ភ្នំពេញ៖ ប្រទេសកូរ៉េ នឹងអនុវត្តកិច្ចការងារ ដោយផ្តោតសំខាន់ទៅលើអ្វី ដែលជាតម្រូវការរបស់ប្រទេសកម្ពុជា ហើយកិច្ចសហប្រតិបត្តិការទ្វេភាគី កម្ពុជា-កូរ៉េ បាននិងកំពុងរីកចម្រើន ប្រកបដោយស្ថេរភាព ផ្អែកលើអំណាយផលពីធម្មជាតិនៃសេដ្ឋកិច្ច និងសក្តានុពលនៃកិច្ចសហប្រតិបត្តិការរបស់ប្រទេសទាំងពីរ។
មានប្រសាសន៍ស្វាគមន៍របស់ឯកអគ្គរដ្ឋទូតសាធារណរដ្ឋកូរ៉េប្រចាំព្រះរាជាណាចក្រកម្ពុជា លោក អូ ណាក់យ៉ុង នៅក្នុងកម្មវិធីបុណ្យជាតិកូរ៉េឆ្នាំ២០១៨ ដើម្បីអបអរសាទរនូវខួបរំលឹកអនុស្សាវរីយ៍ នៃការបង្កើតប្រទេសដំបូងរបស់កូរ៉េ នាថ្ងៃទី ១៨ ខែ តុលា ឆ្នាំ ២០១៨ នៅសណ្ឋាគារ Great Duke។ លោកបានថ្លែងថា ស្របពេលដែលឧបទ្វីបកូរ៉េមានវឌ្ឍនភាពដ៏ល្អ និងកំពុងស្ថិតនៅលើជំហាននៃមាគ៌ាឆ្ពោះទៅកាន់សន្តិភាព និងវិបុលភាព។ ជាលទ្ធផល មេដឹកនាំកូរ៉េខាងត្បូង និងកូរ៉េខាងជើង បានចាប់ដៃគ្នា ដើម្បីបង្ហាញអំពីការប្តេជ្ញាចិត្ត ចំពោះសន្តិភាព។ រដ្ឋាភិបាលកូរ៉េបានបើកដំណើរការនូវការផ្តួចផ្តើមគំនិតការទូត “គោលនយោបាយភាគខាងត្បូងថ្មី” ដែលនឹងបង្ករនូវបរិយាកាសល្អ សម្រាប់ជម្រុញទំនាក់ទំនងដ៏ជិតស្និទ្ធ របស់ប្រទេសកូរ៉េជាមួយអាស៊ាន រួមទាំងប្រទេសកម្ពុជាផងដែរ។ មិនត្រឹមតែគ្របដណ្តប់ទៅលើផ្នែកនយោបាយ និងសេដ្ឋកិច្ចប៉ុណ្ណោះទេ ប៉ុន្តែគោលនយោបាយនេះក៏មានវិសាលភាពគ្របដណ្តប់លើ វប្បធម៌ ទំនាក់ទំនងរវាងប្រជាជន និងប្រជាជន ភ្ជាប់ជាមួយនឹងពាក្យគន្លឹះបីគឺ ប្រជាជន វិបុលភាពរួម និងសន្តិភាព។ គោលដៅនៃការផ្តួចផ្តើមគំនិតនេះ ស្ថិតនៅក្នុងការយល់ឃើញរបស់សហគមន៍សន្តិភាព ដែលផ្តោតសំខាន់ទៅលើប្រជាជន ខណៈដែលប្រជាជនរីករាយនឹងភាពចម្រុងចម្រើនទៅវិញទៅមក។
ក្នុងន័យនេះ គួរកត់សម្គាល់ថា ប្រទេសកូរ៉េបានស្នើសុំទៅកាន់អាស៊ានដើម្បីប្រារព្ធ នូវកិច្ចប្រជុំកំពូលរំលឹកខួបអនុស្សាវរីយ៍អាស៊ាន-កូរ៉េ នាឆ្នាំ២០១៩ ដែលនឹងត្រូវបានគាំទ្រ យ៉ាងពេញទំហឹងដោយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ លើសពីនេះទៀត ប្រទេសកូរ៉េ បានដាក់ស្នើឲ្យមានការប្រារព្ធឡើង នូវកិច្ចប្រជុំកំពូល មេគង្គ-កូរ៉េលើកទី១ ជាកិច្ចប្រជុំកំពូលបន្តគ្នា ដែលត្រូវបានលើកឡើង ដោយសម្តេចតេជោ ហ៊ុន សែន ជាមួយនឹងមតិសម្របសម្រួល និងធ្វើឲ្យប្រសើរឡើង នូវកិច្ចសហប្រតិបត្តិការមេគង្គ-កូរ៉េដែលមានស្រាប់។
