រាជធានីភ្នំពេញ៖ រដ្ឋមន្ត្រីក្រសួងទេសចរណ៍ លោក ថោង ខុន មានប្រសាសន៍ថា កំណើនភ្ញៀវទេសចរបរទេស នឹងកើនច្រើនថែមទៀត ចាប់ពីឆ្នាំ២០១៨តទៅ ព្រោះជាបន្តបន្ទាប់មកនេះ សម្តេចនាយករដ្ឋមន្ត្រី ហ៊ុនសែន បានលើកទឹកចិត្តដល់វិស័យឯកជន និងដៃគូវិនិយោគទាំងក្នុង និងក្រៅប្រទេស បើកទូលាយដល់អ្នកវិនិយោគទុននានា ឲ្យចូលរួមអភិវឌ្ឍពង្រីកវិស័យទេសចរណ៍ជាមួយរដ្ឋាភិបាលឲ្យបានទូលំទូលាយ។
ផ្តើមពីបញ្ហានេះ លោក ថោង ខុន មានជំនឿថា ឆ្នាំ២០១៧នេះ កំណើនភ្ញៀវទេសចរបរទេស ដែលចូលមកទស្សនាប្រទេសកម្ពុជា អាចមានចំនួនប្រមាណ ៥ លាន ៦សែននាក់ ឬអាចកើន ១២ភាគរយ បើប្រៀបធៀបឆ្នាំ២០១៦។ លោកបន្តថា កំណើននេះ នឹងកើនច្រើនទៀត នាបណ្តាឆ្នាំខាងមុខៗ ព្រោះរាជរដ្ឋាភិបាលកម្ពុជា តាមរយៈក្រសួងទេសចរណ៍ បានដាក់តំបន់ទេសចរណ៍ចំនួន ២២ទីតាំងបន្ថែមទៀត ឲ្យក្លាយជារមណីយដ្ឋានទេសចរណ៍គំរូ សម្រាប់ឆ្នាំ២០១៧-២០១៨។
តាមរយៈនេះ លោក ថោង ខុន រំពឹងថា នឹងជួយឲ្យកំណើនភ្ញៀវទេសចរអន្តរជាតិ ចូលមកទស្សនាកម្ពុជា កើនច្រើនទៀតនាបណ្តាឆ្នាំខាងមុខ។ លោកបន្តថា ដើម្បីជម្រុញឲ្យវិស័យទេសចរណ៍រីកចំរើនពីមួយឆ្នាំទៅមួយឆ្នាំ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កំណត់យក “ឆ្នាំ២០១៧ ជាឆ្នាំប្រឡងប្រណាំងរមណីយដ្ឋានទេសចរណ៍គំរូ នៅទូទាំងប្រទេស” និងជាការជួបជុំ រវាងស្ថាប័នរដ្ឋ វិស័យឯកជន សហគមន៍ និងដៃគូអភិវឌ្ឍន៍នានា ដើម្បីរួមពិភាក្សាគ្នាកំណត់ទិសដៅឲ្យបានច្បាស់លាស់ សម្រាប់បន្តអនុវត្តចលនាប្រឡងប្រណាំង “រមណីយដ្ឋានស្អាត” ឬ “កម្ពុជាស្អាត កម្ពុជាបៃតង” ដើម្បីទាក់ទាញកំណើនភ្ញៀវទេសចរអន្តរជាតិ ឲ្យចូលមកទស្សនាកម្ពុជា ឲ្យបានច្រើននាថ្ងៃអនាគត។
ទាក់ទិនបញ្ហានេះដែរ លោក ថោង ខុន ឲ្យដឹងថា កន្លងទៅនេះ ប្រមុខដឹកនាំនាំរាជរដ្ឋាភិបាល បានដាក់ចេញនូវយុទ្ធនាការ “កម្ពុជា៖ ព្រះរាជាណាចក្រអច្ឆរិយៈ” និងចលនាប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ និងឈានទៅផ្តល់ជ័យលាភីទីក្រុងស្អាត ជ័យលាភីសេវាល្អ និងបដិសណ្ឋារកិច្ចល្អ ជ្រកក្រោមឆ័ត្រ “រង្វាន់សម្តេច នាយករដ្ឋមន្ត្រី ហ៊ុន សែន សម្រាប់ធុរកិច្ចបៃតងក្នុងវិស័យទេសចរណ៍ នៅកម្ពុជា” ប្រយោជន៍ដើម្បីឈានទៅរួមគ្នាទាក់ទាញកំណើនភ្ញៀវទេសចរ ឲ្យចូលមកទស្សនានៅតាមមូលដ្ឋាននីមួយៗ។
