ភ្នំពេញ៖ លោក ឃួង ស្រេង អភិបាលរាជធានីភ្នំពេញបានធ្វើការណែនាំអោយស្មៀនសង្កាត់ទាំងអស់ត្រូវតែស្តាប់តាមការណែនាំការងារពីលោកចៅសង្លាត់ បើមិនដូច្នេះទេ អស់លោកជាស្មៀននឹងប្រឈមនៃកាសុំដកតំណែងពីក្រសួងមហាផ្ទៃ ដោយមិនទុកអោយបង្កការថ្នាំងថ្នាក់ដល់ប្រជាពលរដ្ឋ ដែលមកទទួលសេវានោះទេ ។
លោក ឃួង ស្រេង បានលើកឡើងថា កន្លងមកនេះ បើតាមអ្វីដែលលោកបានទទួលព័ត៌មាននោះគឺមានស្មៀនសង្កាត់មួយចំនួននៅរាជធានីភ្នំពេញយើងនេះមិនសូវស្តាប់ចៅសង្កាត់នោះទេ ដោយអាងថាខ្លួនជាមន្ត្រីមានក្របខណ្ឌរបស់ក្រសួងមហាផ្ទៃ។ តែបើតាមពិតទៅស្មៀនមានតួនាទីគ្រាន់តែជាអ្នកកាន់ត្រា អ្នកសរសេរ បំរើការងារអោយលោកសង្កាត់ប៉ុណ្ណោះ ដូច្នេះទេត្រូវតែស្តាប់ការណែនាំរបស់ចៅសង្កាត់ ធ្វើយ៉ាងណា កុំធ្វើអោយសង្កាត់មានបញ្ហាថ្នាំងថ្នាក់ជាមួយប្រជាពលរដ្ឋ ។ដូច្នេះស្មៀនត្រូវបំពេញការងារអោយបានល្អទៅតាមតួនាទីរបស់ខ្លួន ពិសេសត្រូវរួមគ្នាដើម្បីបំរើប្រជាពលរដ្ឋ អោយសមទៅហ្នឹងអ្វីដែលប្រជាពលរដ្ឋមានទំនុកចិត្ត។
លោកអភិបាលរាជធានីភ្នំពេញបានបញ្ជាក់ថា បើ ស្មៀនមិនស្តាប់ចៅសង្កាត់ទេ ស្មៀនអាចប្រឈមនឹងការដកតំណែង ដោយហេតុថា រដ្ឋបាលខណ្ឌ រដ្ឋបាលរាជធានីមានសិទ្ធិគ្រប់គ្រាន់ក្នុងការស្នើសុំទៅក្រសួងមហាផ្ទៃ ដើម្បីដកតំណែងនិងតួនាទីនេះ ដូច្នេះស្មៀនមិនអាចធ្វើព្យុះ ធ្វើភ្លៀងស្រេចតែចិត្តនោះទេ។ ដោយឡែកលោកមេប៉ុស្តិ៍ក៏ត្រូវស្តាប់ចៅសង្កាត់ដែរដោយលោកមេប៉ុស្តិ៍ស្ថិតក្រោមគណៈបញ្ជាការឯកភាពសង្កាត់ ប៉ុន្តែទោះបីជាយ៉ាងណាក្តីចៅសង្កាត់ត្រូវតែស្អាតស្អំដែរ។
លោក ឃួង ស្រេងបានមានប្រសាសន៍បែបនេះ ក្នុងពិធីសំណេះសំណាលជាមួយអភិបាល អភិបាលរងខណ្ឌ នាយករដ្ឋបាលខណ្ឌ ប្រធានមន្ទីរ ចៅសង្កាត់និងស្មៀនសង្កាត់នៅរាជធានីភ្នំពេញកាលពីរសៀលថ្ងៃទី២៩វិច្ឆិកា ឆ្នាំ២០១៧នៅសាលារាជធានីភ្នំពេញ។
ក្រៅពីការលើកឡើងខាងលើ លោក ឃួង ស្រេងក៏បានជម្រុញអោយចៅសង្កាត់ និងមេប៉ុស្តិ៍យកចិត្តទុកលើការងារការពារសន្តិសុខ សុវត្ថិភាព និងការសម្រួលចរាចរណ៍ជូនប្រជាពរដ្ឋអោយបានល្អផងដែរ ដោយលោកបានជម្រុញអោយបង្កើតវេនយាមជាប្រចាំនៅក្នុងភូមិ ចលនាប្រជាពលរដ្ឋ និងព្រះសង្ឃអោយជួយចូលរួម ។ លោកបញ្ជាក់ថា ការងារការពារសន្តិសុខ សុវត្ថិភាព និងការសម្រួលចរាចរណ៍ ជាការងារសំខាន់ខ្លាំងណាស់ដែលប្រជាពលរដ្ឋត្រូវការជាប្រចាំ មិនថាចំពោះប្រជាពលរដ្ឋក្រីក្រ ឬអ្នកមាននោះទេ ដូច្នេះទេត្រូវតែប្រឹងប្រែងដើម្បីអោយភូមិសង្កាត់មានសុវត្ថិភាព ៕ ដោយ៖កូឡាប
