ខេត្តស្វាយរៀង ៖ យុវជនម្នាក់រងរបួសបាក់កំភួនជើងខាងស្តាំ ដោយសារបើកបរម៉ូតូមិនប្រកាន់ស្តាំ ជិះចូលផ្លូវខាងគេត្រូវម៉ូតូមួយគ្រឿងទៀតបុកពេញទំហឹង។ ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១២និង១០យប់ ឈានចូលថ្ងៃទី១១ ខែ ឆ្នូ ឆ្នាំ២០១៧ នៅត្រង់ចំណុចលើផ្លូវជាតិលេខ១គីឡូម៉ែត្រលេខ138-139 ស្ថិតក្នុងភូមិ ប្រសូត្រ2 ឃុំ កណ្តៀងរាយ ស្រុកស្វាយទាប ខេត្ត ស្វាយរៀង។ បើតាមប្រភពពីសមត្ថកិច្ចបានឲ្យដឹងថា ៖ នៅមុនពេលកើតហេតុគេឃើញយុវជនលើជិះម៉ូតូម៉ាក ហុងដាឌ្រីម ស៊េរីឆ្នាំ 2015 ពណ៌ខ្មៅ ស្លាកលេខ ភ្នំពេញ 1DD 5522 មិនពាក់មួកសុវត្ថិភាព ទិសដៅពីកើតទៅលិចលុះមកដល់ចំណុចកើតហេតុខាងលើ ក៏រេចង្កូតទៅខាងឆ្វេងដៃ ស្របពេលនោះក៏មានម៉ូតូមួយគ្រឿងទៀតម៉ាក ហុងដាឌ្រីម ស៊េរីឆ្នាំ 2017 ពណ៌ខ្មៅ ស្លាកលេខ ព្រៃវែង 1J 8989 (ពាក់មួកសុវត្ថិភាព) ធ្វើដំណើរពីទិសដៅពីលិចទៅកើតបណ្តាលឲ្យបុកពេញទំហឹងតែម្តង។ ប្រភពបានបន្តទៀតថា ៖ ជនរងគ្រោះខាងលើមានឈ្មោះ សេង ពៅ ភេទប្រុស អាយុ25ឆ្នាំ ជនជាតិខ្មែរ មុខរបរ កសិករ មានទីលំនៅ ភូមិរោងបន្លែ សង្កាត់ស្វាយរៀង ក្រុងស្វាយរៀង ខេត្តស្វាយរៀង រងរបួសធ្ងន់ (បាក់កំភូនជើងខាងស្តាំ) និងភាគីខាងម៉ូតូ២០១៧ឈ្មោះ ភាន សំអាន ភេទប្រុស អាយុ 27ឆ្នាំ ជនជាតិខ្មែរ មុខរបរ កម្មករសំណង់ មានទីលំនៅ រាជធានីភ្នំពេញ រងរបួសស្រាល។ រីឯអ្នករងរបួសទាំងពីរ ត្រូវបានយកទៅព្យាបាលនៅមន្ទីរពេទ្យបង្អែកស្វាយទាប ។
ចំពោះមធ្យោបាយទាំង០២ ត្រូវបានជំនាញយកមករក្សាទុកនៅអធិការដ្ឋាននគរបាលស្រុក និងកសាងសំណុំរឿងតាមនីតិវិធី៕វ៉ៃកូ