យ៉ាងណាក៏ដោយចុះ លោក ថោង ខុន មានជំនឿថា តាមរយៈរមណីយដ្ឋានទេសចរណ៍គំរូ ទាំង ២២កន្លែង ដែលឈ្នះជ័យលាភីក្រសួងទេសចរណ៍សម្រាប់ឆ្នាំ២០១៧- ២០១៨នេះ នឹងអាចរួមគ្នាទាក់ទាញកំណើនភ្ញៀវទេសចរបរទេស ឲ្យចូលមកទស្សនាប្រទេសកម្ពុជា បានច្រើនថែមទៀត នាបណ្តាឆ្នាំខាងមុខ។
រមណីយដ្ឋានទេសចរណ៍គំរូ ទាំង ២២កន្លែង ដែលឈ្នះជ័យលាភី សម្រាប់ឆ្នាំ២០១៧- ២០១៨ រួមមាន៖ រមណីយដ្ឋានទេសចរណ៍វីគិរីរម្យ ផាញរីសត ខេត្តកំពង់ស្ពឺ។ សហគមន៍ទេសចរណ៍ចំបក់ ខេត្តតាកែវ។ មណីយដ្ឋានទេសចរណ៍ភូមិវប្បធម៌ ខេត្តសៀមរាប។ តំបន់វិស្សមកាលអន្តរជាតិឆ្នេរមាសឆ្នេរប្រាក់ ខេត្តព្រះ សីហនុ។ សហគមន៍ទេសចរណ៍បន្ទាយឆ្មារ ខេត្តបន្ទាយមានជ័យ។ រមណីយដ្ឋានទេសចរណ៍សួនស្នេហ៍ជនបទ ខេត្តបន្ទាយមានជ័យ។ រមណីយដ្ឋានទេសចរណ៍ប្រវត្តិសាស្ត្រវត្តភ្នំ រាជធានីភ្នំពេញ។ រមណីយដ្ឋានទេសចរណ៍បឹងសំរឹទ្ធ ខេត្តកំពង់ធំ។ រមណីយដ្ឋានទេសចរណ៍ទឹកធ្លាក់ច្រកល្អៀង ខេត្តពោធិ៍សាត់។ រមណីយដ្ឋានទេសចរណ៍ថ្ងៃបាំងឆ័ត្រ ខេត្តកែប។ រមណីយដ្ឋានទេសចរណ៍កំពង់ភ្លុក ខេត្តសៀមរាប។ រមណីយដ្ឋានទេសចរណ៍ជើងឯក រាជធានីភ្នំពេញ។ រមណីយដ្ឋានទេសចរណ៍បឹងយក្សឡោម ខេត្តរតនគិរី។ រមណីយដ្ឋានទេសចរណ៍ចំការស្នេហ៍ រាជធានីភ្នំពេញ។ រមណីយដ្ឋានទេសចរណ៍បាណន់ ខេត្តបាត់ដំបង។ រមណីយដ្ឋានទេសចរណ៍ឋានសួគ៌បូកគោ ខេត្តកំពត។ រមណីយដ្ឋានទេសចរណ៍បក្សីមេគង្គ ខេត្តស្ទឹងត្រែង។ រមណីយដ្ឋានទេសចរណ៍ឧទ្យានធម្មជាតិប៊ូស្រា ខេត្តមណ្ឌលគិរី។ រមណីយដ្ឋានទេសចរណ៍ប្រវត្តិសាស្ត្រអន្លង់វែង ខេត្តឧត្តរមានជ័យ។ រមណីយដ្ឋានទេសចរណ៍កោះទ្រង់ ខេត្តក្រចេះ។ រមណីយដ្ឋានទេសចរណ៍រ៉ក់ រូយ៉ាល់ ខេត្តកែប និងរមណីយដ្ឋានទេសចរណ៍អូរមីស ខេត្តមណ្ឌលគិរី។
ស្ថិតិទេសចរណ៍ឆ្នាំ២០១៦ របស់ក្រសួងទេសចរណ៍ បង្ហាញថា វិស័យទេសចរណ៍កម្ពុជា សម្រេចបានកំណើន ៥ភាគ រយ (៥%) និងរកចំណូល បានប្រមាណ ៣,៤០០លានដុល្លារសហរដ្ឋអាមេរិក ឬស្មើ ១២ភាគ រយ (១២%) នៃផលិតផលក្នុងស្រុកសរុប (GDP)។
ស្ថិតិដដែល ក៏បានឲ្យដឹងដែរថា ចំនួនភ្ញៀវទេសចរអន្តរជាតិ ដែលចូលមកកម្ពុជា ក្នុងរយៈពេល ៩ខែ ដើមឆ្នាំ២០១៧ មានចំនួន ៣,៩១២,៧៦១នាក់ គឺកើន ១១.៥% ប្រៀបធៀប ៩ខែដូចគ្នាឆ្នាំ២០១៦។
កំណើននេះ លោក ថោង ខុន រដ្ឋមន្ត្រីក្រសួងទេសចរណ៍ បានព្យាករណ៍ថា ឆ្នាំ២០១៧នេះ កំណើនភ្ញៀវទេសចរអន្តរជាតិ ដែលចូលមកប្រទេសកម្ពុជា នឹងអាចមានចំនួន ៥ លាន ៦សែននាក់ ឬអាចកើនចំនួន ១២ភាគរយ បើប្រៀបធៀបឆ្នាំ២០១៦៕ ដោយ៖ ដែន សីមា 