លោកអគ្គរដ្ឋទូត បានមានប្រសាសន៍ថា ស្ថិតនៅក្នុងទំនាក់ទំនងទ្វេភាគី សាធារណរដ្ឋកូរ៉េ និងព្រះរាជាណាចក្រកម្ពុជា បានថែរក្សា ទំនាក់ទំនងមិត្តភាព និងសហប្រតិបត្តិការ ចាប់តាំងពីការបង្កើតឡើងវិញជាផ្លូវការនូវទំនាក់ទំនង ការទូតរបស់ខ្លួនក្នុងឆ្នាំ១៩៩៧ ដោយបានធ្វើការចែករំលែកគ្នាទៅវិញទៅមក នូវគុណតម្លៃ និងផលប្រយោជន៍រួម។ កិច្ចសហប្រតិបត្តិការទ្វេភាគី បាននិងកំពុងរីកចម្រើន ប្រកបដោយស្ថេរភាព ផ្អែកលើអំណាយផលពីធម្មជាតិនៃសេដ្ឋកិច្ច និងសក្តានុពល នៃកិច្ចសហប្រតិបត្តិការ របស់ប្រទេសទាំងពីរ។ ជាក់ស្តែង ស្ថានភាពទំនាក់ទំនងទ្វេភាគី នាពេលបច្ចុប្បន្ន និង អនាគត រវាងប្រទេសទាំងពីរ ត្រូវបានបញ្ជាក់យ៉ាងច្បាស់ តាមរយៈការធ្វើជំនួញ ការវិនិយោគ ជំនួយអភិវឌ្ឍន៍ផ្លូវការ(ODA) ទេសចរណ៍ វិស័យ ពលកម្ម វប្បធម៌ ទំនាក់ទំនង និងការផ្លាស់ប្តូររវាងប្រជាជន និងប្រជាជន។
“ខ្ញុំសង្ឃឹមជឿជាក់យ៉ាងមុតមាំថា ទំនាក់ទំនងមិត្តភាពដែលមានស្រាប់រវាងប្រទេសយើង ទាំងពីរនឹងត្រូវបានពង្រឹងបន្ថែមទៀត។ ក្នុងនាមខ្ញុំ ជាឯកអគ្គរដ្ឋទូតកូរ៉េ ខ្ញុំនឹងបន្តខិតខំប្រឹងប្រែងឲ្យអស់ពីសមត្ថភាពរបស់ខ្ញុំ ដើម្បីសម្រេចនូវគោលដៅនេះ។ ក្នុងអត្ថន័យនេះ ប្រទេសកូរ៉េ នឹងមិនត្រឹមតែអនុវត្តកិច្ចការងារ ដោយផ្តោតសំខាន់ទៅលើអ្វីដែលប្រទេសកូរ៉េ អាចធ្វើបានល្អ ជាងប្រទេសផ្សេងទៀតនោះទេ ក៏ប៉ុន្តែប្រទេសកូរ៉េ នឹងអនុវត្តកិច្ចការងារ ដោយផ្តោតសំខាន់ទៅលើអ្វី ដែលជាតម្រូវការរបស់ប្រទេសកម្ពុជាផងដែរ” លោក អូ ណាក់យ៉ុង បានបញ្ជាក់បន្ថែមយ៉ាងដូច្នេះ។
ក្នុងឱកាសនោះដែរ លោកបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡាបានមានប្រសាសន៍ថា ខ្ញុំមានអំណរគុណ ដែលប្រទេសកូរ៉េ បានចែករំលែកបទពិសោធន៍ ជាមួយប្រទេសកម្ពុជា។ នៅក្នុងទំនាក់ទំនងជាមួយប្រទេសកម្ពុជា ខ្ញុំសង្កេតឃើញនូវការពេញចិត្តយ៉ាងខ្លាំង ចំពោះទំនាក់ទំនង ដែលមានភាពស្និទ្ធស្នាល និងកិច្ចសហប្រតិបត្តិការប្រកបដោយផ្លែផ្កា នៅក្នុងវិស័យជាច្រើន រវាងប្រទេសយើងទាំងពីរ ចាប់តាំងពីយើង បានបន្តទំនាក់ទំនងការទូត នៅក្នុងឆ្នាំ 1997 ។
