ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ សហការជាមួយអង្គការអន្តរជាតិខាងការងារ (ILO) រៀបចំសិក្ខាសាលាកម្រិតខ្ពស់មួយ ស្តីពី ការពិនិត្យតាមដានប្រាក់ឈ្នួលអប្បបរមា នៅសណ្ឋាគារឡឺរ៉ូយ៉ាល់ នាថ្ងៃទី២៦ ខែវិច្ឆិកា ឆ្នាំ២០១៨ ដើម្បីអនុវត្តការងារឱ្យមានប្រសិទ្ធភាពនៅឆ្នាំ២០១៩ ប្រាក់ឈ្នួលអប្បបរមារបស់កម្មករនិយោជិត នឹងត្រូវអនុវត្តការដំឡើងតាមច្បាប់ប្រាក់ឈ្នួលអប្បបរមា។
លោកហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ដើម្បីធានាបាននូវយន្តការកំណត់ប្រាក់ឈ្នួលអប្បបរមា ដែលពិតជាមានសារប្រយោជន៍យ៉ាងខ្លាំង ក្នុងការធានាបាននូវសុខដុមរមនានៃទំនាក់ទំនងវិជ្ជាជីវៈ ក៏ដូចជាការ លើកកម្ពស់កម្រិតជីវភាពរបស់កម្មករនិយោជិត ព្រមទាំងធានានូវស្ថិរភាព និរន្តភាព នៃវិស័យពាណិជ្ជកម្ម និងការទាក់ទាញការវិនិយោគនៅប្រទេសកម្ពុជា ។
ការបន្តរីកលូតលាស់ផ្នែកសេដ្ឋកិច្ច ក៏បានផ្តល់លទ្ធភាពឱ្យរាជរដ្ឋាភិបាល អាចអភិវឌ្ឍ និងពង្រីកជាបន្តបន្ទាប់នូវប្រព័ន្ធគាំពារសង្គមសម្រាប់កម្មករនិយោជិត សំដៅធានាឱ្យកាន់តែបាននូវនិរន្តភាពការងារ ប្រាក់ចំណូល និងភាពកក់ក្តៅក្នុងចិត្តរបស់កម្មករនិយោជិត និងគ្រួសារ ដោយបានដាក់ឱ្យអនុវត្តនូវរបបសន្តិសុខសង្គមផ្នែកហានិភ័យការងារ និងរបបសន្តិសុខសង្គមផ្នែកថែទាំសុខភាព ដែលសម្តេចតេជោនាយករដ្ឋមន្ត្រី បានកំណត់ឱ្យនិយោជកជាអ្នកបង់វិភាគទាន ១០០ភាគរយ ជំនួសកម្មករនិយោជិតនៃសេដ្ឋកិច្ចក្នុងប្រព័ន្ធចាប់ពីខែមករា ឆ្នាំ២០១៨ កន្លងមក ហើយសម្រាប់កម្មករនិយោជិតក្រៅប្រព័ន្ធ ត្រូវប្រើប្រាស់មូលនិធិសមធម៌។ លើសពីនេះ កម្មការិនីសម្រាលកូន ត្រូវទទួលបានការផ្តល់សាច់ប្រាក់ ៤០ម៉ឺនរៀល ក្នុងកូនម្នាក់ ទាំងសេដ្ឋកិច្ចក្នុងប្រព័ន្ធ និងទាំងសេដ្ឋកិច្ចក្រៅប្រព័ន្ធ។
ទន្ទឹមនេះ ការបន្តដំឡើងប្រាក់ឈ្នួលអប្បបរមា សម្រាប់វិស័យវាយនភណ្ឌកាត់ដេរសម្លៀកបំពាក់ និងផលិតស្បែកជើង ជាបន្តបន្ទាប់ពីចំនួន ៤០ដុល្លារអាមេរិក ក្នុងមួយខែ នៅក្នុងឆ្នាំ១៩៩៧ ដល់ ១៨២ដុល្លារអាមេរិក ក្នុងមួយខែ នៅឆ្នាំ២០១៩ ខាងមុខនេះ បូកនឹងប្រាក់អត្ថប្រយោជន៍បន្ថែមផ្សេងៗទៀតកម្មករ និយោជិតម្នាក់អាចទទួលបានប្រាក់ឈ្នួលជាមធ្យមពី ១៩៩-២១០ដុល្លាអាមេរិក ក្នុងមួយខែ ដែលកម្រិតប្រាក់ឈ្នួលនេះ បានជួយធ្វើឱ្យកម្រិតជីវភាពរស់នៅរបស់ម្មករនិយោជិតកាន់តែប្រសើរ។
លោក Graeme Buckley នាយកប្រចាំតំបន់អង្គការ ILO ប្រចាំនៅប្រទេសកម្ពុជា ប្រទេសឡាវ និងប្រទេសថៃ បានឱ្យដឹងថា សិក្ខាសាលាកម្រិតខ្ពស់នៅថ្ងៃនេះ គឺធ្វើឡើងក្នុងគោលបំណងពង្រឹងសមត្ថភាពបច្ចេកទេសមួយកម្រិតទៀតលើការត្រួតពិនិត្យតាមដាន និងវាយតម្លៃប្រាក់ឈ្នួលអប្បបរមា ដល់ភាគីរាជរដ្ឋាភិបាល ដែលជាសមាជិកគណៈកម្មការប្រឹក្សាការងារ និងក្រុមការងារបច្ចេកទេសចរចាប្រាក់ឈ្នួល ព្រមទាំងប្រមូលធាតុចូលពីភាគីពាក់ព័ន្ធ ដើម្បីបង្កើតបណ្តុំសូចនាករតាមដាន និងវាយតម្លៃផលវិបាកនៃបម្រែបម្រួលប្រាក់ឈ្នួលអប្បបរមានៅកម្ពុជា នាពេលបច្ចុប្បន្ន និងអនាគត។
សហគ្រាស គ្រឹះស្ថាន សេដ្ឋកិច្ចក្នុងប្រព័ន្ធដែលបានចុះបញ្ជីនៅក្រសួងការងារ និងបណ្តុះបណ្តាល មានចំនួនសរុបជាង ១ម៉ឺន២ពាន់ និងមានកម្មករនិយោជិតសរុបចំនួនជិត ១លាន៥សែននាក់, សហគ្រាស គ្រឹះស្ថានសេដ្ឋកិច្ចក្រៅប្រព័ន្ធសរុបមានចំនួនជិត ៦សែន មានកម្មករចំនួនជាង ២លាន៤សែននាក់, វិស័យកសិកម្មប្រមាណជាង ៤លាននាក់, ពលករធ្វើការនៅក្រៅប្រទេសមានចំនួនប្រមាណ ១លាន២សែន និងមន្ត្រីសាធារណៈចំនួនប្រមាណជាង ៥សែននាក់៕ ដោយ ៖ បញ្ញាស័ក្តិ
