ព្រៃវែង ៖ បុរសជាឪពុកម្នាក់បានស្លាប់នៅកន្លែង ចំណែក កូនស្រីបានរបួសធ្ងន់ ពេលជិៈម៉ូតូឌុបកូនស្រីទៅសាលា ហើយត្រូវរថយន្តដឹកស៊ីប្រូ ក្រឡាប់បោកជះទៅលើម៉ូតូ២គ្រឿង នៅលើផ្លូវលេខ៣១២ ចំណុចភូមិពានី ឃុំល្វា ស្រុកព្រះស្ដេច ខេត្តព្រៃវែង កាលពីវេលាម៉ោង៧ព្រឹក ថ្ងៃទី២៧ខែធ្នូឆ្នាំ២០១៨។
នគរបាលមូលដ្ឋាន ប៉ុស្តិ៍ល្វា បានឲ្យដឹងថា នៅមុនពេលកើតហេតុ រថយន្ត១គ្រឿងម៉ាកHYUNDAI ពណ៌សពាក់ស្លាកលេខភ្នំពេញ
3E 3785 ជាប្រភេទរថយន្តកែច្នៃ ដឹកស៊ីប្រូពេញ បើកដោយជនមិនស្គាល់ឈ្មោះរត់គេចបាត់ក្រោយកើតហេតុបើកក្នុងទិសដៅពីជើងទៅត្បូង លុះមកដល់កន្លែងកើតហេតុ បានវ៉ាជែងជាមួយរថយន្តមួយគ្រឿង ហើយបួងចង្កូត ជ្រុលមកខាងឆ្វេងដៃ ធ្វើឲ្យកង់រថយន្តម្ខាងផុតថ្នល់កៅស៊ូ រួចបួងមកវិញ យោលផ្នែកខាងលើក្រឡាប់បះជើងជះស៊ីប្រូ និងរថយន្តសង្កត់ម៉ូតូ២គ្រឿង។
ម៉ូតូទី១ម៉ាក HONDA DREAM C125 ពណ៌ខ្មៅពាក់ស្លាកលេខភ្នំពេញ 1AI 4532 បើកដោយឈ្មោះ អាន ថា ភេទប្រុសអាយុ៤៣ឆ្នាំ រស់នៅភូមិពានីឃុំល្វា ស្រុកព្រះស្តេច ខេត្តព្រៃវែងស្លាប់នៅកន្លែង ដែលកំពុងឌុបកូនស្រីឈ្មោះ ស៊ីម វុទ្ធា អាយុ១៨ឆ្នាំ បាក់ជើងម្ខាងខាងឆ្វេង ក្នុងទិសដៅពីត្បូងមកជើង។
ម៉ូតូទី២ ម៉ាកHONDAគុបជ្រុងពណ៌ទឹកប៊ិចពាក់ស្លាកលេខ ប 9896ភព១ បើកដោយឈ្មោះ លន់ ម៉ានិត ភេទប្រុសអាយុ១៨ឆ្នាំ
រស់នៅភូមិពានី ឃុំល្វា ស្រុកព្រះស្តេច ខេត្តព្រៃវែង៕ ដោយ ៖ បញ្ញាស័ក្តិ