កិច្ចសហប្រតិបត្តិការរវាងប្រទេសកម្ពុជា និងសាធារណរដ្ឋកូរ៉េ បានជួយប្រទេសកម្ពុជា ឆ្លងកាត់ ក្នុងវិស័យគន្លឹះជាច្រើន រួមមាន ការបណ្តុះបណ្តាលធនធានមនុស្ស បច្ចេកវិទ្យា គមនាគមន៍ ព័ត៌មានវិទ្យា កីឡា ហេដ្ឋារចនាសម្ព័ន្ធ និងអភិវឌ្ឍន៍ជនបទ កសិកម្ម ដឹកជញ្ជូន ផ្លូវអាកាស និងហិរញ្ញវត្ថុ។ ជាពិសេសនៅក្នុងវិស័យអប់រំ ទីភ្នាក់ងារសហប្រតិបត្តិការអន្តរជាតិកូរ៉េ (KOICA) បានគាំទ្រលើទិដ្ឋភាពជាច្រើន ដូចជា កិច្ចសហប្រតិបត្តិការបច្ចេកទេសអ្នកពិគ្រោះយោបល់ អ្នកស្ម័គ្រចិត្តអាហារូបករណ៍ សម្រាប់មន្ត្រីរាជការ និងនិស្សិត វគ្គបណ្តុះបណ្តាលរយៈពេលខ្លី និងរយៈពេលវែង នៅប្រទេសកូរ៉េ។ ល។ សម្រាប់រយៈពេលប៉ុន្មានឆ្នាំខាងមុខ ជំនួយអភិវឌ្ឍន៍របស់កូយកា នឹងគ្របដណ្តប់លើការថែរក្សា និងការថែរក្សាកុមារតូច មជ្ឈមណ្ឌលបច្ចេកវិទ្យាព័ត៌មានវិទ្យា កម្រិតខ្ពស់ ការបង្កើនសមត្ថភាពគ្រូបង្រៀន និងការកសាងសមត្ថភាព និងការអប់រំបច្ចេកទេស នៅកម្រិតវិទ្យាល័យនៅក្នុងប្រទេសកម្ពុជា។ នៅក្នុងវិស័យកីឡា កូរ៉េខាងត្បូង បានគាំទ្រសកម្មភាពតៃក្វាន់ដូ រួមទាំងការកសាងសមត្ថភាព ទីកន្លែង និងព្រឹត្តិការណ៍ប្រកួតប្រជែង ដទៃទៀត។
ទាក់ទងនឹងកិច្ចសហប្រតិបត្តិការសេដ្ឋកិច្ចកូរ៉េខាងត្បូង គឺជាដៃគូពាណិជ្ជកម្មដ៏សំខាន់មួយ នៃប្រទេសកម្ពុជា ដោយពាណិជ្ជកម្មទ្វេភាគី របស់យើងមានចំនួន 600 លានដុល្លារ នៅក្នុងឆ្នាំ 2017 ។ ការទំនាក់ទំនងនិងការផ្លាស់ប្តូរ រវាងប្រជាជននិងប្រជាជន បានកំពុងតែកើនឡើង ដោយមានចំនួនដ៏ច្រើន នៃភ្ញៀវទេសចរកូរ៉េ ដែលមកប្រទេសកម្ពុជា ជារៀងរាល់ឆ្នាំ សម្របសម្រួលដោយការហោះហើរ ដោយផ្ទាល់ ជាញឹកញាប់រវាងប្រទេសយើងទាំងពីរ។ ចាប់ពីខែមករា ដល់ខែកក្កដា ឆ្នាំនេះ កំណត់ត្រារបស់យើង បានបង្ហាញថា ភ្ញៀវទេសចរកូរ៉េ ជាង 191.000 នាក់ បានមកទស្សនាប្រទេសកម្ពុជា។ បច្ចុប្បន្នមានជនជាតិខ្មែរ ប្រមាណ 56.000 នាក់ កំពុងធ្វើការនៅតាមតំបន់ផ្សេងៗគ្នា នៃសាធារណរដ្ឋកូរ៉េ។ ម្យ៉ាងទៀតប្រទេសយើងទាំងពីរ បានធ្វើការយ៉ាងជិតស្និទ្ធ ជាមួយគ្នាផងដែរ លើវេទិការក្នុងនិងក្រៅប្រទេស។
លោករដ្ឋមន្ត្រី បានថ្លែងា តាងនាមឱ្យរាជរដ្ឋាភិបាលកម្ពុជា ខ្ញុំសូមឆ្លៀតឱកាសនេះ ដើម្បីថ្លែងអំណរគុណដោយស្មោះ ចំពោះរដ្ឋាភិបាល និងប្រជាជន នៃសាធារណរដ្ឋកូរ៉េ ចំពោះការបន្តគាំទ្រ ដល់ការអភិវឌ្ឍន៍សេដ្ឋកិច្ចសង្គម របស់ប្រទេសកម្ពុជា។ ខ្ញុំសូមកោតសរសើរ ចំពោះឯកឧត្តមឯកអគ្គរដ្ឋទូត និងសហការីរបស់លោក ចំពោះការខិតខំរបស់ពួកគេ ក្នុងការជំរុញចំណងទាក់ទងនិងមិត្តភាពទ្វេភាគី៕ ដោយ៖កូឡាប
