សៀមរាប៖ក្រុមចោរ ឆក់ទ្រព្យសម្បត្តិភ្ញៀវទេសចរណ៍ មួយសំបុក ដ៏សកម្ម មកពីរាជធានីភ្នំពេញ សង្ងំធ្វើសកម្មភាពឆក់ទ្រព្យសម្បត្តិ ភ្ញៀវទេសចរណ៍ និងប្រជាពលរដ្ឋ ក្នុងក្រុងសៀមរាប ត្រូវបានបង្ក្រាប កាលវេលាពីថ្ងៃទី២៩ វិច្ឆិកា ២០១៧ ត្រង់ចំណុចទំនប់អញ្ចាញ ភូមិ អញ្ចាញ សង្កាត់ នគរធំ ក្រុង/ខេត្តសៀមរាប។
នគរបាលព្រហ្មទណ្ឌ នៃអធិការដ្ឋាននគរបាល ក្រុងសៀមរាប បានឲ្យដឹងថា មានករណី អំពើលួចមានស្ថានទម្ងន់ទោសឆក់ បង្កឡើងដោយជនសង្ស័យចំនួន ២ នាក់ ៖ ជនសង្ស័យទី១/ឈ្មោះជា លាងគី ភេទប្រុស18 ឆ្នាំរស់នៅភូមិអូរអណ្ដូងសង្កាត់ព្រែកប្រាខណ្ឌច្បាអំពៅរាជធានីភ្នំពេញជាអ្នកបើកបរ និងជនសង្ស័យទី២)ឈ្មោះសោ ដាណេ ភេទប្រុសអាយុ18 ឆ្នាំរស់នៅភូមិព្រែកទារ សង្កាត់ចោមចៅខណ្ឌពោធិ៍សែនជ័យ រាជធានីភ្នំពេញ ជាអ្នកជិះពីក្រោយ លើម៉ូតូ ០១គ្រឿង ម៉ាក HONDA DREAM ពណ៌ ខ្មៅ បានធ្វើសកម្មភាពឆក់កាបូបជនបរទេស។ ជនរងគ្រោះឈ្មោះ CHAN JONATHAN YIU LOON ភេទ ប្រុស កើតឆ្នាំ១៩៨៨ ជនជាតិ អង់គ្លេស កាន់លិខិតឆ្លងដែនលេខ ៥២៦៤៣២៤៦០ និងឈ្មោះ KAN SUK KWAN ភេទស្រី កើតឆ្នាំ ១៩៨៨ ជនជាតិ អង់គ្លេស កាន់លិខិតឆ្លងដែន ៨០១០២៤៥០៦ ។ជនបរទេសទាំងពីរនាក់នេះជាភ្ញៀវទេសចរណ៍ស្នាក់នៅបន្ទប់លេខ ០៦២ សណ្ឋាគារជាថាតា។ ការបាត់បង់រួមមាន ៖ មួកតើបពណ៌ទឹកប៊ិចចំនួន១ ឧបករណ៍សាកថ្មទូរស័ព្ទចំនួន១គ្រឿង ទូស័ព្ទម៉ាកSumSung GalaxySG ចំនួន១គ្រឿង Visa Card ចំនួន១សន្លឹក កែវសម្រាប់ ថែរក្សាភ្នែកចំនួន៤ ខ្សែដៃលោហធាតុ ពណ៌ទឹកប្រាក់ ចំនួន១ ថ្នាំបាញ់ខ្លួនបុរស +ឡេលាបខ្លួន ការពារកំដៅថ្ងៃ រូបីយប័ណ្ណចំនួន២៨ដុល្លា+ប្រាក់រៀល ២៨០០៛។
ក្រោយធ្វើសកម្មភាព ជនសង្ស័យបានធ្វើការគេចខ្លួន តាមផ្លូវ៦០ម៉ែត្រឆ្ពោះទៅបរិវេណតំបន់ប្រាសាទ ខណះដែលកំលាំងផ្នែកអន្តរគមន៍និងកំលាំងនគរបាលប៉ុស្តិ៍រដ្ឋបាលសង្កាត់នគធំនៃអធិការដ្ឋាននគរបាលក្រុងសៀមរាប កំពុងធ្វើការ ល្បាតក្នុងមូលដ្ឋាន ហើយបានឃើញសកម្មភាពរបស់ជនសង្ស័យ ក៏បានធ្វើការតាមប្រដេញជនសង្ស័យ ទៅដល់ចំណុចខាងមុខសាលាសង្កាត់នគរធំ ជនសង្ស័យបានទំលាក់កាបូបរបស់ជនរងគ្រោះចោល ហើយបន្តគេចខ្លួន ទៅដល់ចំណុចខាងកើត ប្រាសាទតាព្រហ្ម ជនសង្ស័យបាន ផ្តួលម៉ូតូចោល រត់ចូលព្រៃ ។ដោយមានការចូលរួមសហការណ៍ល្អ ពីនគរបាលការពារបេតិកភណ្ឌ ក៏ដូចជាបងប្អូន ប្រជាការពារភូមិ ជនសង្ស័យទាំងពីរនាក់ដែលព្យាយាម រត់គេចខ្លួនត្រូវបានកំលាំងចម្រុះ ធ្វើការឃាត់ខ្លួនបាន នៅក្នុងព្រៃបរិវេណខាងលិច ប្រាសាទតាព្រហ្ម និងបានបញ្ជូនមកនគរបាលផ្នែកព្រហ្មទណ្ឌនៃអធិការដ្ឋាននគរបាលក្រុងសៀមរាបដើម្បីធ្វើការ សាកសួរ។ វត្ថុតាងដកហូតបានម៉ូតូ១គ្រឿង ម៉ាកហុងដា ឌ្រីមពណ៌ខ្មៅស្លាកលេខ ភ្នំពេញ1KG-7188 កាបូបរបស់ជនរងគ្រោះចំនួន១ ពណ៌ប្រផេះ។
