បន្ទាយមានជ័យ ៖ កម្លាំងនគរបាលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តបន្ទាយមានជ័យ បានឃាត់រថយន្ត១គ្រឿងម៉ាក FOD RAGER ពីរបាំង ចង្កូតស្តាំ ពណ៌ប្រផេះ ផលិតនៅឆ្នាំ២០១៦ នៅលើផ្លូវជាតិលេខ៥ ស្ថិតក្នុងភូមិយាង្មី ឃុំកូប ស្រុកអូរជ្រៅ បញ្ជូនមកស្នងការដ្ឋាននគរបាលខេត្តបន្ទាយមានជ័យ ។
លោកវរសេនីយ៍ទោ រស់ រៀម នាយការិយាល័យស្តីទី បានឲ្យដឹងថា ដោយ មានការសម្របសម្រួល ពីលោកមាស ច័ន្ទពិសិដ្ឋ ព្រះរាជអាជ្ញាអមសាលាដំបូង ខេត្តបន្ទាយមានជ័យ នៅថ្ងៃទី៣០ ខែវិចិ្ឆកា ឆ្នាំ២០១៨ម្សិលមិញនេះ សមត្ថកិច្ចនគរបាលបា រថយន្តចង្កូតស្តាំមួយគ្រឿងដែល សង្ស័យថាអ្នកទិញយកមកប្រើប្រាស់គ្មានពន្ធនាំចូល និងប្រើប្រាស់ប័ណ្ណសម្គាល់យានយន្តក្លែងក្លាយ។
បើតាមការសាកសួរ អ្នកបើកបររថយន្តឈ្មោះ នាង សារឿន ភេទប្រុស អាយុ៥២ឆ្នាំ នៅភូមិបឹងស្នោរ ឃុំស្លក្រាម ស្រុកស្វាយចេក បានប្រាប់សមត្ថកិច្ចថា ប្រហែលមួយសប្តាហ៍មុន ខ្លួនបានដូរដីជាមួយឈ្មោះស៊ុន សារឿន ភេទប្រុស អាយុ៥៨ឆ្នាំ នៅ ភូមិយាងថ្មី ឃុំកូប ស្រុកអូរជ្រៅ ដោយខ្លួនបានប្រគល់ដីឲ្យឈ្មោះស៊ុន សារឿន ចំនួន៣ហិកតា នៅភូមិក្តិបថ្ម ឃុំគោករមៀត ស្រុកថ្មពួក ជាថ្នូរនិងរថយន្ត FOD RAGER នេះ តម្លៃ២ម៉ឺនដុល្លាអាមេរិក។ ចំណែកចម្លើយឈ្មោះ ស៊ុន សារឿន បាននិយាយថា រយៈពេលប្រហែលជាបីខែមុន ខ្លួនបាដូរដីជាមួយនិងរថយន្ត FOD RAGER នេះ ជាមួយឈ្មោះ ជា សុខុម ភេទប្រុស មុខរបរជាយោធា នៅឯអូរស្មាច់ ខេត្តឧត្តរមានជ័យ ដោយប្រគល់ដីចំនួន១ហិកតាកន្លះ នៅភូមិបឹងស្នោរ ឃុំស្លក្រាម ស្រុកស្វាយចេក ជាថ្នូរនិរងរថយន្ត FOD RAGER នេះ។ ក្រោយពីដូរបានខ្លួន បានពឹងពាក់ប្អូនធម៌នៅភ្នំពេញ ធ្វើស្លាកលេខនិងប័ណ្ណសម្គាល់រថយន្ត ក្នុងតម្លៃ៥ពាន់ដុល្លារ ឲ្យប្អូនធម៌គាត់រកពឹងគេជួយធ្វើឲ្យ ពេលយកមក ស្រាប់ប័ណ្ណសម្គាល់យានយន្ត និងស្លាកលេខក្លែងក្លាយ ។ គាត់បានព្យាយាមទូរស័ព្ទ ទៅអ្នកធ្វើ តែទូរស័ព្ទមិនចូល ក្រោយមកឮថា អ្នកធ្វើនោះ ត្រូវបានសមត្ថកិច្ចចាប់ខ្លួនពីបទធ្វើប័ណ្ណយានយន្ត និងស្លាកលេខ ក្លែងក្លាយ។
នាយការិយាល័យស្តីទី ក៏បានបញ្ជាក់ថា ដោយផ្អែកលើឯកសារពាក់ព័ន្ធ ដែលដកហូតបាន និងចម្លើយសារភាព របស់ឈ្មោះ នាង សារឿន និងឈ្មោះស៊ុន សារឿន ។ ជនទាំង២នាក់នេះ គឺពិតជាប្រើប្រាស់ ប័ណ្ណសម្គាល់យានយន្ត ក្លែងក្លាយ ប្រាកដមែន ។
បច្ចុប្បន្នជនទាំង២នាក់ រួមនិងរថយន្ត ត្រូវបានបញ្ជូនទៅសាលាដំបូងខេត្ត ដើម្បីចាត់វិធានការច្បាប់នៅថ្ងៃទី១ ខែធ្នូ ឆ្នាំ២០១៨ ៕ ដោយ៖បញ្ញាស័ក្តិ