បុរសមាឌធំៗ២នាក់ (ម្នាក់ជាម្ចាស់ហាង និងម្នាក់ទៀតជាគូសត្រូវ) បានធ្វើឲ្យមនុស្សម្នាភ្ញាក់ផ្អើល មកចោមរោមមើលទាំងអារម្មណ៍រន្ធត់យ៉ាងខ្លាំង បន្ទាប់ពីបានឃើញពួកគេទាំងពីរ បើកឆាកប្រយុទ្ធគ្នាយ៉ាងសាហាវ ដោយម្នាក់ៗប្រដាប់ដោយកាំបិតកាន់នៅនឹងដៃរៀងៗខ្លួនបែបនេះ ។
តាមរយៈវីដេអូបង្ហោះនៅលើបណ្តាញសង្គម Sina របស់ចិន បានបង្ហាញឲ្យឃើញបុរសអត់ពាក់អាវម្នាក់ កំពុងឱនរៀបចំរបស់របរលក់ដូរនៅមុខហាងរបស់គាត់ ។ ប៉ុន្តែ គាត់បានដឹងខ្លួនភ្លាមៗ នៅពេលដែលបុរសម្នាក់ប្រដាប់ដោយអាវុធវែងមួយ ដែលទំនងជាព្រនង់ដែកដ៏មុតស្រួច បានស្ទុះចូលមកសំដៅវាយប្រហារគាត់ទាំងកម្រោល ។
ប្រតិកម្មដ៏លឿនរបស់បុរសម្ចាស់ហាងនោះ បានរត់ចូលក្នុង និងទាញកាំបិតប៉័ងតោ២ វាយបកទៅនឹងបុរសពាក់អាវបៃតងនោះវិញដោយគ្មានញញើតដៃឡើយ ។ ជាលទ្ធផល អ្នកវាយប្រហារនោះ ត្រូវដួលទៅនឹងដី (ប្រហែលត្រូវដៃ១កាំបិត) តែម្តង ។ ប៉ុន្តែ សំណាងហើយ ដែលបុរសជាម្ចាស់ហាងនោះពុំបន្តវាយប្រហារឲ្យរងរបួសធ្ងន់ធ្ងរ ហើយក៏ត្រូវបានមនុស្សម្នាមកចោមរោមជួយសង្គ្រោះ ។
ទាក់ទងករណីនេះផងដែរ ពុំត្រូវបានប្រភពព័ត៌មានណាអាចបញ្ជាក់ឲ្យដឹងច្បាស់ ពីមូលហេតុដែលនាំឲ្យពួកគេបើកឆាកប្រយុទ្ធគ្នាយ៉ាងសាហាវបែបនេះទេ ៕
ដោយ៖ ឧត្តម
ប្រភព៖ new.qq.com