ខ្សែប្រយុទ្ធស្តេចស Real Madrid គឺកីឡាករ Cristiano Ronaldo បានឈ្នះពានកីឡាករល្អបំផុត (Ballon d’Or) លើកទី ៥របស់ខ្លួន បន្ទាប់ពីយកឈ្នះគូប្រជែងដ៏ខ្លាំងខ្លារបស់ខ្លួន គឺកីឡាករ Lionel Messi របស់ក្រុមអ្នកមានបុណ្យ Barcelona។ នេះបើតាមការចេញផ្សាយរបស់ BBC។
នេះគឺជាការឈ្នះពាន ២ឆ្នាំជាប់ៗគ្នារបស់ Cristiano Ronaldo និងជាពានទី ៥របស់កំពូលកីឡាកររូបនេះ។ Ronaldo ពេលនេះបានតាមយកស្មើកីឡាការ Lionel Messi ដែលអ្នកទាំងពីរ ធ្លាប់ឈ្នះពាននេះបានចំនួន ៥ដងដូចគ្នា។
ចំនែកអតីតកីឡាការរបស់ Barcelona គឺ Neymar ដែលសព្វថ្ងៃកំពុងលេងឲ្យក្លឹបបារាំង Paris St-Germain ស្ថិតនៅចំណាត់ថ្នាក់លេខ ៣។
កាលពីរដូវកាលមុន កីឡាករ Ronaldo បានជួយឲ្យក្រុម Real Madrid ឈ្នះ Champion League និងឈ្នះពានក្នុងក្របខ័ណ្ឌអេស្បាញផងដែរ (La Liga)។
Ronaldo ធ្លាប់ឈ្នះពានដ៏ធំនេះ ក្នុងឆ្នាំ ២០០៨ ២០១៣ ២០១៤ ២០១៦ និង ២០១៧។
“នេះជាអ្វីដែលខ្ញុំទន្ទឹងរងចាំរាល់ឆ្នាំ” Ronaldo បានថ្លែងបែបនេះក្រោយពេលទទួលបានពាន ដែលធ្វើនៅទីក្រុងប៉ារីស។
“ខ្ញុំសូមអរគុណដល់មិត្តរួមក្រុម ហើយខ្ញុំចង់អរគុណដល់អ្នកគ្រប់គ្នាដែលបានជួយខ្ញុំឲ្យឈានមកដល់កំរិតនេះ”៕ សុភ័ក្ត្រ