ដោយមានការណែនាំពីលោកឧត្តមសេនីយ៍ត្រី ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប ក៏ដូចជាលោក វរសេនីយ៍ឯកភឹង ចិន្តារ៉េត ស្នងការរងទទួលផែនព្រហ្មទណ្ឌ បានណែនាំអោយបើកការស្រាវជ្រាវស៉ើបអង្កេតអោយដល់ឬសគល់ ។
កំលាំងនគរបាលក្រុងសៀមរាប ដឹកនាំដោយលោកវរសេនីយ៍ឯក ទេព ចាន់ណា អធិការនគរបាល ក្រុងសៀមរាបនិងលោកអធិការរងទទួលបន្ទុកព្រហ្មទណ្ឌ ដោយមានការសហការណ៍ល្អ ជាមួយនគរបាលការិយាល័យព្រហ្មទណ្ឌកំរិតស្រាលបានធ្វើការ សាកសួរជនសង្ស័យ និងបន្តនីតិវិធី រហូតឈានដល់ធ្វើការឃាត់ ខ្លួនបានបក្សពួកជនសង្ស័យចំនួន០៤នាក់បន្ថែមទៀត នាំមកអធិការដ្ឋាននគរបាលក្រុងសៀមរាបដើម្បីធ្វើការសាកសួរ។
ជនសង្ស័យ៤នាក់បន្ថែមដែលត្រូវនាំខ្លួនមកធ្វើការសាកសួរ ទី១/ឈ្មោះ ព្រឿន សុផានិត ភេទប្រុស អាយុ២៧ឆ្នាំ ភូមិព្រែកតាកូវ ឃុំព្រែកតាកូវ ស្រុកខ្សាចកណ្តាល ខេត្តកណ្តាល(ជាចារីនិងមេក្លោង) ទី២/ឈ្មោះ ម៉ៅ ចាន់ថាវី ភេទស្រី អាយុ២១ឆ្នាំ ភូមិអំពិល សង្កាត់ទន្លេរបាសាក់ ខណ្ឌចំការមន រាជធានីភ្នំពេញ (ជាចារីនិងមេខ្លោង) ទី៣/ឈ្មោះ ទេព ស្រីនិច ភេទស្រី អាយុ២០ឆ្នាំ សង្កាត់ទួលទំពូង ខណ្ឌចំការមន រាជធានីភ្នំពេញ(អ្នកសមគំនិត) ទី៤/ឈ្មោះ ម៉ៅ សុបញ្ញា ភេទស្រី អាយុ២០ឆ្នាំភូមិដើមគរ ខណ្ឌជ្រោយចង្វា រាជធានី ភ្នំពេញ(អ្នកសមគំនិត) ដោយបានវត្ថុតាងដកហូតបន្ថែម Laptop ម៉ាក Apple ចំនួន១គ្រឿង ចិញ្ចៀនលោហធាតុពណ៌ស ចំនួន៦វង់ វិទ្យុទាក់ទងប្រភេទអាយឌី ម៉ាកMotorola ចំនួន១គ្រឿង វ៉ែនតាចំនួន៣គ្រឿង ម៉ូតូ១គ្រឿង ម៉ាកហុងដា ឌ្រីមពណ៌ខ្មៅស្លាកលេខ ភ្នំពេញ1FA-4711 កាបូបស្ពាយចំហៀងពណ៌ក្រហមចំនួន១ សៀវភៅលិខិតឆ្លងដែន ចំនួន១ក្បាល ប្រាក់កាក់អង់គ្លេសចំនួន១២០ផោន លុយអឺរ៉ូ ចំនួន៥អឺរ៉ូ លុយម៉ាឡេស៊ីចំនួន៥RM លុយមីយ៉ាន់ម៉ា ចំនួន២១៣៥០kyat។
ជនសង្ស័យបានឆ្លើយសារភាពថា កន្លងមកក្រុមខ្លួន បានធ្វើសកម្មភាព ឆក់កាបូបនិងទូរស័ព្ទ ក្នុងភូមិសាស្ត្រក្រុងសៀមរាប បានចំនួន៥លើក និងចំនួន៣លើកនៅរាជធានីភ្នំពេញ ។
យោងតាមចំលើយសារភាព ជនសង្ស័យនិងវត្ថុតាង ត្រូវបាននគរបាលផ្នែកព្រហ្មទណ្ឌក្រុងសៀមរាប កសាងសំណុំរឿងបញ្ជូន ទៅតុលាការចាត់ការ តាមនិតិវិធីច្បាប់។ ចំណែករណីផ្សេងទៀត និងបញ្ចូនទៅកាន់តុលាការបន្ថែមទៀត នាពេលក្រោយផងដែរ ៕ ដោយ៖បញ្ញាស័ក្តិ
