសុខនៅតាមព្រំដែន ដែលទាំងនេះបង្ហាញយ៉ាងច្បាស់អំពីព្រំដែនសន្តិភាព មិត្តភាព និងកិច្ចសហប្រតិបត្តិការជាមួយគ្នា ដែលបង្ហាញអំពីការយល់គ្នាទៅវិញទៅមក ជាក់ស្តែងរហូតមកដល់ពេលនេះ ប្រទេសទាំងពីរបានសម្រេចបោះបង្គោលព្រំដែនបានប្រមាណ៨៦% ហើយ នៅសល់តែ១៤% ទៀតតែប៉ុណ្ណោះ ហើយគោលការណ៍នៃគណបក្ស និងរដ្ឋាភិបាលគឺការដោះស្រាយនៃការចរចាគ្នាតាមយន្តការមួយដោយសន្តិវិធី ដែលនេះបង្ហាញយ៉ាងច្បាស់ថា ជាអ្នកជិតខាងល្អ ក្នុងការដោះស្រាយបញ្ហាដែលកើតឡើងដោយសន្តិវិធី។
នៅក្នុងក្របខ័ណ្ឌនៃកិច្ចសហប្រតិបត្តិការនៅតាមព្រំដែន ប្រទេសទាំងពីរក៏រួមគ្នាដើម្បីប្រឆាំងទៅនឹងឧក្រិដ្ឋកម្មនៅតាមព្រំដែនផងដែរ ដើម្បីធានានូវនិរន្តរភាពនៃស្ថិរភាព ក៏ដូចជាសន្តិភាពនៅតាមព្រំដែន រវាងប្រទេសទាំងពីរ ហើយទន្ទឹមនឹងនោះ រដ្ឋាភិបាល រួមទាំងគណបក្ស គឺគាំទ្រឱ្យមានការសម្រេចបាននូវពាណិជ្ជកម្ម រវាងកម្ពុជា និងឡាវ បន្ថែមទៀត ថ្វីត្បិតមកដល់ពេលនេះ ទំហំពាណិជ្ជកម្មរវាងប្រទេសទាំងពីរ មានអត្រាប្រមាណជាង ២៥០លានដុល្លារ នៅចំនួនតិចក៏ពិតមែន ក៏ប៉ុន្តែថ្នាក់ដឹកនាំកំពូលគណបក្ស និងរដ្ឋាភិបាលនៃប្រទេសទាំងពីរ សុទ្ធតែមើលឃើញថានៅមានសក្តានុពលជាច្រើនទៀតដែលភាគីទាំងពីរអាចពង្រីកជាមួយគ្នា។ ផែនការបឋម គឺថ្នាក់ដឹកនាំរដ្ឋាភិបាលប្រទេសទាំងពីរ ចង់បានគឺការសម្រេចបាននូវពាណិជ្ជកម្មទំហំប្រមាណ ៧០០លានដុល្លារ នៅក្នុងពេលដែលឆាប់ៗខាងមុខ ដែលជាការបង្ហាញឆន្ទៈរួមទាំងក្របខ័ណ្ឌគណបក្ស និងរដ្ឋាភិបាលនៃប្រទេសទាំងពីរ។
បន្ទាប់ពីកិច្ចប្រជុំកំពូលរវាងថ្នាក់ដឹកនាំទាំងពីររួចមក សម្ដេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា និងឯកឧត្តមបណ្ឌិត ថងលុន ស៊ីសុលីត អគ្គលេខាធិការបក្សប្រជាជនបដិវត្តន៍ឡាវ និងជាប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវក៏អញ្ជើញជាអធិបតីក្នុងពិធីចុះហត្ថលេខាលើកំណត់ហេតុកិច្ចប្រជុំកំពូលលើកទី១៦ រវាងគណបក្សទាំងពីរ៕រក្សាសិទ្ធដោយ៖សុទ្ធលី
